Qazaqstan Respýblıkasy Úkimetiniń qaýlysy №944

2011 jylǵy 23 tamyz, Astana, Úkimet Úıi Kemelerdegi, onyń ishinde ishki sý joldaryndaǵy shaǵyn kólemdi kemelerdegi kólik oqıǵalaryn tergeýdi, olardy synyptaýdy jáne esepke alýdy júrgizý qaǵıdasyn bekitý týraly «Ishki sý kóligi týraly» Qazaqstan Respýblıkasynyń 2004 jylǵy 6 shildedegi Zańynyń 8-babynyń 20) tarmaqshasyna sáıkes Qazaqstan Respýblıkasynyń Úkimeti qaýly etedi: 1. Qosa berilip otyrǵan Kemelerdegi, onyń ishinde ishki sý joldaryndaǵy shaǵyn kólemdi kemelerdegi kólik oqıǵalaryn tergeýdi, olardy synyptaýdy jáne esepke alýdy júrgizý qaǵıdasy bekitilsin. 2. Osy qaýly alǵashqy resmı jarııalanǵan kúninen bastap kúntizbelik on kún ótken soń qoldanysqa engiziledi. Qazaqstan Respýblıkasynyń Premer-Mınıstri        K.MÁSIMOV. Qazaqstan Respýblıkasy Úkimetiniń 2011 jylǵy 23 tamyzdaǵy  №944 qaýlysymen bekitilgen Kemelerdegi, onyń ishinde ishki sý joldaryndaǵy shaǵyn kólemdi kemelerdegi kólik oqıǵalaryn tergeýdi, olardy synyptaýdy jáne esepke alýdy júrgizý qaǵıdasy 1. Jalpy erejeler 1. Osy Kemelerdegi, onyń ishinde ishki sý joldaryndaǵy shaǵyn kólemdi kemelerdegi kólik oqıǵa­laryn tergeýdi, olardy synyptaýdy jáne esepke alýdy júrgizý qaǵıdasy (budan ári – Qaǵıda) «Ishki sý kóligi týraly» Qazaqstan Respýblıkasynyń 2004 jylǵy 6 shildedegi Zańyna sáıkes qabyldanǵan. 2. Qaǵıda Qazaqstan Respýblıkasy bekitken halyqaralyq sharttar negizinde ishki sý joldarynda, sonymen qatar tranzıt maqsatynda júzýdi júzege asyratyn Qazaqstan Respýblıkasynyń keme kitabynda, Memlekettik keme tiziliminde nemese jalǵa alynǵan sheteldik kemeler tiziliminde memlekettik tirkeýge jatatyn kemelermen, sonyń ishinde shaǵyn kólemdi kemelerdegi kólik oqıǵalaryn tergeýdi, synyptaýdy jáne esepke alýdy júrgizý tártibin aıqyndaıdy. 3. Ishki sý joldarynda kemelermen, sonyń ishinde shaǵyn ólshemdi kemelermen bolǵan kóliktik oqıǵalardy tergeýdi, synyptaýdy jáne esepke alýdy júrgizýdiń maqsaty jaǵdaılardyń, sebepterdiń saldarlardyń, qatysty adamdardyń is-qımylyn baǵalaýdy belgileý, olardy boldyrmaý jóninde sharalar qabyldaý, sondaı-aq avarııalardyń aldyn alý jónindegi tıisti usynymdaryn daıyndaý bolyp tabylady. 4. Qaǵıdada mynadaı uǵymdar paıdalanylady: 1) avarııa – nátıjesinde adam ólimi ne aýyr dene jaraqattary bolǵan kóliktik oqıǵalar ne kemeden adamdar joǵalyp ketken, sondaı-aq kemeniń tolyq konstrýktıvtik qıraýy, kemeni sý basýy, kemeniń navıgasııalyq jabdyq quraldaryn, teńiz ınfraqurylymy obektilerin zaqymdap, olardy paıdalanýdan shyǵarýǵa, munaı jáne munaı ónimderiniń tógilýine ákep soqtyrǵan kóliktik oqıǵalar; 2) gıdrotehnıkalyq qurylystar – shlıýzder, bógetter, kópirler, porttyq jáne sý tartqysh qurylystar, tolqyn tosqaýyldar, sondaı-aq áýe jáne keme júrisiniń shegindegi sý asty ótkelderi (kabelder, sý qubyrlary, telefon jáne elektr júrgizý qubyrlarynyń jelileri, qalqymaly kópirler); 3) kemede júzý qasıeti – kemeniń júzýde paıdalaný jaǵdaılaryndaǵy áreketin aıqyndaıtyn sıpattamalarynyń jıyntyǵy: júzgishtigi, beriktigi, sýǵa batpaıtyndyǵy, júrgishtigi, basqarýshylyǵy 4) kemelerdi sý basý – korpýstyń sýǵa tolyq batýy nemese korpýsqa sýdyń kirýi nemese aýdarylýy nátıjesinde júzgish qorlardyń tolyq joǵalýy; 5) kóliktik oqıǵa – kememen bolǵan, ony apatqa jáne kemede júzý qasıetin joǵaltýǵa, kemeniń navıgasııalyq jabdyq quraldaryn, teńiz ınfraqurylymy obektilerin zaqymdap, olardy paıdalanýdan shyǵarýǵa, kemeniń tirkep súıreý obektisin joǵaltýǵa ákep soqtyrǵan oqıǵa; 6) paıdalaný oqıǵasy – avarııaǵa jatpaıtyn kóliktik oqıǵa. 5. Qazaqstan Respýblıkasy Kólik jáne kommýnıkasııa mınıstrligi Kóliktik baqylaý komıtetiniń aýmaqtyq bólimshesi (budan ári – Komıtettiń aýmaqtyq bólimshesi) kóliktik oqıǵalardy tergeý organy bolyp tabylady. 6. Kemelerdegi kóliktik oqıǵany tergeý eńbek zańnamalyq, qylmystyq, ákimshilik nemese ózge óndiris sheńberinde júrgizilgen basqa tergeýge qaramastan júzege asyrylady jáne ózge tergeýlerge kedergisin keltirmeıdi. 7. Komıtettiń aýmaqtyq bólimshesi kóliktik oqıǵa týraly Komıtetke jáne kóliktik prokýratýraǵa kidirmesten kelesi málimetterdi habarlaıdy: 1) kóliktik oqıǵa týraly habarlaǵan adamnyń (uıymnyń) tegi, aty, ákesiniń aty, baılanys telefondary; 2) kóliktik oqıǵanyń bolǵan kúni jáne ýaqyty; 3) kemeniń tirkeý nómiri jáne túri, keme ıesi týraly málimetter; 4) kóliktik oqıǵa ornynyń koordınatalary; 5) keme qozǵalysynyń baǵyty; 6) keme júrgizýshisiniń jáne kemede bolǵan ózge adamdardyń tegi, aty, ákesiniń aty, baılanys telefondary; 7) aýa raıynyń meteorologııalyq jaǵdaıy; 8) navıgasııalyq jabdyqtardyń, teńiz ınfraqurylymy obektileriniń bolýy; 9) kóliktik oqıǵanyń sebepteri, kemeniń, navıgasııalyq jabdyqtyń, teńiz ınfraqurylymy obektileriniń zaqymdanýynyń bolýy jáne sıpaty, qaza tapqandardyń, dene jaraqatyn alǵandardyń jáne kemeden joǵalyp ketkenderdiń sany, qorshaǵan ortany lastaý; 10) kóliktik oqıǵany baǵalaýǵa jáne kómek kórsetý men zardaptardy joıý úshin tehnıkalyq quraldardy tartý qajettigi týraly sheshim qabyldaýǵa múmkindik beretin ózge málimetter. 8. Kóliktik oqıǵa avarııa nemese paıdalaný oqıǵasy bolyp synyptalady. 9. Kóliktik oqıǵa bolǵan jaǵdaıda keme kapıtany, keme júrgizýshisi, keme ıesi, gıdrotehnıkalyq qu­rylystardyń laýazymdy tulǵalary menshik nysanyna jáne vedomstvolyq qatystylyǵyna qaramastan: 1) 24 saǵat ishinde kóliktik oqıǵa týraly Komıtettiń aýmaqtyq bólimshesine jáne kóliktik prokýratýraǵa habarlaıdy; 2) kóliktik oqıǵa bolǵan sátten bastap 48 saǵattyń ishinde onyń negizinde kóliktik oqıǵany tirkeý­di júrgizetin Kóliktik oqıǵanyń aktisin jasaıdy jáne bir danasyn Komıtettiń aýmaqtyq bólimshesine jiberedi. Kóliktik oqıǵanyń aktisinde kelesi málimetter qamtylady: 1) kóliktik oqıǵanyń kúni jáne orny, qurýshylar týraly málimetter (laýazymy, tegi, aty, ákesiniń aty, al kýágerler úshin – turatyn orynnyń meken-jaıy); 2) keme jáne gıdrotehnıkalyq qurylys týraly negizgi málimeter (ataýy, túri, qýaty, júk kóterimdiligi, gabarıtteri, júk túrleri jáne basqalary); 3) kóliktik oqıǵanyń qatysýshylary týraly málimetter (laýazymy, jasy, arnaıy bilimi, sý kóligindegi, komandalyq laýazymdarynda jáne atqarylatyn laýazymdaryndaǵy jalpy jumys ótili, jumys dıplomy nemese kýáligi, olardy alý kúni jáne kim berdi); 4) kóliktik oqıǵa bolǵan ýchaskeniń gıdrologııalyq sıpaty, aýa-raıynyń jaǵdaıy, kórinýi, kemede júzý gabarıtteri jáne jarııalanǵanǵa tıistiligi, shtattyq oryndarda navıgasııalyq belgilerdiń bolýy jáne olardyń normatıvtik taaptarǵa sáıkes bolýy jáne basqalary; 5) kóliktik oqıǵanyń aldyndaǵy is-qımyldy jáne oǵan qatysy bar jaǵdaılardy baǵalaý; 6) Kóliktik oqıǵanyń jaı-kúıi (barlyq manevrlerdiń júıeligin kórsete otyryp oqıǵany naqty jazý, júrý jyldamdyǵy, ókimder, komandalar, dabyldar jáne basqalar) ; 7) kóliktik oqıǵanyń saldarlaryn joıý, adamdar men júkterdi qutqarý boıynsha is-qımyldardy qosa alǵanda keme júrgizýshiniń nemese ekıpajdyń keıingi is-qımyldary; 8) jaraqat alǵan nemese qaza bolǵan adamdar sany, olardyń tegi, attary, turatyn oryndary, týǵan jyldary) ; 9) korpýstyń, mehanızmniń, jyljytqyshtardyń, júrgizý quraldarynyń buzylýy «Keme tehnıkalyq aktisinde» erkin túrde resimdelýi tıis; 10) búlinýdiń saldarlary (otsekterdi sý basýy, júktiń búlinýi nemese joǵalýy, qorshaǵan ortanyń lastanýy, júrý múmkindigi jáne basqalary); 11) osy Kóliktik oqıǵanyń aktsin jasaǵandardyń qoly jáne kúni. Gıdrotehnıkalyq qurylystarmen bolǵan Kóliktik oqıǵalardyń aktileri olardyń ıeleri ókilderiniń qatysýymen resimdeledi. Kóliktik oqıǵanyń eki jáne odan kóp qatysýshylary kezinde aktini olar birlesip jasaıdy. Kóliktik oqıǵaǵa qatysýshylardyń arasynda kelispeýshilikter bolǵan kezde onyń sebepteri jáne saldary týraly aktiler jeke jasalady. Kóliktik oqıǵanyń aktisine myna qujattar qosa beriledi: 1) kóliktik oqıǵanyń aldyndaǵy, oqıǵa bolǵan sáttegi jáne shaǵyn kólemdi kemelerdi qospaǵanda odan keıingi ýaqyttaǵy vahta bastyǵynyń is-qımyly engiziletin ýaqyt ishindegi keme jýrnalynan (vahta jýrnalynan) úzindi; 2) mashına jáne basqa jýrnaldardan, eger osy kemede júrgizilý kózdelgen bolsa, úzindi; 3) barlyq qatysy bar adamdardan túsiniktemeleri jáne eger kýágerler bolsa, olardyń kórsetýleri; 4) kóliktik oqıǵa bolǵan jerdi belgileýmen syzba, sondaı-aq kemeniń retimen ornalasýy jáne basqalary; 5) kóliktik oqıǵa ýchaskesiniń navıgasııalyq kartasynyń kóshirmesi; 6) kóliktik oqıǵaǵa qatysy bar basqa qujattar men zattaı dálelder (radıogrammalardyń, buıryqtardyń, ókimderdiń, kýrsogrammalardyń kóshirmeleri, fotosýretter, tahogrammalar, traldaý nemese tereńdikterdi ólsheý týraly tetikter men qondyrǵylardyń isten shyǵýy týraly aktiler, nusqaýlyq jónindegi jýrnaldar). Kóliktik oqıǵa aktisine qosa beriletin barlyq qujattar keme kapıtanynyń, keme júrgizýshisiniń, keme ıesiniń, gıdrotehnıkalyq qurylystardyń laýazymdy tulǵalarynyń qolymen rastalýy tıis. Qosymshalarmen birge Kóliktik oqıǵanyń aktisiniń bir danasy ýákiletti organnyń aýmaqtyq bólimshesine jiberiledi, aktiniń bir danasy kóliktik oqıǵaǵa qatysýshylaryna jiberiledi. 10. Kóliktik oqıǵalardy tergeýdiń júrgizilýin baqylaýdy Komıtettiń aýmaqtyq bólimshesiniń basshysy júzege asyrady. 2. Kóliktik oqıǵalardy tergeý tártibi 11. Kóliktik oqıǵalardy tergeý kemelerdiń júzý aýdanyndaǵy keme qozǵalysyn qalpyna keltirý jónindegi jumystarǵa kóliktik oqıǵalardyń saldaryn joıýǵa jáne kedergi bolmaýǵa tıis. 12. Ishki sý joldarynda kemelermen, sonyń ishinde shaǵyn ólshemdi kemelermen bolǵan kóliktik oqıǵalardy tergeý, synyptaý jáne esepke alý Komıtettiń aýmaqtyq bólimshesinde kóliktik oqıǵa tirkelgen sátten bastap otyz kúntizbelik kún ishinde júrgiziledi. 13. Aýmaqtyq bólimsheniń qyzmetkeri kóliktik oqıǵany tergeý kezinde kóliktik oqıǵa bolǵan jerge kelgen soń, zaqymdalǵan kemeler men obektilerdi tekserip qaraýdy júrgizedi. 14. Komıtettiń aýmaqtyq bólimshesiniń qyzmetkeri kóliktik oqıǵanyń qatysýshylarynan jáne kýágerlerinen jazbasha suratý júrgizedi, onyń barysynda mynalar anyqtalady: 1) kemeniń ekıpajben jınaqtalýy, vahtany júrgizý tártibiniń saqtalýy; 2) laýazymyn atqarý quqyǵyn rastaıtyn qujattyń bolýy, shaǵyn kólemdi kemeni basqarý quqyǵyna kýáliktiń, shaǵyn kólemdi kemege keme bıletteriniń bolýyn, shaǵyn kólemdi kemeni júrgizýshiniń júzý ótili; 3) vahtalyq jýrnaldaǵy kóliktik oqıǵanyń durys jáne tolyq kórsetilýi; 4) shaǵyn ólshemdi keme ekıpajynyń, keme júrgizýshisiniń oqıǵadan keıin adamdarǵa jáne kemelerge kómek kórsetý úshin qabyldaǵan sharalary; 5) kóliktik oqıǵaǵa deıingi jáne odan keıingi qozǵaltqyshtyń jáne jyljytqyshtyń jumys rejimi; 6) baqylaý-ólsheý aspaptarynyń kórsetkishteri; 7) kóliktik oqıǵaǵa qatysýshy kemelerdiń keme júrisiniń dińgegi men shekarasyna qatysty baǵyty; 8) sıgnal ottarynyń bolýy men olardyń kórinýi. 15. Komıtettiń aýmaqtyq bólimshesiniń qyzmetkeri kóliktik oqıǵa oryn alǵanǵa deıingi, ol oryn alǵan ýaqyttaǵy jáne odan keıingi kemelerdiń qozǵalysy men ornalasýynyń shemasyn qurastyrady, bul rette kóliktik oqıǵa kezinde oryn alǵan jaǵdaı men faktorlardyń áser etý deńgeıin, atap aıtqanda: metereologııalyq jaǵdaılardy (kóriný qashyqtyǵy, jeldiń, jańbyrdyń, tumannyń, tolqynnyń jáne basqa meteorologııalyq faktorlardyń bolýy); oqıǵa bolǵan aýdanda basqa kemelerdiń bolýy jáne olardyń kóliktik oqıǵa saldaryna áser etýin belgileıdi. 16. Kemelerdegi kóliktik oqıǵalardy tergeýdi júrgizýge baılanysty barlyq máseleler boıynsha Komıtettiń aýmaqtyq bólimshesi memlekettik organdardyń, uıymdardyń, sondaı-aq ǵylymı uıymdar, arnaıy saraptamalyq komıssııalar zerthanalarynyń quzyreti sheginde olarmen tikeleı ózara is-qımyl jasaıdy. 17. Kóliktik oqıǵany tergeý mynadaı jaǵdaılarda: 1) kóliktik oqıǵaǵa qatysy bar adamdarda kútpegen mán-jaılar (aýyrý, issapar jáne basqa sebepter) týyndaǵan; 2) saraptama, tájirıbe jumystaryn júrgizý nemese kemelerdi sý basýyn, olardyń qıraýymen baılanysty kóliktik oqıǵanyń mán-jaılaryn qosymsha anyqtaý úshin; 3) memlekettik organdardyń, uıymdardyń, sondaı-aq ǵylymı uıymdar, saraptamalyq komıssııalar zerthanalarynyń, quzyreti sheginde olardyń qujattaryn, materıaldaryn jáne qorytyndylardy usyný úshin Komıtettiń sheshimi boıynsha otyz kúntizbelik kúnnen aspaıtyn merzimge uzartylady. 18. Kemelermen bolǵan kóliktik oqıǵalardyń sebepterin bilikti jáne dáıekti belgileýdi qam­tamasyz etý úshin olardy tergeý kezinde Komıtettiń aýmaqtyq bólimshesi uıymdardyń, sondaı-aq ǵyly­mı uıymdar, saraptamalyq komıssııalar zerthanalarynyń sarapshylary men mamandaryn tartady. 19. Saraptamalyq komıssııany nemese kóliktik oqıǵalar boıynsha jekelegen sarapshylardy Komıtettiń aýmaqtyq bólimshesiniń basshysy taǵaıyndaıdy. Saraptama taǵaıyndalǵan kezde saraptamalyq komıssııasynyń (sarapshynyń) aldyna saraptama júrgizý barysynda sheshýge jatatyn naqty máseleler qoıylady, materıaldar usynylady. 20. Sarapshylar bolyp joǵary nemese tehnıkalyq arnaıy orta bilimi bar jáne keminde 5 jyl praktıkalyq jumys tájirıbesi bar adamdar (keme júrgizýshileri, keme mehanıkteri, elektr mehanıkteri, elektr tehnıkteri, radıo tehnıkteri, gıdrotehnıkter, korabl jasaýshylar, paıdalanýshylar) jáne jobalaý-konstrýktorlyq uıymdardyń qyzmetkerleri taǵaıyndalady. Saraptamaǵa qatysý úshin Qazaqstan Respýblıkasy Kólik jáne kommýnıkasııa mınıstrligine vedomstvolyq baǵynysty uıymdar basshylarynyń kelisimi boıynsha kórsetilgen uıymdardyń mamandaryn shaqyrýǵa bolady. 21. Sarapshylar óz mindetterin oryndaý kezinde: kóliktik oqıǵalardy tergeýdiń saraptamalyq qorytyndysy úshin qajetti materıaldarymen tanysady; kemelerdi jáne olardyń qurylǵylaryn qarap tekserýdi júrgizedi, keme mehanızmderiniń, júıeleriniń, qurylǵylarynyń, aspaptarynyń jáne basqa jabdyqtarynyń jumys isteýin tekseredi. 22. Sarapshylar qorytyndyda saraptamalyq komıssııasynyń aldyna qoıylǵan barlyq máselelerge jaýaptardy kórsetedi. Qoıylǵan máselege egjeı-tegjeıli tolyq jaýap berý múmkin bolmaǵan jaǵdaıda sarapshylar buǵan dáleldi túsinik beredi. 3. Kóliktik oqıǵalardy esepke alý 23. Kóliktik oqıǵany Komıtettiń aýmaqtyq bólimshesi júrgizetin Kóliktik oqıǵalardy tirkeý jýrnalyna tirkeıdi. 24. Tirkeý jýrnaly nómirlenedi, tigiledi jáne Komıtettiń aýmaqtyq bólimshesiniń mórimen rastalady. 4. Kóliktik oqıǵalardyń tergeý materıaldaryn qaraý tártibi 25. Tergeý materıaldary boıynsha tergeý júrgizgen komıtettiń aýmaqtyq bólimshesiniń qyzmetkeri kóliktik oqıǵany synyptaıdy jáne dáleldi qorytyndy jasaıdy. 26. Tergeý qorytyndylary boıynsha Komıtettiń aýmaqtyq bólimshesi kóliktik oqıǵa týraly qorytyndy jasaıdy da bir-bir danadan Komıtetke jáne kóliktik oqıǵaǵa tikeleı jol bergen qatysýshylarǵa jiberedi. 27. Qorytyndyda mynadaı málimetter qamtylady: 1) kemelerdiń ataýy, qýaty, tıelýi, júzip ketý ádisteri, qozǵalys baǵyty; 2) kóliktik oqıǵaǵa qatysýshylar týraly qysqasha málimetter (olarda tegi, aty, ákesiniń aty, týǵan jyly, laýazymy jáne jumys orny, shaǵyn kólemdi kemeni basqarý quqyǵyna kýáligi týraly málimetter, shaǵyn kólemdi kemege keme bıleti, jumys ótili tirkeledi); 3) kóliktik oqıǵanyń ýaqyty jáne orny, navıgasııalyq jabdyqtyń nemese teńiz ınfraqu-rylymy obektileriniń ornalasýy jáne olarǵa kemelerdiń qatysy boıynsha jaǵdaıy; 4) kóliktik oqıǵanyń, ol bolǵan kezdegi jaǵdaılaryn jáne kemede júrý sharttaryn (qozǵalys sıpatyn, joldyń, navıgasııalyq jabdyqtyń, aýa-raıynyń jáne kórinýdiń jaı-kúıin, keme sıgnal berýiniń jáne radıonavıgasııalyq aspaptardyń is-áreketin jáne paıdalanýyn, kemelerde nemese ózge obektilerde vahtalyq qyzmetti júrgizý tártibin saqtaýdy, kóliktik oqıǵaǵa qatysy bar keme júrgizýshileri men ózge adamdardyń is-qımylyn) qysqasha sıpattaý; 5) kóliktik oqıǵanyń sebepteri; 6) kemelerdiń, júzbeli obektilerdiń zaqymdaný ornyn, mólsheri men sıpatyn, jaǵalaý obektileriniń nemese qurylystarynyń zaqymdanýyn, adamdardyń aýyr dene jaraqattaryn alýyn, qaza bolýyn, kemeden joǵalyp ketýin sıpattaı otyryp kóliktik oqıǵanyń saldary; 7) kóliktik oqıǵanyń saldaryn joıý úshin qoldanǵan tehnıkalyq quraldar; 8) kóliktik oqıǵaǵa tikeleı jol bergen nemese onyń týyndaýyna yqpal etken adamdardyń tizbesi; 9) kemelerdegi kóliktik oqıǵalardyń bolýyna yqpal etetin sebepter men jaǵdaılardy joıý jónindegi usynymdar. 28. Komıtettiń aýmaqtyq bólimshesiniń qorytyndysy men kóliktik oqıǵa boıynsha materıaldar usynylǵan kúnnen bastap kúntizbelik otyz kún ishinde Komıtet olardy qaraıdy, sodan keıin sheshim shyǵarady. 29. Tehnıkalyq jaı-kúıin, odan ári paıdalaný jáne/nemese jóndeý sharttaryn anyqtaý maqsatynda keme ıesi jáne/nemese keme júrgizýshisi Komıtettiń aýmaqtyq bólimshesiniń qory­tyndysyn alǵannan keıin «Keme qatynasy tirkelimi» memlekettik mekemesine kemeni, al Komıtettiń aýmaqtyq bólimshesine shaǵyn kólemdi kemeni kezekten tys tehnıkalyq kýálandyrýǵa usynady.