Kópten beri kórermenderdiń kózaıymyna aınalǵan eki stýdııa jańartylypty. Atap aıtqanda, tańerteńgilik «Qaıyrly tań!» baǵdarlamasy men «Jańalyqtar» bólimi endi sońǵy úlgidegi jańadan jabdyqtalǵan eki stýdııada túsiriletin boldy. Bul jumystar telearna dırektory Arsen Bektasovtyń bilikti basshylyǵymen jaz aılarynda júrgen eken.
- Bıyl «Qazaqstan-Semeı» telearnasy óziniń 52 jyldyq tarıhı kezeńine bet buryp otyr, - dedi dırektordyń orynbasary, tanymal jýrnalıst Erjan Jaqyp,- Osy 52 jyldyń ishinde kóptegen baǵdarlamalar ózgerdi. Tek osy «Qaıyrly tań!» men «Jańalyqtar» ǵana kórermenderdiń suraýyna oraı jarty ǵasyrdan astam ýaqyt boıy úzilissiz túsirilip kele jatyr. Stýdııalarymyzdy jańartyp, basqa da jańa baǵdarlamalardy efırge shyǵarýdamyz. Sondaı-aq, ulttyq oıý-órnekti grafıkalyq-estetıkalyq erekshelikterdi basty nazarǵa aldyq. Ulttyq sanany jańǵyrtý jónindegi Elbasy tapsyrmasyna oraı jasalǵan bul ózgertýlerimiz aımaqtyq arnalardyń ishki telenaryqta derbes jumys júrgizýine yqpal etpek. Jáne aýdıtorııany keńeıtýge baǵyttaǵan negizgi sharalarymyz da osy bolyp tabylady. Kóptegen álemdik telearnalardaǵy úrdisterdi saralap, zamanaýı trendterdi de eskerip otyrmyz. Aldaǵy ýaqytta balalarǵa, jastarǵa arnalǵan kóptegen baǵdarlamalardy qolǵa almaqpyz. Barlyǵy da el ıgiligi úshin atqarylyp jatqan jumystar.
Raýshan Nuǵmanbekova,
Semeı
Sýretti túsirgen avtor
