Oblys ákiminiń orynbasary Ásem Núsipova bul jobanyń ásirese áli qandaı mamandyq tańdarlaryn bilmeı júrgen jastar úshin paıdasy zor ekendigin aıtady. «Aımaq basshysy Danıal Ahmetovtiń qoldaýymen 2017 oqý jylynda 100 tehnıkalyq mamandy daıarlap shyǵarý úshin bıýdjetten 200 mıllıon teńgeden astam qarajat bólinip otyr. Negizinen taý-ken, ken baıytý salalaryna qajetti mamandar ázirlenedi», - deıdi ol.
«Qazsınk» JShS-niń ákimshilik máseleler jónindegi atqarýshy dırektory Andreı Lazarev kásiporynǵa eń aldymen ken-baıytý jáne metallýrgııa salasynyń mamandary qajettigin jetkizdi. «Rıdder qalasynyń árbir besinshi turǵynynyń taǵdyry bizdiń óndirispen baılanysty. Sol sebepti keleshekte shahardy damytýǵa qatysty da oılarymyz bar. Eń bastysy – bul jerde Qazaqstannyń esh jerinde joq erekshe oqý ortalyǵy bar. Onda arnaıy jabdyqtalǵan kabınada otyrǵan oqýshy óz betimen júretin mashınany basqaryp, daǵdylanady. Qural-jabdyq shahtadaǵy is-qımyldardy tolyq qaıtalaıdy. Barlyq is-áreketter ekrannan 3D keskininde kóringendikten, stýdent ózin shahtada júrgendeı sezinedi. Sonyń nátıjesinde olarǵa keıin óndiriste jumys isteýge jeńil bolady», - deıdi A.Lazarev.
Kásiporyn ókiliniń sózine qaraǵanda, oqý ortalyǵynyń basty jetistigi – jas mamandardy óndiriste paıdalanylatyn barlyq jańa qural-jabdyqtarmen jumys isteýge úıretip shyǵarady. Qazirgi tańda óndiris qural-jabdyqtarynyń 90 paıyzy jańartylǵan.
Oblystyq bilim basqarmasynyń basshysy Nurgeldi Ábjaparovtyń aıtýynsha, 2017-2018 oqý jyldarynda oblysta kolledjderde bilim alýǵa alty myńnan astam memlekettik grant bólinipti. «Kazsınk» kásiporny bizdiń burynnan kele jatqan seriktesimiz. Barlyq granttardyń tórt jarym myńy jergilikti bıýdjetten, 1,7 oryn respýblıkalyq bıýdjetten qarjylandyrylady. Ústimizdegi oqý jylynda 210 bala «Serpin» baǵdarlamasymen mamandyq meńgerip shyǵatyn bolady. Atalmysh baǵdarlama boıynsha barlyǵy 400-den astam jas bilim alyp jatyr. Bitirip shyqqan 20 túlek qazir «Kazsınk» kásipornynyń Rıdderdegi óndiris oryndarynda jumys isteıdi», - deıdi basqarma basshysy.
Memorandým aıasynda bilim alyp shyqqan jastar tek «Qazsınk» kompanııasynda ǵana emes, sonymen qatar «Qazmınerals» sııaqty kásiporyndarda da jumys isteı alatyn bolady. Aldaǵy ýaqytta bul jobany О́skemen qalasynda júzege asyrý josparlanǵan.
Azamat QASYM,
«Egemen Qazaqstan»
Shyǵys Qazaqstan oblysy
Sýretti túsirgen - avtor
