Ras, qazir joǵary jáne jergilikti atqarýshy organdarǵa úı turǵyzyp ber dep mindetsinetin kez emes. Qandaı jaǵdaıda da baspana máselesin aıaq-qoldary balǵadaı otbasy músheleri birinshi kezekte ózderi sheshýge múddeli bolýǵa tıisti ekendigi eshqandaı talas týǵyzbaıdy. Al olarǵa sol bılik ókilderi tarapynan úı turǵyzý úshin qajetti alǵysharttar jasalsa, bul bólek bir áńgimeniń sybaǵasy.
Osy oraıda Aqtóbe qalalyq jáne Aqtóbe oblystyq ákimdikteri tarapynan sý tasqynynan zardap shekken turǵyndarǵa jer telimderi bólingeni aldyńǵy pikirimizdiń bir dáleli bola alady degen oıdamyz. Mundaı «batpan quıryqqa» ıe bolǵandardyń basym bóligin Qýraıly aýylynda turyp kelgen otbasylar quraıdy. Olarǵa ákimdikter tarapynan qarastyrylǵan qoldaýlar tek munymen shektelmeıdi. Iаǵnı, jer telimderine qosa úıleri sýǵa ketken otbasylardyń árqaısysyna «Qolǵanat Aqtóbe» qory arqyly 1 mıllıon teńge kóleminde qarajat berilgen. Boı kótergen jekemenshik turǵyn úı qurylystaryn elektr qýatyna jalǵaý, aýyz sýmen jáne tabıǵı gazben qamtý jumystary bıýdjettik jáne ınvestısııalyq qarajattar esebinen júrgizilip jatqanyn eskersek, atqarýshy organdardyń zardap shegýshilerge tıgizgen shapaǵaty tereńdeı túsedi.
Taǵy bir aıtarymyz, tasqyn sýǵa tap bolǵandardyń arasynda múgedekter men kóp balaly otbasylar jáne bıýdjettik sala qyzmetkerleri de bar bolatyn. Azamattardyń mundaı toptarynyń óz kúshterimen bas-pana turǵyzýǵa múmkindikteri bola bermeıtini de belgili jaıt. Olarǵa shaǵyn otbasylyq jataqhanalardan tıisti páterler berilgen. Múmkindigi shekteýli jandardyń belgili bir tobyna oblys ortalyǵynan páter kiltteri tabys etilse, ekinshi bireýlerine aýdandardan úıler usynyldy. Sonymen birge, demeýshiler men jumys berýshiler esebinen baspanaly bolǵandar da bar. Tabıǵı apattan zardap shegýshilerdiń kelesi bir legi satyp alý quqyǵymen beriletin jaldamaly páterlerge ıe boldy.
Osy mysaldardan tasqyn sýdan júzderi shaılyǵyp qalǵandardy baspanamen qamtýdyń barlyq tásilderi men múmkindikteri paıdalanylyp otyrǵanyn kóremiz. Sonymen birge bıylǵy kóktemde Aqtóbe qalasy tusynda bolǵan tabıǵı apat kóptegen keleńsizdikter men zańsyzdyqtardyń betin ashyp bergenin aıtpaı ketsek, shyndyqqa kireýke túsirip alarmyz. Bul sý qorǵaý aýmaǵynda birqatar nysandardyń qurylys normalaryn belinen basa otyryp salynǵany desek, aqıqattan alshaq ketpeımiz.
Munyń ózi óńirdegi qurylys salýǵa ruqsat pen lısenzııa beretin jergilikti memlekettik organdar úshin de ashy sabaq bolyp qalatyny anyq. Keshegi bir kúnderi «Aqtóbe aqparat» aqparattyq ortalyǵy kóktem kezinde tasqyn sý basyp qalǵan aımaqta baý-baqsha ujymdary men seriktestikterin qosa alǵanda 907 qurylys ǵımaraty bolǵany jóninde derek taratty. Olardyń málimdeýinshe, arnaıy qurylǵan komıssııa sol nysandardyń bári birdeı zańdy túrde turǵyzylmaǵanyn aıqyndap beripti. Sondyqtan da atalǵan komıssııa músheleri sýǵa ketken qurylymdardyń belgili bir bóligin qalpyna keltirýdiń qajeti joq degen qorytyndyǵa kelip otyrǵan kórinedi.
Sóz sońynda taǵy bir ańǵaldyq pen kereǵarlyqtyń túp-tórkinine úńile ketýdiń qajettiligi týyndap otyr. Munyń ózi birqatar azamattardyń jekemenshik baspana turǵyzýǵa nemese tasqyn sýdyń saldarynan búlingen úıine kúrdeli jóndeý júrgizýge quqyq berýshi qujattarynyń joqtyǵynan nemese tasqyn sý kezinde joǵalyp sýǵa aǵyp ketkeninen týyndaıdy.
Áıteýir kóńilge medeý tutarlyq másele osy jaǵymsyz jaıtty eskergen jergilikti atqarýshy organdar «Qolǵanat Aqtóbe» qoǵamdyq qory arqyly olarǵa materıaldyq kómek kórsetý jóninde sheshim qabyldapty. Sonyń nátıjesinde 585 otbasyǵa jalpy somasy 61,6 mıllıon teńge kóleminde materıaldyq qoldaý jasalǵan.
Temir QUSAIYN,
«Egemen Qazaqstan»
AQTО́BE
