Keńeske ortalyq memlekettik organdardyń basshylary, «Atameken» UKP basqarma tóraǵasy Abylaı Myrzahmetov, Qaraǵandy oblysynyń óńirlik kásipkerler palatasynyń dırektory Ernar Kúlpeıisov, «Jekeshelendirý bıýrosy» JShS dırektory Aleksandr Perov, «ASPAP» PK dırektory Tólegen Áshimov, «Shyǵys» ShQ basshysy Shamıl Osın, «Kazcenterelectroprovod» JShS bas dırektory Sergeı Kım, «Qaraǵandy oblysy qurylys salýshylar qaýymdastyǵy» JK jáne ZTB dırektory Naılıa Qaıyrbekova, «Magnıtka Qazameta» JShS dırektory Andreı Vıtık qatysty.
Kezdesýde turmystyq qyzmetterge saralanǵan tarıfti joıý, eskirgen qurylys normalary men erejeleriniń ornyna eýrokod júıelerin engizý, AО́K ınvestısııalyq sýbsıdııalaryn tóleý, otandyq taýar óndirýshilerge shıkizatqa ımporttyq keden bajy men QR aýmaǵy boıynsha júkterdi tasymaldaýǵa ketetin shyǵyndardyń ótemaqysyn tómendetý turǵysynan qoldaý kórsetý máseleleri talqylandy. Budan ózge, monopolısterdiń tutynýshylarmen ózara qarym-qatynasyna jáne kásipkerlik qyzmetti damytýǵa kedergi keltiretin faktorlarǵa baılanysty máseleler kóterildi.
Kásipkerler qozǵaǵan taqyryptarǵa QR ulttyq ekonomıka mınıstri T. Súleımenov, QR ınvestısııalar jáne damý mınıstri J. Qasymbek jáne QR aýyl sharýashylyǵy vıse-mınıstri G. Isaeva túsinikteme berip ótti.
QR Premer-Mınıstri Baqytjan Saǵyntaev Qazaqstanda kásipkerlikti damytý mindetin, ekonomıkalyq ósimniń jańa modelin qalyptastyrý aıasynda, Elbasy N. Nazarbaev «Qazaqstannyń úshinshi jańǵyrýy: jahandyq básekege qabilettilik» Joldaýynda qoıǵanyn atap ótti. Osyǵan oraı, Úkimet bızneske qoldaý kórsetý máselelerine erekshe kóńil bólýde.
Baqytjan Saǵyntaev elimizde júrgizilip jatqan tehnologııalyq jańǵyrtý jumystary otandyq kásipkerlerdi jańa óndirister men ónimder shyǵarýǵa tartýǵa úlken múmkindikter beretinin aıtty. Sondaı-aq, kásipkerler servıstik qyzmetter men qarapaıym zattar ekonomıkasy sekildi ekonomıka sektorlaryn odan ári damytýǵa belsendi túrde atsalysa alady. Bul, óz kezeginde, ózge salalardan bosatylatyn áleýetti jumysshylarǵa qosymsha jumys oryndaryn ashýǵa múmkindik beredi.
Kezdesýdiń sońynda Baqytjan Saǵyntaev Úkimettiń bıznes qaýymdastyqty mazalaǵan máselelerdi talqylaý úshin qashan da ashyq ekenin aıtyp, kásipkerlerdi ekonomıkany jańǵyrtý aıasyndaǵy mindetterdi iske asyrýǵa birlesip, belsendirek qatysýǵa shaqyrdy.
Memlekettik organdarǵa atalǵan máselelerdi baqylaýǵa alý tapsyryldy.
