«EXPO 2017» kórmesiniń aıasynda uıymdastyrylyp otyrǵan «EXPO 2017 Football Cup» halyqaralyq týrnıri 5-6 tamyz kúni ótedi.
«Astana Arena» stadıonynda Qazaqstan, Reseı, Italııa, Germanııa, Portýgalııa quramalary, sonymen qatar Juldyzdar quramasy kezdesedi.
Týrnır – máskeýlik «Ańyzdar kýbogynyń» balamasy. Reseılik sharaǵa jaqynda karerasyn aıaqtaǵan ótken jyldardyń belgili oıynshylary qatysady. Al mundaı aýqymdy sport jarysy Qazaqstan ortalyǵynda tuńǵysh ret uıymdastyrylyp otyr.
Dıno Badjo, Marko Delvekkıo, Nýný Manıshe, Jan-Per Papen, Roman Shırokov, Valerıı Karpın, Aleksandr Fılımonov jáne basqa oıynshylar jankúıerlerdi ónerimen qýantpaq. Qazaqstan atynan Igor Avdeev, Andreı Karpovıch, Qaırat Áýbákirov, Murat Tileshov, Andreı Fınonchenko sekildi otandyq fýtboldyń ardagerleri alańǵa shyǵady.
4 tamyz kúni 16:00-de «Astana EKSPO-2017» medıa-ortalyǵynda týrnır músheleriniń qatysýymen baspasóz máslıhaty bastalady, al 17:00-de kórme aýmaǵynda fýtbolshylar jankúıerlermen kezdesip, qoltańba sessııasyn ótkizedi.
5 tamyz kúni 12:00 men 18:30 aralyǵynda toptyq kezeń oıyndary, al 6 tamyzda 14:30 ben 17:40 aralyǵynda pleı-off serııasynyń oıyndary men marapattaý saltanaty júredi.
Sonymen qatar 6 tamyz kúni 12:00 men 13:00 aralyǵynda balalar men jasóspirimder sport mektebiniń tárbıelenýshileri úshin oıynshylardyń qatysýymen arnaıy sheberlik synyby uıymdastyrylatyn bolady.
Týrnırdiń uıymdastyrýshysy Álııa Adambaevanyń aıtýynsha, sheberlik synybyna Qazaqstannyń túrli aımaǵynan kelgen fýtbolmen aınalysatyn 300-deı bala qatysady. Olardyń arasynda balalar úıleriniń tárbıelenýshileri de bolady.
«Balalardy «EXPO 2017 Football Cup» sharasyna qatysqan ár komandadan 2 oıynshy jattyqtyrady. Nátıjesin jeksenbi, ıaǵnı 6 tamyz kúni alańda balalarmen álemdik bedeli bar 12 oıynshy jumys isteıtin bolady. Ár oıynshynyń belgili bir óz fýnksııasy bar ekenin atap ótkim keledi: bireýleri balalardy dopty durys berýge, endi biri soqqy tehnıkasyna úıretedi», - deıdi ol.
Adambaeva balalar tobynyń aýysyp, bir jattyqtyrýshydan ekinshisine ótip otyratynyn aıtty. «Eki tanymal fýtbolshy ár komandamen bólek jumys jasap úlgeretin bolady», - deıdi uıymdastyrýshy.
«EXPO 2017 Football Cup» týrnıriniń resmı ókili Aıdyn Qojahmettiń sózine qaraǵanda, shara «kórmelik» sıpatqa ıe eken. «Fýtbolshylar alańǵa ózderin erkin sezinip shyǵady, olardyń maqsattary bireý-aq – sheberlikterin kórsetý. Bul – estetterge arnalǵan oqıǵa. Sportshylar babynda, doppen qalaı keremet jumys isteý kerektigin biledi», - dedi ol Astanada ótken baspasóz máslıhaty barysynda.
Sondaı-aq sarapshy týrnırge Qazaqstan komandasynyń tuńǵysh ret qatysyp otyrǵanyna mán berip ótti. «Bul – biz úshin úlken qadam, osyǵan deıin Ańyzdar kýbogyna qatysyp kórgen joq edik», - dedi Qojahmet.
Týrnırdiń bas menedjeri, «Nıý Sport» sport agenttiginiń prezıdenti Tamerlan Kýrıev óz kezeginde atalǵan sharanyń ótýine muryndyq bolǵan alǵysharttar týraly aıtyp berdi. «2009 jyldan beri Ańyzdar kýbogyna ondaǵan álem, Eýropa chempıony, Chempıondar lıgasynyń jeńimpazdary, kóptegen ataqty klýbtardyń belgili oıynshylary qatysty. Fýtbol kareralarynyń aıaqtalǵanyna qaramastan olarǵa degen jankúıerlerdiń qyzyǵýshylyǵy esh tómendemegen emes. Al mundaı formatta ótetin týrnırde qyzý qarqyndaǵy oıyndar mindetti túrde bolady», - dep atap ótti ol.
Kýrıevtiń sózine qaraǵanda, sońǵy Ańyzdar kýbogynda orta eseppen bir oıynda 14 goldan soǵylǵan eken.
«Úlken fýtbol meıramy óteıin dep otyr. Men tek Federasııa prezıdenti ǵana emes, fýtbol ardageri retinde de Qazaqstanda «EXPO 2017» kezinde osyndaı ańyzdar týrnıriniń uıymdastyrylatynyna qýanyshtymyn. Shara joǵary deńgeıde ótedi, al biz ádemi oıyndardyń kýási bolamyz dep oılaımyn», - dep málimdedi Qazaqstan fýtbol federasııasynyń prezıdenti Seıdildá Baıshaqov.
Bul jazdyń basty sport sharasyna EXPO-2017 halyqaralyq kórmesiniń resmı saıtynan nemese kassalarynan bılet satyp alyp, qatysýǵa bolady. Quny – 2000 teńge. Bıletti onlaın satyp alý úshin tickets.expo2017astana.com saıtyna kirip, «Mádenı baǵdarlama» bólimine ótip, ózińiz tamashalaǵyńyz keletin oıyn kúni men stadıondaǵy sektordy tańdaý kerek. Fýtbol týrnıriniń bıletteri belgili bir oryndy emes, sektordy ǵana kórsetetinin aıta ketý qajet.
