«Bizde resmı túrde turaqty turatyn 1 mıllıon on myń adam tirkelgen, ýaqytsha tirkeýde turǵandar sany 205 myń adam. Bizdiń esebimiz boıynsha, qazir qalada mıllıon júz myń – mıllıon júz elý myń adam turyp jatyr», - dedi Áset Isekeshev oblystyq máslıhattyń sessııasynda.
Ákimniń aıtýynsha, halyq sanyn anyqtaýǵa ýaqytsha tirkeý prosedýrasynyń arqasynada qol jetkizilgen.
«Kópshilik 1 jyldyń ishinde 860 myń bolǵan turǵyndar sany qalaı mıllıonǵa jetti dep tańdanǵan bolatyn. Shyn máninde, kóptegen adam bul jerde tirkelmegen eken. Olar osy kúnge deıin Jambyl, Petropavl, Qaraǵandyda tirkeýde turǵan. Úkimetpen bekitilgen ýaqytsha tirkeýge turǵyzý máselesi bizge turǵyndar sanynyń naqty qansha ekenin anyqtaýǵa jol ashty», - dedi ol.
Astana ákimi halyqtyń mundaı tyǵyzdyǵy mektep, aýrýhana, qoǵamdyq kólikterde júktemeni kóbeıtetinin aıtyp, osyǵan baılanysty Astanada eki mıllıon halyqqa arnalǵan josparlar ázirlenetinin jetkizdi.
«Biz TMD-daǵy alǵashqylardyń biri bolyp London, Dýbaı, Sıngapýr, Abý-Dabı sııaqty qalalarda qoldanylatyn keshendi damytý josparyn ázirleımiz. Ol halyqaralyq standarttarǵa sáıkes eki mıllıon turǵynǵa arnalyp jasalady», - dedi Isekeshev.
«Damý-josparynyń maqsaty – qoǵamdyq keńistikte der kezinde keshendi ınfraqurylymdy damytý, qoǵamdyq kólikter, mektep, aýrýhana, turǵyn úı keshenderi men saıabaqtardyń damýyn qamtamasyz etý, jeti josparlaý ortalyqty damytý. Iаǵnı polıortalyqty damý modeline kóshý», - dedi ákim.
Aıta keteıik Astananyń mıllıonynshy turǵyny 2016 jyly shildede dúnıege kelgen bolatyn. Mıllıonynshy bolyp týǵan náresteni Áset Isekeshev quttyqtap, páter kiltin tabys etti.
