Prezıdenttiń aıtýynsha, byltyrdyń ózinde kommersııalyq kelisimderdiń jalpy quny shamamen 75 mlrd dollarǵa jetken. Sondyqtan qol qoıylǵan qujattardyń oryndalýyn sozbalańǵa salýǵa jol berilmeıdi.
«Jumysty sozbalańǵa salý jáne qol qoıylǵan kelisimderdi oryndamaý degen másele bolmaýǵa tıis. Bul jumysty oryndaýǵa Prezıdent Ákimshiligi de jaýapty», dedi Memleket basshysy.
Memleket basshysy: Inflıasııany oıǵa qonymdy deńgeıge túsirý qajet
Qasym-Jomart Toqaev joǵary deńgeıdegi kelissózderden keıin jumys qarqynynyń báseńdep ketetinin synǵa aldy. Onyń aıtýynsha, kelisimderge deıin belsendilik baıqalyp, odan keıin vedomstvolar arasyndaǵy bitpeıtin kelisý úderisteri bastalady.
«Úkimet meılinshe derbes bolýdy surady, derbestik berildi, endi is júzinde sony durys qoldanýy kerek. Mekemeler arasyndaǵy bitpeıtin ózara kelisý áreketin doǵarý kerek», dedi Prezıdent.
Toqaev: Dúnıe júzindegi ekonomıkalyq ahýalǵa qaramastan, byltyr ekonomıkamyz 6,5%-ǵa ósti
Memleket basshysy árbir kelisim aldyn ala sapaly daıyndalyp, oryndalý merzimi naqty aıqyndalýy tıis ekenin qadap aıtty. Nátıje úshin birinshi basshylarǵa jeke jaýapkershilik júkteletinin de atap ótti.
Prezıdent ınvestorlar aldyndaǵy mindettemelerdi tolyq oryndaý eldiń senimi men iskerlik bedelin qalyptastyratynyn aıtty. Onyń sózinshe, Úkimet Qazaqstannyń ınvestısııalyq áleýetin kóterip, básekelik artyqshylyqtaryn damytýǵa júıeli túrde kóńil bólýi tıis.
Prezıdent Úkimetke bıýdjet baǵdarlamalaryna revızııa júrgizýdi tapsyrdy
Sonymen qatar Memleket basshysy memleket pen jeke seriktestik tetiginiń múmkindikterine toqtaldy. Onyń pikirinshe, bul mehanızm ekonomıkaǵa ınvestısııa tartýdyń mańyzdy quraldarynyń biri sanalady.
«Memleket pen jeke seriktestik – ınvestısııalyq táýekeldi memleket pen bıznes arasynda tıimdi bólýge múmkindik beretin tetik. Biraq elimizde bul áleýet durys ıgerilmeı otyr», dedi Qasym-Jomart Toqaev.
Prezıdent ınfraqurylymdyq jobalardyń basym bóligi áli de tikeleı bıýdjet qarjysyna táýeldi ekenin, al jeke kapıtal, bank sektory men halyqaralyq qarjy uıymdarynyń qatysýy jetkiliksiz ekenin atap ótti. Bıýdjet múmkindiginiń shekteýliligi kóptegen ınvestısııalyq jobany iske asyrýǵa kedergi keltirip otyr.
Memleket basshysynyń aıtýynsha, memleket pen jeke seriktestiktiń de óz quny bar. Alaıda ol ózin-ózi aqtasa, Úkimet bul mehanızmdi belsendi qoldanýy kerek. Qajet bolǵan jaǵdaıda zańnamaǵa da tıisti ózgerister engizýge bolady.
Prezıdent Úkimetke ınvestısııalyq jobalardy iske asyrýda naqty nátıjege baǵyttalǵan, jaýapkershiligi aıqyn júıe qalyptastyrýdy tapsyrdy.
