– Iá, Shámshi Qaldaıaqov atyndaǵy baıqaý ótken 1992 jyldyń 13 qyrkúıegi áli esimde. Ol kez mádenıet salasyndaǵy eń qıyn jyldar ǵoı, – dep eske alady Qurman Shoıynbaev. – Biraq osyndaı qıyndyqtarǵa qaramastan elimizdiń túkpir-túkpirinen 200-den astam ánshi, sazgerler baq synady. Qazylar alqasynyń quramynda Roza Baǵlanova, Zeınep Qoıshybaeva, Áset Beıseýov, Myńjasar Mańǵytaev sııaqty qazaq óneriniń qaımaqtary otyrdy. Aqtyq synda baıqaýdyń Gran-prıi maǵan berildi. Birinshi oryndy Shákızada ıelendi.
Shámshi Qaldaıaqov atyndaǵy baıqaý-festıval kóptegen ónerpazdyń tusaýyn kesip, úlken sahnaǵa joldama berdi. «Biz baıqaýdyń birinshi jeńimpazy atansaq, búginde ónerimen, darynymen elge tanymal bolyp júrgen ánshilerdiń birqatary osy baıqaýda synalyp, kásipqoı atandy. Onyń ishinde, ózim ustazdyq etip júrgen M.Áýezov atyndaǵy OQMÝ túlekteri de az emes. Mysaly, Mamadııar Taýkeev, Hadısha Seıitova, búginde jastarǵa ǵana emes, búkil ánsúıer qaýymǵa jaqsy tanymal «Jigitter» toby ár jyldary Sh.Qaldaıaqov atyndaǵy halyqaralyq ánshiler baıqaýynyń laýreaty, dıplomanttary atanǵan bolatyn. Mine, osyndaı talanttarǵa baǵyt-baǵdar berip, tusaýyn kesken, elge tanymal júzdegen óner juldyzdaryn tárbıelep shyǵarǵan ýnıversıtettiń rektory Jumahan Myrhalyqov «Mýzykalyq óner» kafedrasynyń zaman talabyna saı jabdyqtalýyna, oqytýshylar quramynyń kásibı deńgeıiniń joǵary bolýyna erekshe kóńil bólip keledi. Jalpy, kafedra túlekteri búginde elimizdiń barlyq oblysynda qyzmet atqaryp júr. Maqtanarlyq, úlgi eterlik túlekterimiz, stýdentterimiz kóp», – deıdi Qazaqstan Respýblıkasynyń eńbek sińirgen ártisi Qurman Shoıynbaev.
Ánshi dástúrli baıqaý-festıval bıyl da nebir jas talaptyń baǵyn ashatynyna senimdi. Sonaý bir qıyn kezeńde ánshi esimin elge tanyta túsken baıqaýdyń deńgeıi búginde anaǵurlym joǵarylaǵan. Halyqaralyq deńgeıge jetken. Jeńimpazdarǵa beriletin syılyq ta qomaqty. Árıne eńbek ádil baǵalanýymen de qundy. Bul oraıda búginde M.Áýezov atyndaǵy OQMÝ-de shákirtterin ónerge baýlyp júrgen Q.Shoıynbaevtyń keremet daýysyn ilgeride Elbasy N.Á.Nazarbaev joǵary baǵalap, qurmet kórsetken eken. Ánshi Elbasynyń aldynda onshaqty ret án aıtypty. «Meniń Qazaqstan Respýblıkasynyń eńbek sińirgen ártisi ataǵyn alýyma tikeleı Elbasynyń ózi sebepker boldy. Umytpasam, 1992 jyldyń shildesi edi. Elbasy sol kezdegi О́zbekstan prezıdenti Islam Karımov ekeýi Ońtústik jerinde kezdesti. Aldymen Túrkistanǵa bardy. Odan keıin Shardarany aralaıtyn boldy. Ońtústiktiń bir top ónerpazy keshki mezgilde Prezıdentter aldynda ónerimizdi kórsettik. Dastarqan basynda resmı azamattar otyrdy. Elbasy óleń aıtyp turǵan meniń jáne qasymdaǵy búginde marqum bolyp ketken dombyrashy Málik Ábish ekeýmizdiń ónerimizge tánti bolsa kerek. Ol qasynda otyrǵan osy salaǵa jaýapty basshylardan «bul jigitterdiń ataǵy bar ma?» dep surapty. Sodan erteńine Málik Ábish ekeýmizdi dereý sýretke túsirip, qujattarymyzdy Almatyǵa jiberdi. Bir aıdan keıin, dáliregi 13 tamyzda ekeýmizge Qazaqstan Respýblıkasynyń eńbek sińirgen ártisi ataǵy berildi. Bul ataqtyń men úshin orny bólek», – deıdi ánshi ótken kúnderdi eske alyp.
Ǵalymjan ELShIBAI,
«Egemen Qazaqstan»
Ońtústik Qazaqstan oblysy
