Kenshiler shahary taǵy da bir ıgilikti istiń jarshysy boldy. Jýyrda ǵana júzege asqan qanatqaqty joba – «Amanat» qoǵamdyq tanym syılyǵy Qaraǵandy óńirindegi óz úzdikterin anyqtady. Atalmysh syılyǵy elimizdiń áleýmettik-ekonomıkalyq ári qoǵamdyq-rýhanı ómirine eleýli úlesi bar tulǵalarǵa tabystalady.
Elbasymyz Nursultan Nazarbaevtyń «Bolashaqqa baǵdar: rýhanı jańǵyrý» maqalasynda aıtylǵan Qazaqstan jańǵyrýynyń eń basty negizi – tarıhı, mádenı murany, rýhanı qundylyqtardy saqtaý, ulttyq kodty oıatý ıdeıasymen úndes jańa joba búginde «Adamdardyń eleýli jetistikteri» qoǵamdyq qory, «Nur Otan» partııasy, Qazaqstan halqy Assambleıasy, sondaı-aq, Qaraǵandy oblysy ákimdiginen qoldaý taýyp otyr.
Jalpy, bul baǵdarlamalyq joba jaqynda ǵana júzege asqanymen, ıdeıa tamyry tereńde jatqandyǵy shyndyq. L.N.Gýmılev atyndaǵy Eýrazııa ulttyq ýnıversıtetinde ótken «Amanat» qoǵamdyq tanym syılyǵyn taǵaıyndaý jónindegi qoǵam ókilderi keńesiniń birinshi otyrysynda keńes tóraǵasy Myrzataı Joldasbekov «Baǵzy zamannan, myńdaǵan jyldardan bizdiń qazaq halqynyń, arǵy jaǵyn aıtsaq túrki, ǵun, saq dáýirinde baıtaq dalany, Uly dala eli – Qazaqstandy mekendegen halyqtyń armanyn oryndaǵan kim? Ol – Nursultan Nazarbaev. Sondyqtan biz birinshi syılyqty eldiń san myń jyldyq amanatyn oryndaǵan dep ardaqtap, eń aldymen bul syılyqty Elbasyna berýimiz kerek», degen pikir bildirgen bolatyn.
Shara shymyldyǵy Qaraǵandy oblystyq K.Stanıslavskıı atyndaǵy orys drama teatrynda túrildi. Saltanatty keshke «Amanat» syılyǵyn tapsyrý boıynsha keńes tóraǵasy, qoǵam qaıratkeri, fılologııa ǵylymynyń doktory Myrzataı Joldasbekov bastaǵan Qazaqstan Respýblıkasy Mádenıet jáne sport mınıstrliginiń jaýapty hatshysy Qýatjan Ýálıev, Parlament Májilisiniń depýtaty Baqytbek Smaǵul, Ulttyq agroónerkásip palatasynyń tóraǵasy Qajymqan Másimov, «Egemen Qazaqstan» respýblıkalyq gazeti Basqarma tóraǵasy Darxan Qydyráli sondaı-aq, «Adamdardyń eleýli jetistikteri» qoǵamdyq qorynyń prezıdenti Záýre Beıisova men «Altyn sapa» syılyǵynyń ıegeri Yrza Tursynzada qatysty.
Jalpy, 100-den astam ótinimniń ishinen «Amanat» syılyǵyna ıe bolǵan qaraǵandylyq 7 úmitker jańa jobanyń jeńimpazdary atandy. Olar, Temirtaý qalasynyń qurmetti azamaty, Elbasynyń seriktesi Qýanysh Omashev, Qazaqstannyń eńbek sińirgen qyzmetkeri, «Parasat» ordeniniń kavaleri Rymbala Omarbekova, kórnekti sýretshi, Elbasy bastamasymen qurylǵan «ATOM» jobasynyń qurmetti elshisi Káripbek Kúıikov, oblystyq máslıhat depýtaty Aıman Túkbaeva, «Shyǵys» sharýa qojalyǵynyń basshysy Shamıl Osın, Qazaqstan halqy Assambleıasynyń múshesi Vılen Molotov-Lýchanskıı, Parlament Májilisiniń depýtaty Serik Sápıev jáne teatr jáne kıno akteri, Qazaqstannyń eńbek sińirgen qaıratkeri Qaırat Kemalov.
Marapattaý rásimi de óz ereksheligimen kórermenderdiń kóńil kókjıegin keńge qulash sermetti. Aıtalyq, syılyq ıelerine tabystalǵan kýboktyń ózinde qanshama mán-maǵyna bar. Shańyraq úlgisinde quıylǵan altyn tústes kýboktyń ishine Arqanyń bir ýys topyraǵy túıilgen. Syrtyn qaptaǵan bylǵaryǵa «Jer – jurtqa amanat, Jurt – ultqa amanat, Ult – elge amanat, El – erge amanat! Er – janǵa amanat, Jan – tánge amanat, Bári Qudaıǵa amanat!» degen bataly sóz jazylǵan.
Odan bólek, is-shara barysynda «Altyn Orda» avtorlyq dızaın úıiniń prezıdenti Yrza Tursynzadanyń avtorlyq jobasy «Babalar amanaty» galereıasyn jurt jyly qabyldady. Ol galereıada Arqanyń aýzy dýaly ataqty bı-sheshenderiniń, aqyn-jazýshylarynyń ataly sózderi jumsaq mataǵa altyn jippen kestelenip jazylǵan. Bolashaqta Qazaqstannyń barlyq aımaǵynda ótken abyz da ańyz tulǵalardyń ýáli sózderi osy galereıada kórinis tappaq.
Atalmysh qor sonymen qatar, «Amanat» jobasynyń aıasynda Mədenıet jəne sport mınıstrliginiń «Qazaqstannyń kıeli jerleriniń geografııasy» jobasyna qoldaý kórsetý barysynda Qaraǵandy oblysynyń tarıhı jəne kórikti mekenderine ekspedısııa jasaǵan. «Vega Invest Films Media Production» prodıýserlik ortalyǵymen birlesip birneshe derekti fılm túsirgen shyǵarmashyl top saltanatty keshte tusaýkeser jasady. Onyń syrtynda ázirge 30 metrlik «Álem kilemi» pannosy jurtqa tanystyryldy.
Syılyq memleketimizdiń saıasatyn dáriptep, ulttyq qundylyqtarymyzdy jaryqqa shyǵarýymyzdan bastaý alady. Jalpy, «Amanat» jobasynyń Qaraǵandy óńirinen bastaý alýy jaıdan-jaı emes. Ol – bizdiń Kóshbasshymyz Nursultan Nazarbaevtyń Saryarqa jerinde óziniń eńbek jolyn bastap, saıasatker retinde qalyptasqan ómir dańǵylyn astarlap tur, – dedi «Nur Otan» partııasy Qaraǵandy oblystyq fılıaly tóraǵasynyń birinshi orynbasary Hadısha Ospanova.
«Amanat» syılyǵy aldaǵy ýaqytta Qazaqstannyń túkpir-túkpirindegi óz qaharmandaryn taýyp, eń negizgi maqsaty adamzattyń amanatyn arqalaǵan tulǵalardy álem aldynda tanystyrý bolmaq. Sarqylmas qundylyqtardy saqtap, bolashaqqa jetkizý – Amanat. Endeshe biz de, dástúrimizdi dáriptep, ultymyzdy ulyqtaıtyn amanat-júrekke salamat tileıik!
Mıras ASAN,
«Egemen Qazaqstan»
Qaraǵandy oblysy
