EKSPO-2017 halyqaralyq mamandandyrylǵan kórmesi aıasynda uıymdastyrylǵan konsert Qazaqstan men Italııanyń dıplomatııalyq qarym-qatynasynyń 25 jyldyǵyna arnaldy. Kesh shymyldyǵyn ashqan Hit Italy toby Abaıdyń «Kózimniń qarasy» ənin ıtalııa tilinde shyrqady. «Arnaıy qazaqstandyq jankúıerler úshin jazylǵan jańa ən, qabyl alyńyzdar!», degen top ənshileri Abaıdyń ánin naqyshyna keltire oryndap, tyńdarmandardyń júregin jaýlady. Al sahnaǵa «Ricchi e Poveri» pop-grýppasy shyqqanda tyńdarman qaýym tik turyp qarsy aldy. Bertinge deıin talaı qazaqtyń toıynda repertýardan túspegen «Mamama mama Maria ma» ánin taǵy bir márte oryndap, kórermenmen birge bıledi. Toptyń mýzykalyq karerasy 1968 jyly Genýıada bastalǵan-tuǵyn. «Sońǵy mahabbat» (L’Ultimo Amore) ánimen «Cantagiro» festıvalinde top jarǵan ónerpazdar búginge deıin sahna tórinen túspeı keledi.
Ulttyq kolorıti men yrǵaqty áýeni álemdi baýraǵan Italııa estradalyq mýzykasynyń jarqyn juldyzy Robertıno Lorettı 1980 jyldan beri tórtkúl dúnıege tanylǵan hıt ənderdi oryndap, zaldy dúr silkindirdi. Qoshemetpen soǵylǵan alaqandar daryndy mýzykanttardy sahnadan jibermeı, qaıtalanbas kantılenasymen baýraǵan retro áýenderdi naqyshyna keltire birneshe márte shyrqady. «Alda shetelderge josparlanǵan 820 konsertim tur. Qazaqstanǵa kelgenge deıin úsh aı emhanada jatyp, endi táýir bolǵan betim. Sizderdiń qoshemetterińizdi kórip, erekshe qýanyp turmyn. Múmkin bul meniń sahnadaǵy sońǵy oryndaýym da shyǵar», degen Robertıno Lorettı aǵynan jaryldy. «Jańa Karýzo» atanǵan ony belgili operalyq tenor Benıamıno Djılmen jıi salystyratyn. Onyń 1962 jyly jaryq kórgen alǵashqy sıngly O Sole mio áni mıllıondaǵan tyńdarmannyń júregin jaýlady.
Al Toto Kýtýno sahnaǵa shyǵyp, áıgili «L’italiano» ánin shyrqap bergende zaldyń ishin Italııanyń «al dente» spagettıi men qoıý kofe, mahabbat jupary kernep ketkendeı boldy. Kezinde áıgili «San-Remo» festıvalinde tuńǵysh ret oryndalyp, besinshi oryn alǵan shyǵarma búginde ónersúıer qaýymnyń rııasyz qurmetine bólendi. «Gúlder qalasy» atanǵan San-Remonyń juparynyń ortasyna aparyp tastaǵandaı ánge elitken tyńdarman qaýym Totomen qosyla shyrqady.
«San-Remo» festıvali – jyl saıyn aqpan aıynda Italııanyń soltústik batysynda ornalasqan kýrortty qalada ótkiziletin mýzykalyq baıqaý. Bul festıval 1951 jyldan beri talantty mýzykanttar men oryndaýshylardy tanytyp keledi. Adrıano Chelentano, Klaýdıo Morı jəne Toto Kýtýno syndy əlemge əıgili ənshiler kezinde osy San-Remo sahnasynan túlep ushqan bolatyn.
Aıa О́MIRTAI,
«Egemen Qazaqstan»
