Foto: Astana ákimdigi
Revmatologııa ortalyǵy «Qalalyq kópsalaly ftızıopýlmonologııa jáne ishki aýrýlar» ortalyǵynyń bazasynda ashyldy. Buǵan deıin Astanada bul baǵytta arnaıy stasıonar bólimshe bolmaǵan.
Ortalyq basshysy Anna Sepkeniń aıtýynsha, jańa bólimsheniń iske qosylýy – qalalyq densaýlyq saqtaý júıesin damytýdaǵy mańyzdy qadam.
«Endi býyn aýrýlaryna shaldyqqan naýqastarǵa medısınalyq kómek áldeqaıda qoljetimdi bolady. Kútý merzimi qysqaryp, zamanaýı em-dom tásilderi keńinen qoldanylady», dedi ol.
Buǵan deıin pasıentter aýrýhanaǵa jatý úshin 6-7 aıǵa deıin kezek kútýge májbúr bolǵan. Sonyń saldarynan kóp jaǵdaıda naýqastar tek shuǵyl jaǵdaıda ǵana stasıonarǵa túsip, bazıstik jáne gendik-ınjenerlik bıologııalyq terapııany der kezinde alý múmkindigi shektelgen.
Otandyq mamandar revmatologııalyq aýrýlardy anyqtaý men emdeý máselelerin talqylady
Qalalyq qoǵamdyq densaýlyq saqtaý basqarmasy ókilderiniń málimetinshe, emdeýdi uzaq kútý aýrýdyń asqynýyna jáne múgedektik deńgeıiniń artýyna ákelýi múmkin. Jańa ortalyq osy túıtkilderdi júıeli túrde sheshýge baǵyttalǵan.
Ortalyqtyń ashylýy mamandandyrylǵan kómektiń qoljetimdiligin arttyryp, aýrýhanaǵa jatý jáne keńes alý ýaqytyn qysqartady, sondaı-aq zamanaýı emdi der kezinde taǵaıyndaýǵa múmkindik beredi. Sonymen qatar aýrýdyń asqynǵan túrlerin azaıtyp, dárigerlerdiń mýltıdıssıplınarlyq tásildi qoldanýyna jol ashady. Bul óz kezeginde naýqastardyń ómir súrý sapasyn jaqsartýǵa yqpal etedi.
Revmatologııalyq aýrýlar – býyn men bulshyq etti zaqymdaıtyn sozylmaly dert. Mundaı syrqattardy tıimdi emdeý úshin erte dıagnostıka, turaqty baqylaý jáne zamanaýı terapııany ýaqytyly qoldaný asa mańyzdy.
