Cýret: Alekseı Lýnın
Ol 2016 jyly startaptardyń ulttyq saıysyn jeńip alyp, ústimizdegi jyldyń sáýir aıynda Lozannada ótken Seedstars World báıgesine qatysýǵa múmkindik aldy. Atalmysh dodaǵa álemniń 65 eliniń úzdik jobalary qatysqan bolatyn. Smart Satu-dyń negizin salýshy Bolatbek Ospanov Forbes Kazakhstan saıtyna bergen suhbatynda az ýaqyt aralyǵynda jobany iske qosyp, ózge elderdi qalaı qyzyqtyrý kerektigin aıtyp berdi.
Bıznes-perishte
Eger Smart Satu jobasynyń negizin salýshyǵa taýar jetkizýmen aınalysatyn dıstrıbıýterlik kompanııada jumys isteý sáti buıyrmasa, bul joba iske aspas edi.
- Jumys barysynda men áriptesime satý agentteriniń kómegine júginbeı, arnaıy saıt ashýdy usyndym. Ol saıtqa tutynýshylardan tapsyrys kelip túsip, bizder soǵan qarap kerek-jaraqtardy dúkenderge jetkizip otyrar edik. Áriptesim usynysymdy qabyldamaı, úırengen ádis boıynsha jumysymyzdy jalǵastyrdyq. Keıinirek kompanııadan ketip, bos ýaqyt paıda bolǵan soń ıdeıam esime túsip, ony júzege asyrýmen aınalysa bastadym, - deıdi Bolatbek.
300 myń dollar kólemindegi tuńǵysh ınvestısııany perishte-ınvestor jasaǵan bolatyn.
- Qaǵaz júzinde ǵana turǵan jobaǵa qarajat tabý óte qıyn. Men 60 shaqty ınvestormen kezdesip, kelisim bermegen 59-yna alǵysymdy bildiremin. Olaı bolmasa, bizder jobamyzǵa jany ashıtyn naǵyz seriktesimizdi, óz ınvestorymyzdy kezdestirmeıtin edik. Bizdiń jobaǵa qarajat salǵannan keıin ol kisi óz oıynda aqshasymen qoshtasqan da bolý kerek. Biraq ol qomaqty somasyn qaıtarýdy emes, jobanyń sátti shyǵýyna jan salǵan edi, - dep esine alyp otyr Bolatbek.
Startappen aınalysqan jastar Tehnologııalyq damý jónindegi ulttyq agenttiktiń kómeginen sanaýly túrde bas tartty. Bir jyl buryn jobamen reseılik iri bank qyzyqqan bolatyn. Barlyq rásimder máresine taıaǵan kezde, kútpegen jerden qazaqstandyq kásipker jáne qoǵam qaıratkeri Marǵulan Seısembaev básekelesterdiń aldyn orap, jobaǵa 3,3 mıllıon dollar ınvestısııa quıady.
Bolatbektiń aıtýynsha, ol kezde tek iri sýpermarketterde ǵana tapsyrys berý prosesi avtomattandyrylǵan bolatyn. Al shaǵyn dúkenderge satýshy agentter aptasyna eki ret kelip, qajetti taýarlardy ákelip turdy. «Biz dál osy sektorǵa avtomattandyrylǵan júıeniń qajet ekenin túsinip, ózimiz aınalysýǵa sheshim qabyldadyq», - dedi Bolatbek.
- Tobymyz «aqyldy satylym» júıesi arqyly ónim berýshilerdiń shyǵynyn 3-5 paıyzǵa kemite alsaq, tutynýshylar kúndelikti taýardy ádettegi baǵadan arzan alady degen úmittemiz, - deıdi jobanyń negizin salýshy.
Ol bastapqy kezeńdegi qıyndyqtary týraly qysylmaı baıandap berdi. Adam balasy jańa nársege árdaıym senimsizdikpen qaraıtyndyqtan, talaı qyzyq oqıǵalarǵa kezikken. Biraq Bolatbek tuńǵysh tutynýshysyn áli kúnge deıin jyly sezimmen esine alady. Kespe jáne jarma satýmen aınalysatyn adam Smart Satu taýarlaryn tasymaldaý úshin eki kólik satyp alǵan eken. Sóıtip startaptyń alǵashqy tutynýshysy bolady.
- Bir úlken kompanııanyń basshysy álem avtomattaný júıesine kele jatqanyn sezinip, álemdik trendten qalǵysy kelmedi. Sóıtip, olar jobamyzǵa qarajat quıdy. Ýaqyt óte kele ózge de kompanııalar qyzyǵýshylyq tanyta bastady.
Dıstrıbýsııa naryǵynyń jumysy álem boıynsha birdeı dese bolady. Jáne Smart Satu – bul V2V-marketpleıs. Jáne bul júıe boıynsha Qazaqstan da, álem de burynnan jumys istep keledi.
Shaǵyn saýda oryndaryna arnalǵan bıznes
Bolatbektiń sózi boıynsha, onyń ónertabysynyń ózgesheligi bıznes-modelinde. Taýar jetkizýshi usynatyn taýarlar tizimi men qunyn júıeniń ishinde kórsetip, tapsyrys qabyldaıdy, keıin onyń jetkizilýin qamtamasyz etedi. Al dúken ıeleri men taýarmen aınalysatyndar qajetti ónimdi taýyp, tapsyrys berýge múmkindik alady. Jobany qoldanatyndarǵa Smart Satu júıesi ornatylǵan tegin planshet beriledi.
Qosymshaǵa tegin ınternet-trafıkti «Ksell» qamtamasyz etýde.
Qazirgi tańda Almaty boıynsha 1000-nan astam saýda oryndary osy júıege qosylǵan.
- Biz Qazkom bankimen birigý jobasyn iske asyryp jatyrmyz. Aldaǵy ýaqytta barlyq saýda oryndary, qonaq úıleri men meıramhanalar bank platformasy arqyly tólem jasaı alatyn bolady.
Jańa múmkindikter
Áleýmettik jelide jaryq kórgen suqbatymnan keıin Smart Satu tájirıbesin óz elderdiń naryǵynda damytýǵa Armenııa, Grýzııa jáne Indonezııa kásipkerleri qyzyǵýshylyq bildirdi. Búgin joba Reseıde keńinen qoldanys tabýda. Sonymen qatar, seriktester Bolgarııa, Saýd Arabııasy, Qyrǵyzstan. Belorýs elderinde jobany damytýda.
Smart Satu modelin keńeıtý boıynsha da úlken jumystar atqarylýda. Joba tamaqtaný salasynan basqa bıýtı-bıznesti de qolǵa alýda. Smart Satu-ǵa myńnan astam sulýlyq jáne spa-salondary tirkelgen.
Jobanyń negizin salýshy logıstıkany ońtaılandyrýǵa kóp kóńil bólýde. Qazaqstannyń «aqyldy satylymdary» Uber ádisi boıynsha jumys isteý kerek deıdi. Ár qalaǵan adam jańa kólik satyp alyp, Smart Satu qosymshasyn ornatyp, yńǵaıly marshrýt boıynsha tapsyrystardy oryndaý kerek. Seedstars World saıysy kezinde jobanyń jetekshileri Nestle men PepsiSo kompanııalarynyń ókilderimen kezdesken bolatyn. Sol arqyla Smart Satu jahandyq naryqqa shyǵýǵa yntaly ekendikterin kórsetti.
Marǵulan Seısembaevtyń quıǵan ınvestısııasynyń arqasynda jobanyń jetekshileri Almatydaǵy jumysty kúsheıtip, Máskeýde keńse ashyp qoıdy. Sonymen qatar, Belorýsııada Smart Satu Lab jobalaý keńsesin iske qosty.
- Eki jyl ishinde Smart Satu arqyly kóptegen tapsyrystar jasaldy.Sondyqtan júıede dıstrıbıýterler men ónim shyǵarýshylarǵa arnalǵan qundy aqparat jınaqtaldy. Mysaly, sút ónimderin shyǵaratyn kompanııa naryqtaǵy jaǵdaıyn zertteı alady.
Jobany shyǵarýshylardyń taǵy bir maqsaty - ónim shyǵarýshylar men dıstrıbıýterlerge araqashyqtyqqa qaramastan bir birimen seriktesýine yqpal etý. Smart Satu-dyń otandyq jáne reseılik naryqtaǵy sátti bastamasy - máskeýlik kásipkerlerge qazaqstandyq dıstrıbıýterlerdi taýyp, olardyń ónimderin Qazaqstan naryǵynda usynýǵa múmkindik týǵyzady.
Smart Satu elimizdiń 10 qalasynda jumys isteıdi. Soǵan qosa reseılik óńirlerde – Qıyr Shyǵys, Krasnodar óńiri, Samara oblysy men Karachaevo-Cherkessııada iske qosylýda.
- Búgin tipti EEO aıasynda kompanııalar kórshi elderden seriktester tabý úshin bıýrokratııadan kóz asha almaı, naryqqa shyǵa almaı jatyr. Bizder jobamyzdyń blokcheın platformasynda jumys istegenin qalaımyz. Bul bıznestiń damýyna oń yqpal etetini sózsiz. Kásipkerler senimdilik deńgeıi joǵary smart-kelisimder jasasatyn bolady.
Bolatbektiń oıynsha jınaqtalǵan úlken aqparat qory arqyly kórshi elderdiń naryǵyna shyǵýǵa jeńil bolady. Sheteldik áriptester analıtıkalyq aqparatqa toly, jumysy tekserilgen daıyn jobaǵa úlken qyzyǵýshylyq bildirý kerek deıdi Bolatbek.
- Biz adam ıdeıasynyń sheksiz ekendigin kórsetkimiz keledi. Jáne álemniń qaı elinde bolsyn júrgen Qazaqstan azamaty «Smart Satu» degen sózdi estigen kezde, bul jobanyń otanymyzda bastaý alǵanyn bilgenin qalaımyz.
Daıyndaǵan
Aıgúl ShERNIIаZ,
«Egemen Qazaqstan»
