– Qazir aýdan ortalyǵynda bir myń adam úı alý kezeginde tur. Elbasynyń sarabdal saıasatymen qabyldanǵan «Nurly jol», «Nurly jer», basqa da baǵdarlamalar eń aldymen qarapaıym halyqtyń áleýmettik máselelerin sheshýge arnalǵany belgili. Taǵy bir 60 páterli bes qabatty úıdiń qurylysyn salý jónindegi qujattar boıynsha jumystar atqarylyp jatyr. Borodıno aýylynda da eki páterli bes úıdiń qurylysy bastaldy. Eki qurylyspen de tanysasyzdar, – dedi aýdan ákimi Nurjan Toqseıitov.
60 páterli úıdiń qurylysy maýsymda bastaldy. Materıaldardyń barlyǵy osy óńirden. Kirpishti О́skemennen, sementti irgedegi Buqtyrmadan alýda. Demek, materıaldar baǵasy qoljetimdi. Munda 40 páter – eki, 20 páter úsh bólmeli. Kelesi jyldyń sońyna taman ǵımarat paıdalanýǵa berilmek.
Salynyp jatqan ǵımarat qalanyń 10-shy shaǵyn aýdanyna qaraıdy. Sondyqtan bolsa kerek, bul jerde nysandardy sýmen, jylýmen qamtamasyz etetin qubyrdy «Altynstroıproekt» seriktestigi salyp jatyr. Mańyzdy qurylystyń quny 618 mıllıon teńge, ótken jyldyń qarashasynda qurylysy bastalǵan keshen keler jyldyń qyrkúıeginde iske qosylýy tıis. Aýdandyq arhıtektýra jáne qurylys bóliminiń basshysy E.Qanapıev qalanyń órkendeýine yqpal etetin uzyndyǵy 6,3 shaqyrym qubyrdyń sapaly salynatynyna kámil senedi. Al aýdandyq jylý qazandyǵynyń qurylysyna «Nurly jer» baǵdarlamasy boıynsha 1 mıllıard 433,1 mıllıon teńge bólinip, nysan jyl sońynda paıdalanýǵa berilmek.
Aýdan basshylyǵy óńirdiń áleýeti artýy úshin kúsh salýda. Sonyń bir dáleli, «Nurly jer» baǵdarlamasy boıynsha Lomonosov jáne Shahtaqurylys kóshelerine asfalt tóseý úshin qyrýar qarjy kózin taýypty. Jańa baǵdarlamanyń bereri kóp, eń aldymen jyldar boıy úı alý kezeginde turǵan azamattardyń problemasyn sheshedi. Onyń ústine jekemenshik úı salýǵa tilek bildirgenderdiń ótinishi qabyldanyp jatyr. Qalaı degende de, óndirisi órkendegen kenshiler qalasynyń kelbeti kóz tartady. Elimizdegi jańa baǵdarlamalardan qarapaıym halyq úmit kútedi. «Úı bolsa, kúı bolady» degen maqaldyń ómirsheńdigi soǵan dálel bolsa kerek.
Ońdasyn ELÝBAI,
jýrnalıst
Shyǵys Qazaqstan oblysy,
Zyrıan aýdany
Sýretti túsirgen avtor
