Shilde aıynda Astana qalasyndaǵy Qarýly Kúshter áskerı-tarıhı mýzeıinde uıymdastyrylǵan Almaty oblysy ólketaný kórmesiniń sóresine qoıylǵan zattar arasynda joǵarydaǵy Shyńǵys tórege qatysty eksponattar da jetkizilipti.
Sonyń biri – tóreniń kúmis tostaǵan-tabaǵy. Bul zatty kezinde belgili arhıtektor Arystan Qaınarbaev Almatydaǵy Ortalyq mýzeı qoryna tapsyrǵan kórinedi. Al jádigerdiń qujatynda tostaǵannyń aqy-ıesi retinde Shota Ydyrysulynyń esimi atalǵan. Elimizge eńbek sińirgen sáýletshi Shota aǵamyz bolsa, Shoqannyń týǵan inisi Maqynyń balasy Ydyrystyń uly. Maqy (Maqajan) óte sheber sýretshi bolǵan.
Myna sýrette turǵan tostaǵannyń qasyndaǵy kúmis qasyq pen tuz untaqtaıtyn qural da Shyńǵys tóre qoldanǵan buıymdar eken. Bul jádigerler 1960 jyly Shota Ydyrysulynan alynǵan. Qujatta kúmis qasyq pen tuz untaqtaıtyn quraldy saqtaǵan adam Makın Edrıs (Maqın Ydyrys) delingen. Qysqasy bul zattardy mýzeıge tapsyrǵan tóreniń óz urpaqtary.
Shyńǵys tóreniń ózi de Omby áskerı ýchılıshesinde bilim alǵan kózi qaraqty adam. Ol óz zamanynda reseılik ǵalym-saıahatshylarmen jaqyn qarym-qatynas ornatyp, Orys geografııalyq qoǵamyna qazaq halqy jóninde kóp málimet bergen jáne el ishindegi qundy jádigerlerdi jınap-saqtaǵan. Tipti keıbir baǵaly buıymdardy Peterborda ótken shyǵystanýshylardyń III kongresine joldap, kórmege qoıdyrǵan. Osy zattardyń jurnaǵy qazir Sankt-Peterbýrg, Máskeý, Omby jáne Gambýrg mýzeılerinde saqtaýly. Al joǵarydaǵy jádiger bolsa Shoqan Ýálıhanovtyń «Altynemel» memlekettik memorıaldy mýzeıi qorynda tur.
Beken QAIRATULY,
«Egemen Qazaqstan»
Sýretti túsirgen
Orynbaı BALMURAT
«Egemen Qazaqstan»
