ETNOSARALYQ JANJALǴA JOL BERILMEIDI

Ishki ister mınıstrliginiń baspasóz qyzmeti jurtshylyqty ultaralyq negizde janjal týǵyzýdy kózdegen bir qylmys­tyq is týraly habardar etti. Atap aıtqanda, elimizdegi qalalardyń birinde úılerdiń qabyrǵalary men qorshaýlarǵa qazaq halqynyń qadir-qasıetin qorlaıtyn jazýlar jazylyp, onyń avtorlary basqa etnos ókilderiniń atynan jazylǵandaı áreket tanytqan. Osy is boıynsha “Arman” qoǵamdyq qozǵalysynyń jaqtas­tary Borambaev, Jýasbaı jáne Jalǵabaev ustalǵan. Bul rette ustalǵan Jalǵabaevtyń Mańǵys­taý oblysynda jasaǵan alaıaq­tyǵy úshin memleketaralyq izdeý­de ekendigin aıta keteıik. Ustalǵandardyń kórsetý­leri­nen jańaǵy jazýlardyń túrli ult ókilderiniń arasynda ulttyq negizde qaqtyǵys uıymdastyrý maqsatymen ádeıi jazylǵany anyqtalǵan. Qazaqstan Respýblıkasynyń Konstıtýsııasy men elimizdiń zańnamasy boıynsha áleýmettik alaýyzdyq, ulttyq, násildik neme­se dinı óshpendilik týǵyzý asa aýyr qylmystardyń biri bolyp tabylady jáne ol úshin bas bostandyǵynan aıyrý túrin­de qylmystyq jaýapkershi­lik kózdeledi. Qazirgi kezde jazýlarǵa bir­qatar saraptama júrgizilip, so­nyń negizinde ustalǵandarǵa qatys­ty qylmystyq is qozǵaý týraly másele sheshilýde. Ishki ister mınıstrligi mun­daı áreketterge aldaǵy kezde de qatań tyıym salynatynyn, al kináliler zańnyń búkil qatal­dy­ǵy boıynsha jazalanatynyn resmı málimdeıdi.