Búginde elimiz óziniń áskerı áleýetin, qorǵanys qabiletin dúnıege tanytty. Osy maqsatta Qordaı aýdanynyń «Otar» 40-shy áskerı bazasynda halyqaralyq armııalyq oıyndardyń ashylý saltanaty ótti. Atalǵan sharaǵa Qazaqstan Respýblıkasynyń Qorǵanys mınıstri, general-polkovnık Sáken Jasuzaqov arnaıy kelip qatysty. «Armııalyq halyqaralyq oıyndardy ótkizý shynaıy jaýyngerlik baýyrlastyq pen adamı dostyqtyń negizi bolyp tabylady jáne Elbasy – Qazaqstan Respýblıkasy Qarýly Kúshteriniń Joǵarǵy Bas qolbasshysy tarapynan laıyqty qoldaý taýyp keledi. Armııalyq oıyndar kólemdi álemdik sporttyq birinshilikterden esh aıyrmasy joq halyqaralyq aýqymdaǵy iri is-shara. Biz úshin ony eń joǵary deńgeıde Qazaqstanda ótkizý úlken abyroı», dedi mınıstr óz sózinde.
Saltanatty sharada qazaqstandyq barabanshylar men dombyrashylardyń súıemeldeýimen Qazaqstan Respýblıkasy Qorǵanys mınıstrliginiń áskerı orkestri óner kórsetti. Sonymen qatar, «Arlan» brondy-dóńgelekti mashınalarynyń, «T-72 B» tankteriniń, jalpy qazirgi zamanǵy jaýyngerlik tehnıkalardyń da kórsetilimi boldy. Sondaı-aq, kópshilik nazaryna desantshylar rotasynyń oryndaýynda qarýmen qol jekpe-jegi urysynyń kórsetilimi usynyldy. Elimizdiń áskeriniń jaýyngerlik ushaqtary men tikushaqtary pılotajdyq tobynyń áýe shoýy armııalyq oıyndardyń ashylýynyń sharyqtaý shegi boldy. Armııalyq halyqaralyq oıyndar sheńberindegi «Artıllerııalyq atys sheberi», «Mergendik shebi» jáne «Ushqyshsyz ushý apparattary eseptoptarynyń jarysy» baıqaýlary Qazaqstanda 1-9 tamyz aralyǵynda ótetin bolady. Jarystarǵa qatysý úshin elimizge álemniń 18 elinen 400-ge jýyq áskerı qyzmetshi keldi. Áskerı qyzmetshiler 28 komandanyń quramynda óner kórsetetin bolady.
Hamıt ESAMAN,
«Egemen Qazaqstan»
Jambyl oblysy
