Soltústik Qazaqstan oblystyq prokýratýrasy jartyjyldyq jumys qorytyndylaryn shyǵaryp, birqatar kemshilikti anyqtady.
Máselen, aýylsharýashylyq jerlerin tıimdi paıdalanbaıtyndar áli kóp. 11 myń gektar aýmaqty aramshóp basyp ketken. Bul maqsat úshin alynǵan sýbsıdııanyń qaıda jumsalǵany belgisiz.
О́tken jylǵa qaraǵanda bıyl qylmystyq faktilerdiń 29,8 paıyzǵa tómendegeni baıqalady. Soltústik Qazaqstan oblystyq prokýratýrasy 1-shi basqarmasynyń bastyǵy Ashat Aýqatovtyń aıtýynsha, oblysta qylmys pen quqyq buzýshylyqtardyń aldyn alýǵa baǵyttalǵan birlesken jobalar sátti júzege asyp keledi. «Bárine jumys» jobasy boıynsha 80 múgedek jumysqa ornalasyp, 20-ǵa jýyǵy oqýǵa jiberilgen.
Esep berý barysynda zeınetaqy tóleminde oryn alǵan soraqy jaıttar da sóz boldy.
– Osydan 10 jyl buryn Germanııaǵa kóship, sol eldiń azamattyǵyn alǵan soltústikqazaqstandyq 2 jyl boıy Qazaqstannan da zeınetaqy alyp otyrǵan. Sóıtip, el qazynasyna 3,5 mıllıon teńge kóleminde shyǵyn keltirgen. Qazirgi tańda bul iske baılanysty sotqa deıingi tergeý amaldary júrgizilýde. Qalaı bolǵanda da atalǵan soma memleket bıýdjetine qaıtarylýy qajet, – dedi alqaly jıynda 4-shi basqarmanyń bastyǵy Jankeldi Bazarbaev.
О́mir ESQALI,
«Egemen Qazaqstan»
Soltústik Qazaqstan oblysy
