Irikteý syny ótti, endi – fınal
Senbi kúni irikteý syny ótken. Qazaqstan jeńil atletıkasynyń basty úmiti Olga Rypakova birinshi múmkindiginde-aq 14,57 metrge qarǵyp, birden fınalǵa shyqty. Al basty básekelesterinen tek Kolýmbııa qyzy, Rıo Olımpıadasynyń chempıony Katrın Ibargýen de birinshi múmkindiginde fınalda baq synaý qurmetine ıe boldy. Biraq onyń kórsetkishi tómendeý bolyp shyqty (14, 21 metr ǵana). Qalǵandary ekinshi, tipti úshinshi múmkindikterinde irikteýden óte aldy.
Sońǵy aıda asa joǵary nátıje kórsete almaı júrgen Rypakova osylaı básekelesterinen asyp tústi. Bul oǵan psıhologııalyq turǵyda basymdyq bere me? Básekelesteri tańdanyp, údireıisip qalǵan joq pa?
– Jo-joq! O, ne degenińiz. Fınalǵa birinshi orynmen shyqqany psıhlogııalyq turǵyda eshqandaı da basymdyq bermeıdi. Barlyq báseke – alda. Irikteý synnyń aty – irikteý. Onda úsh-aq múmkindik beriledi. Jaza basyp, eki ret sekirý syzyǵyn basyp ketip, sodan keıin qobaljyp-tolqyp, durystap sekire almaı qalýlary múmkin. Sondyqtan tolqý basym bolady. Jaýapkershilik basyp turady. Al Olganyń birinshi múmkindigi óte sátti oryndaldy. Eń bastysy, qarǵý syzyǵyn basqan joq. Bıyl joǵary nátıje kórsetip júrgen úzdikterdiń, yǵaı men syǵaılardyń bári fınalǵa shyqty. Irikteý syny artta qaldy. Endi, fınal, – dep jaýap berdi bapker.
Chempıon bolýdan úmittiler az emes
Rıo Olımpıadasynyń chempıony, jasy 33-ten asqan Katrın Ibargýen «men úshinshi ret álem chempıony bolý úshin keldim, Rıodaǵy jeńisim tamasha, árıne, biraq men onymen toqtalyp qalǵym kelmeıdi» depti, IAAF saıtyna bergen suhbatynda.
Iá, ol 2013 jyly Máskeýde, 2015 jyly Beıjińde ótken álem chempıonattarynda altynmen aptalyp, jeńimpaz atanǵan. 2012 jyly London Olımpıadasynda kúmis júldeger atandy. Bıylǵy jylǵy eń úzdik kórsetkishi – 14,84 metr.
Al bıylǵy jylǵy eń úzdik kórsetkish Rıo Olımpıadasynyń kúmis júldegeri, Venesýela arýy Iýlımar Rohasqa tıesili – 14,96 metr. Biraq ol óziniń tek ekinshi múmkindigin de ǵana fınalǵa iriktelip shyqqanyna yrza emes. Psıhologııalyq turǵyda ysyla túsýi kerek ekendigin biletinin, erinbeı ter tógip júrgendigin tilge tıek etipti. Alaıda bıyl 21 qazanda 22-ge tolatyn qyz sóz joq, óte talantty.
Jalpy, Iаmaıkalyq qyz Kımberlı Ýılıams te, Portýgalııa úmiti Pastrısıa Mamona da, fınalǵa shyqqan basqalary da osal emes. Biraq bizdiń Olga – tájirıbeli, sabyrly sportshy. Bıylǵy eń úzdik kórsetkishi – 14,64 metr.
Aıtpaqshy, fınalda baq synaıtyn 12 qyzdyń tizimi – tómendegideı. Úshinshi baǵanda árqaısynyń 2017 jylǵy eń úzdik kórsetkishteri, al sońǵy baǵanda jeke rekordtary túzilgen:
