Sońǵy jyldary Qostanaıda sportqa degen yqylas erekshe. Ol tek turǵyndar tarapynan ǵana emes, olardyń jappaı sportpen aınalysýyna jasalǵan jaǵdaıdan da kórinip otyr. Qostanaıdaǵy ortalyq stadıonnyń jóndelip, jańǵyrtylýy, fýtbol alańdarynyń ashylýy, sport klýbtarynyń paıda bolýy sonyń aıqyn kórinisi. Bıyl qadasy qaǵylǵanyna 60 jyl tolǵan kenshiler qalasy – Rýdnyı spartakıada mekenine aınalǵandaı edi. Sporttyq shara kenshiler qalasynyń mereıtoıyn odan saıyn saltanattandyra tústi. Úsh kún boıy ótken jarystar rýdnyılyqtardyń qýanyshyna qýanysh qosyp, tamasha demalys syılady.
Spartakıada – myqtylardy anyqtaıtyn shara, kúshtiler ustahanasy. Jyl boıy oblysta barlyq deńgeıde ótken jarystarǵa 48 myń sportshy qatysty. Solardyń júzden júırikteri oblystyq spartakıadaǵa joldama aldy. Jaqsy istiń artynda da jaqsy iz qalady. Osy spartakıada men toıdyń aldynda Rýdnyı qalasyndaǵy eń úlken «Gornıak» stadıon-kesheni qaıta jóndelip, jańǵyrtyldy. Sonda jurtshylyq spartakıadanyń ashylý, jabylý saltanattaryn, sporttyń fýtbol, voleıbol, basketbol, jeńil atletıka sekildi buqaralyq túrlerinen jarystar qyzyǵyn tamashalady. Rýdnyı tek kenimen, kenshilerimen ǵana dańqty emes, sportshylarymen de elge, odan da tys jerlerge dabysy jetken qala. Rýdnyılyq ataqty shańǵyshy Ivan Garanın de, qos Olımpıadanyń qola júldegeri, ataqty boksshy Ivan Dychko da talaı-talaı oblystyq jarystarda shyńdalǵan bolatyn. Osy joly sporttyq mereke alaýyn jaǵý qurmeti sport aqsaqaly Ivan Garanınge tıdi. Ol spartakıadanyń aldynda ǵana óziniń egde jasyna qaramastan, qazaqstandyq shańǵy-roller chempıonatynan altyn medalmen oralǵan edi. Ivan Garanın tek kenshiler qalasynyń ǵana emes, elimizdiń sport maqtanyshtarynyń biri, sportshy jastardyń úlgisi.
– Ár jas sportqa, ár sportshy jeńiske umtylýy tıis, – deıdi Ivan Ivanovıch.
Rýdnyı qalasyndaǵy spartakıadaǵa oblystyń barlyq shalǵaıynan 20 komanda, júzdegen sportshy jınaldy, sporttyń 18 túrinen báseke baıraǵy kóterildi. Spartakıada kóbine buqaralyq sport jarystarynan ótetin bolǵandyqtan, komandalarda gir kóterý sporty shet qalmapty. Olardyń arasynda oblystaǵy gir kóterý sporty myqtylarynyń biri Ilıa Kangash ta boldy. Ol jaqynda ǵana osy sport túrinen álem chempıonatyna qatysyp, kúmis medalmen oralǵan edi.
– Sportty on jasymnan serik etip kelemin, alǵashqyda hokkeıdi unattym, keıinirek gir kóterýge aýystym. Spartakıadaǵa tórtinshi ret qatysyp otyrmyn, bul jarys myqtylardyń ósýine múmkindik beredi, – deıdi Ilıa.
Rýdnyı qalasynyń 60 jyldyq mereıtoıy men spartakıada qatar ótip, birin biri tolyqtyrdy. Úsh kún boıy kenshiler men qala qonaqtary sporttyń túr-túrinen ótken jarystar qyzyǵyn tamashalady. Spartakıadanyń jabylý saltanatynda jeńimpazdar marapattaldy. Komandalyq esepte birinshi oryndy Qostanaı qalasynyń sportshylary, ekinshi oryndy rýdnyılyqtar, úshinshi oryndy Qostanaı aýdany ıelendi. Jarystyń aty – jarys, onda júırikter anyqtalady. Biraq jaz qyzyǵyn ústemeleı túsetin dúbirli sharada sport, jastyq, densaýlyq, salamatty ómir saltyna bas ıgen ár qostanaılyq jeńiske jetti.
Názıra JÁRIMBET,
«Egemen Qazaqstan»
Qostanaı oblysy,
Rýdnyı qalasy
