Búgingi tańda oblysta egin orý naýqany, masaqty dándi daqyldar ónimin jınaý jumystary aıaqtalýǵa jaqyn. Oblys ákimdiginiń málimeti boıynsha, osy ýaqytqa deıin egin alqaptarynan 542,2 tonna astyq jınaqtalyp, óńir boıynsha ortasha ónimdilik kórsetkishi gektaryna 23,1 sentnerdi qurap otyr. Bıylǵy jyly oblys boıynsha aýylsharýashylyq daqyldarynyń egistik alqaby 623,3 myń gektarǵa deıin jetip, byltyrǵy jyldyń osy mezgilimen salystyrǵanda 29,8 myń gektarǵa artqandyǵyn aıtýǵa bolady. Esepti aralyqta egin orý naýqany Baızaq, Jambyl, Moıynqum, Sarysý jáne Talas aýdandarynda tolyq aıaqtaldy. Al qalǵan aýdandarda jalǵasý ústinde.
– Bıylǵy jyly masaqty dándi daqyldar 257 myń 867 gektarǵa ornalastyryldy. Qazirgi tańda 247 myń 660 gektar jer orylyp bitti. Naqty kórsetkish boıynsha 96 paıyz jınaldy. Sonymen qatar, sharýalar jańa tehnıkamen de qamtamasyz etildi. Máselen, Merki aýdanyna − 7, al T.Rysqulov aýdanyna 13 tehnıka alyndy. Sondaı-aq, óńirde qant qyzylshasyn egý de qarqyndy qolǵa alynyp keledi. Aıtalyq, ótken jyly Merki qant zaýytyna 100 myń tonna qant ótkizsek, bıyl bul kórsetkishti 170-180 myń tonnaǵa deıin ulǵaıtý josparda bar, – deıdi Jambyl oblysy ákiminiń orynbasary Máden Musaev.
Al aǵymdaǵy jyly Qordaı jáne T.Rysqulov aýdandarynda astyq jınaý naýqanynyń jemisti maýsymy byltyrǵydan bólek bolyp otyr. Onda gektarynan 23,5 sentnerden astam astyq óniminiń alynǵany da óńirdegi naýqannyń qyza túskenin kórsetedi. Sondaı-aq, egin orý naýqanynda kóshbasshy aýdandardyń qataryn Merki jáne Shý aýdandary bastap tur. Al egin jınaý jumystaryna oblys boıynsha barlyǵy 911 astyq orý kombaınynyń 701-i qatysýda. Bul rette jer ıgerý máselesiniń oń sheshim tapqanyn kórýge bolady. Al Úkimet tarapynan aýylsharýashylyq taýar óndirýshilerin qoldaý maqsatynda jazǵy-kúzgi dala jumystaryna 15,0 myń tonna arzandatylǵan dızel otyny bólinip, bul turǵyda barlyq múmkindik qarastyrylǵanyn aıta ketý kerek. Shilde aıyna bólingen janarmaı kóleminiń 4965 tonnasy jetkizilip, aýylsharýashylyq taýar óndirýshilerine 2115 tonnadan astamy taratylǵan. Sondaı-aq, janarmaı qoımalarynda 2850 tonnaǵa jaqyn dızel otyny saqtalýda. Taǵy bir aıta keterligi, oblys boıynsha egin oraǵy jáne kúzgi dala jumystary óz deńgeıinde jáne josparly túrde júrgizilip keledi.
Hamıt ESAMAN,
«Egemen Qazaqstan»
Jambyl oblysy
