«Qarashyǵanaq Petrolıým Opereıtıng B.V» (KPO) kompanııasy 16 qyrkúıekte Aqsaı qalasynda qurylysy aımaqtyń áleýmettik ınfraqurylymyn damytý jónindegi baǵdarlama aıasynda júzege asqan dene shynyqtyrý-saýyqtyrý kesheni tabysty iske qosylǵany týraly málimdedi.
Ashylý saltanatyna Batys Qazaqstan oblysynyń ákimi Altaı Kólginov, Bórli aýdanynyń ákimi Aldııar Halelov, KPO bas dırektory Renato Marolı, merdiger uıymdar men qaýymdastyq ókilderi qatysty.
О́z sózinde KPO bas dırektory Renato Marolı jańa sport nysanynyń ashylýymen Aqsaıdyń barlyq turǵyndaryn quttyqtaı kele, onyń qurylysy KPO men Batys Qazaqstan oblysynyń basshylyǵy arasynda qalyptasqan jemisti yntymaqtastyq pen seriktestik qarym-qatynastyń arqasynda salynǵanyn atap ótti.
Onyń aıtýynsha, KPO nysanyn iske qosý aıtýly kúnderge: Qarashyǵanaq ónimin bólý týraly túpkilikti kelisimge (О́BTK) qol qoıýdyń 20 jyldyǵy jáne Bórli aýdanynyń ákimshilik ortalyǵy men biregeı Qarashyǵanaq munaı-gaz kondensaty ken ornynyń ortalyǵy – Aqsaı qalasynyń 50 jyldyǵyna oraılastyrylǵan.
«Osy keshen Aqsaı turǵyndarynyń densaýlyǵyn túzeýge jáne bos ýaqytynda sportpen shuǵyldanýǵa arnalǵan tanymal ortalyqqa aınalady dep úmittenemiz, – dedi Renato Marolı. – Turaqty damý jáne áleýmettik-jaýapty seriktestikti qoldap kele jatqan KPO kompanııasy Batys Qazaqstan oblysy men jalpy Qazaqstan turǵyndarynyń ıgiligi úshin jańa belesterdi baǵyndyratyn bolady».
Dene shynyqtyrý-saýyqtyrý kesheniniń jalpy aýdany 4,6 gektardy quraıdy jáne Aqsaı qalasynyń ortalyq bóligindegi úsh qabatty ǵımaratta ornalasqan.
Keshenniń ózi fýtbol alańynan, 1200 oryndyq trıbýnadan jáne júgirý jolynan, sondaı-aq basketbol, voleıbol, tennıs, ıadro laqtyrý men súńgi atýǵa arnalǵan ashyq alańdardan, bokspen shuǵyldanatyn zaldardan turady. Joba aıasynda jalpy abattandyrý jáne keshen aýmaǵyn kógaldandyrý jumystary júrgizildi.
Batys Qazaqstan oblysynyń ákimi Altaı Kólginov óz sózinde «Memleket basshysy Nursultan Nazarbaev jastar arasynda salamatty ómir saltyn nasıhattaýdyń, sondaı-aq joǵary jetistikterge jetkizetin sportty damytýmen qatar, turǵyndardyń dene shynyqtyrý jáne sportpen belsendi shuǵyldanýyna arnalǵan qajetti jaǵdaılardyń barlyǵyn jasaýdyń aıryqsha mańyzdylyǵyn atap ótti. Sondyqtan sport ómirimizdiń negizi, óskeleń urpaq úshin de negiz bolýǵa tıis. Búgingi jańa dene shynyqtyrý-saýyqtyrý kesheniniń ashylýy – kásibı sportshylar úshin de, sportty súıetin áýesqoılar úshin de aıtýly oqıǵa», dedi.
Sondaı-aq ol: «Qala turǵyndary bul keshenniń laıyqty baǵasyn beredi jáne osyndaı nysandar bizde taǵy da paıda bolatynyna senimdimin, mundaı nysandar qazirgi kezde óte qajet, óıtkeni óskeleń urpaqtyń densaýlyǵyn nyǵaıtýǵa jáne damytýǵa baǵyttalǵan», dep atap aıtty.
Budan basqa, qala mereıtoıy qarsańynda KPO áleýmettik baǵdarlama aıasynda júzege asyrǵan Aqsaı qalasynyń Mámetova jáne Temir jol kóshelerindegi, Sadovaıa kóshesinen Zapadnaıa kóshesine deıingi aralyqty kúrdeli jóndeý jumystary aıaqtaldy. Sondaı-aq Oral qalasynda qala saıabaǵynyń oń jaǵalaýyn abattandyrýdyń ekinshi kezeńi aıaqtalǵan bolatyn.
KPO jyl saıyn Batys Qazaqstan oblysynda kóptegen áleýmettik-ınfraqurylymdyq jobalardy júzege asyrýda. Jobalardyń tizbesi men basymdylyǵy óńir basshylyǵy tarapynan belgilenedi. Osy baǵdarlama aıasynda densaýlyq saqtaý, bilim berý, mádenıet jáne sport nysandarynyń qurylysy iske asyrylady, sondaı-aq barlyq osy jobalar tek qana qazaqstandyq merdigerlerdi tartý arqyly oryndalyp otyr. О́ńirdiń áleýmettik ınfraqurylymyn damytýǵa KPO salǵan ınvestısııalardyń jalpy somasy búginde 318 mıllıon AQSh dollaryn quraıdy.
Kompanııanyń aımaqty damytýǵa qosyp kele jatqan úlesi Qazaqstan Úkimeti tarapynan laıyqty baǵalanýda. Bıznestiń áleýmettik jaýapkershiligi jónindegi respýblıkalyq konkýrsta KPO «Paryz» syılyǵymen eki márte marapattaldy, sonymen qatar «Eń ozyq áleýmettik joba» atalymy boıynsha kúmis «Paryzdy» aldy.
Arman QUSAIYNOV
Batys Qazaqstan oblysy,
Aqsaı qalasy
