Dástúrli deıtinimiz, jas veloshabandozdardyń basyn qosatyn jarys bıyl Shyǵys Qazaqstanda osymen 17-inshi márte uıymdastyrylyp otyr. Bilim jáne ǵylym mınıstrligi, velosport federasııasy men oblystyq bilim basqarmasynyń muryndyq bolýymen jalaýy jelbiregen saıysqa О́zbekstan memleketinen eki, elimizdiń ár aımaǵynan 16 komanda, uzyn sany 134 sportshy qatysyp, dúbirli dodanyń kórigin qyzdyrýda. «Halyqaralyq deńgeıdegi jarysqa qatysyp kele jatqanymyzǵa 16 jyl boldy. Shyǵys Qazaqstannyń taýly tabıǵaty sporttyń bul túrine óte qolaıly. Osy joly biz 11 júırigimizdi baptap alyp keldik. Olar – bizdiń eldiń chempıondary. Árıne, júldeli oryndar úshin talasqa túsemiz. Bul velobáıge kelesi jyly ótetin Azııa chempıonatyna irikteý desek te bolady», dedi kópkúndiktiń ashylý saltanatynda sóz alǵan О́zbekstan qurama komandasynyń jattyqtyrýshysy Ismaıldjon Karımov.
Jarystyń ashylý saltanatynan soń veloshabandozdar uzyndyǵy 64 shaqyrymdy quraıtyn Samar tas jolyn betke alyp, júrip ketti. On úshinshi tamyzǵa deıin jalǵasatyn báseke aıasynda oqýshylar 7 baǵyt boıynsha oblystyń ár aýmaǵynda baǵy men babyn baıqap kóretin bolady.
Erekshe atap óter jaıt, jarys bastalardan bir kún buryn osyndaı dúbirli dodalarǵa kezinde ózi de qatysqan, áli de ara-tura shaıtan arba tebýge ýaqyt taýyp júretin oblys ákimi Danıal Ahmetov saıysqa saılanyp kelgen úzdik 30 veloshabandozben birge 25 shaqyrymǵa jýyq jerdi júrip ótti. «Qazaqstan oqýshysy-2017» velojarysynyń mańyzy zor. Mundaı saıystar jas urpaqtyń shymyr da qaıratty, deniniń saý bolyp ósýine úlken áserin tıgizedi. Bul jarysqa kezinde ózim de birneshe márte qatysqanmyn, qazir mine balǵyn sportshylarmen birge birneshe shaqyrymdy basyp óttim. Deńgeıi joǵary sporttyq sharaǵa О́zbekstan komandasynyń da qatysyp jatqanyna qýanyshtymyz. Dúbirli dodada barlyq veloshabandozdarǵa tek sáttilik tileımin», − deıdi bir mezet kastıýmin sporttyq formamen almastyryp, jastarǵa úlgi kórsetken aımaq basshysy.
Azamat QASYM,
«Egemen Qazaqstan»
О́SKEMEN
