Otyrysta Dáýren Abaev «Sıfrlyq Qazaqstan» memlekettik baǵdarlamasy aıasynda azamattardy joǵary jyldamdyqty Internetpen qamtamasyz etý jáne aýyl men qala arasyndaǵy sıfrlyq alshaqtyqty qysqartý boıynsha baǵyt qarastyrylǵanyn baıandady.
«Qurmetti Baqytjan Ábdiruly, sizdiń tapsyrmańyzǵa saı mınıstrlik bolashaǵy bar 1700-ge jýyq aýyldyq eldi mekenge talshyqty-optıkalyq baılanys jelisin tartý jumysyn qolǵa alýda. Iаǵnı, bul 2 mıllonnan astam turǵyn sapaly ınternetke qol jetkizedi degen sóz. Jobada qamtylatyn aýyldardyń tizimi Ulttyq ekonomıka mınıstrligimen birlese otyryp, anyqtalýda. Jalpy bul joba 2018-2020 jyldar aralyǵynda júzege asyrylady dep josparlanyp otyr», - dedi ol.
Joba elektrondy saýdamen qamtýdy, elektrondy úkimettiń qyzmet kórsetýlerin, ınteraktıvti bilim berý, densaýlyq saqtaý quraldaryn keńeıtý esebinen edáýir áleýmettik-ekonomıkalyq áserge ıe bolady dep boljanyp otyr.
Búgingi tańda 122 qalanyń barlyǵy jáne 1 200-ge jýyq aýyldyq eldi meken Internet jelisine joǵary jyldamdyqty qoljetimdilikke ıe. Odan keıin mınıstrlik jalpy halqy 2 mln astam adam bolatyn 1 800 aýylǵa baılanys jelisin tartýdy josparlap otyr.
Nátıjesinde, 2021 jylǵa deıin uzyndyǵy 24 000 km bolatyn talshyqty-optıkalyq baılanys jelileri tartylady. Bul jergilikti atqarýshy organdardy jáne memlekettik organdardyń qurylymdyq bólimshelerin Internetke qosýdy qamtamasyz etýge múmkindik beredi.
Jobany 13 jyldyń ishinde (2018-2030 jj.) memlekettik organdardyń baılanys qyzmet kórsetýlerin kepildikti paıdalanýdy qamtamasyz etýmen memlekettik-jekeshelik áriptestik syzbasy boıynsha iske asyrý josparlanǵan.
Nátıjesinde Internetke qoljetimdiliktiń sekýndyna 20 megabıtke deıin jyldamdyǵyn qamtamasyz etý josparlanǵan, sondaı-aq densaýlyq saqtaý jáne jergilikti memlekettik organdardyń mekemelerinde shamamen 2000 mektep pen 1 200 núkteni qosý josparlanǵan.
AKM jobasyn iske asyrý úshin is-sharalardy jáne olardy oryndaý merzimderin kórsete otyryp, jol kartasy ázirlendi jáne bekitildi. Baılanys operatorlary tarapynan jekemenshik seriktesterdi anyqtaý boıynsha baıqaý ótkizý úshin qujattama ázirleý jumystary bastaldy.
Usynylǵan Jobany iske asyrý 2018-2020 jyldarǵa josparlanǵan.
