Mınıstrliktiń málimetinshe, Taıaý Shyǵystaǵy ahýaldyń áli de shıelenisti bolyp qalýyna, sondaı-aq óńirdiń birqatar memleketterinde áýe keńistiginiń mezgil-mezgil jabylýyna baılanysty Qazaqstan Respýblıkasynyń Syrtqy ister mınıstrligi kelesi elderge jaǵdaıdyń tolyq turaqtanýyna deıin saparlardan bas tartý jónindegi usynymdaryn saqtaıdy: Bahreın, Birikken Arab Ámirlikteri, Izraıl, Iemen, Iordanııa, Irak, Iran, Qatar, Saýd Arabııasy Koroldigi, Kýveıt, Lıvan, Oman jáne Sırııa.
«О́ńirde júrgen Qazaqstan Respýblıkasynyń azamattaryna jeke qaýipsizdik sharalaryn kúsheıtý, yqtımal qaýipti aımaqtarǵa barýdan bas tartý, jergilikti bılik organdarynyń nusqaýlaryn qatań saqtaý, sonyń ishinde zymyrandyq qaýip týyndaǵan jaǵdaıda dereý baspanalarǵa (qorǵanys oryndaryna) barý kerek ekenin eske salamyz», delingen habarlamada.
Sondaı-aq Qazaqstan Respýblıkasynyń sheteldegi mekemelerimen, týroperatorlarmen jáne áýe tasymaldaýshylarymen turaqty baılanysta bolý qajettigi taǵy aıtyldy.
Eske sala keteıik, Izraıl 28 aqpanda tańerteń Iranǵa soqqy jasady. Dýbaı, Abý-Dabı jáne Ras-el-Haımada júrgen Qazaqstan azamattary reısterdiń toqtatylýyna baılanysty elge qaıta almaı qalǵan. Al «Qazposhta» Taıaý Shyǵystaǵy jaǵdaıdyń shıelenisýine baılanysty halyqaralyq poshta jóneltilimderine ýaqytsha shekteýler qoıylǵanyn málimdedi.
Buǵan deıin Taıaý Shyǵystaǵy qaqtyǵys saldarynan 13 reıs toqtatylǵanyn jazǵan bolatynbyz. Sondaı-aq Taıaý Shyǵystaǵy ahýaldyń ýshyǵýyna baılanysty Qazaqstannyń shet elderdegi mekemeleriniń jedel baılanys jáne «jedel jeli» nómirleriniń iske qosylǵany habarlanǵan edi.
