Baıqaýǵa bıyl 30-dan astam zaǵıp jan qatysýǵa nıet bildiripti. Onyń arasynan 14-i iriktelip, kelesi fınalǵa ótken. Festıval «Abaı shyǵarmalaryn jatqa aıtý, qara sózderinen, «Abaı joly» epopeıasynan úzindi oqý, álem tilderine aýdarylǵan shyǵarmalardy oqý sııaqty birneshe tapsyrmadan turady. Al jeńimpazdar qalalyq «Abaı oqýlary» sharasyna joldama alyp, baǵaly syılyqtarmen marapattalady.
«Bul festıvaldiń maqsaty – uly danyshpan, oıshyl Abaı Qunanbaevtyń 172 jyldyǵyna arnalǵan shara. Sol kisiniń ádebı-mádenı murasyn, memlekettik tilimizdi zaǵıp oqyrmandar arasynda keńinen nasıhattaý bolyp tabylady. Kelesi jyly qudaı qalasa, respýblıkalyq deńgeıde ótkizsek pe dep otyrmyz», - dedi zaǵıp jáne nashar kóretin azamattarǵa arnalǵan respýblıkalyq kitaphana dırektory Erlikbaı Álimqulov.
