Astanadaǵy halyqaralyq kórme ınvestorlar men kásipkerler arasyndaǵy altyn kópir dep baǵa bergen ol óz elinde sýdan energııa alý jaqsy jolǵa qoıylǵanyn áńgimeledi.
«Kenııa 10 000 MVt quraıtyn geotermaldy resýrstarǵa ıe, osy ýaqytqa deıin onyń 632 MVt kádege jaraǵan. Onda ornatylǵan elektr energııasynyń qýaty 2 341 MVt quraıdy. Onyń ishinde sý energetıkasyna 36 paıyz, termaldy energııaǵa 35 paıyz, geotermaldy energııaǵa 28 paıyz jáne jel energetıkasyna 1 paıyz tıesili. Sondaı-aq, biz jel, geotermaldy, kún jáne sý energetıkasy sııaqty jańǵyrmaly qýat kózderiniń birqatar resýrstaryna ıemiz. Sý energetıkasynan ózge energııa kózderi tolyq qoldanylmaǵan. Atalǵan resýrstardy engizý jáne óńdeý ınvestısııalyq múmkindiktermen qamtamasyz etiledi», dedi Krıs Kaptoo. Onyń sózinshe, EKSPO-2017 kórmesine qatysý jańǵyrmaly energııa kózderiniń damýyna oń nátıje beredi jáne eki el men ózge de qatysýshy memleketter arasynda yntymaqtastyq qarym-qatynastardy jetildirýge tyń serpin bolady.
Jıynda Qazaqstan Respýblıkasy Bilim jáne ǵylym mınıstrliginiń jaýapty hatshysy Aryn Orsarıev halyqaralyq mamandandyrylǵan kórmeniń «Bolashaq energııasy» taqyryby zamanaýı álem úshin ózekti ári mańyzdy ekendigin tilge tıek etti. «Kenııanyń EKSPO-2017 kórmesine qatysýy qos taraptyń ózara senim deńgeıin kórsetedi. Qazaqstan Kenııa elimen saýda-ekonomıkalyq baılanystardy keńeıtýge múddeli. Memlekettiń ulttyq kúni ekijaqty qarym-qatynasty nyǵaıtýda jańa múmkindikter ashatyndyǵyna kámil senemin», dedi ol.
Ashat RAIQUL, sýretterdi túsirgen Orynbaı Balmurat, «Egemen Qazaqstan»
