Táýelsizdiktiń eleń-alańynda elimizdiń bas basylymyn basqarǵan, «redaktorlardyń redaktory» atanǵan Sherhan Murtazanyń on jyl ishindegi gazet betine jarııalanǵan suhbattary, maqalalary, essleri, oı-tolǵanystary, kósemsózderi men ádebı-kórkem dúnıeleri toptastyrylǵan «Namys naızaǵaıy» kitabynyń tusaýkesý rásiminde «Egemen Qazaqstan» respýblıkalyq gazetiniń AQ Basqarma tóraǵasy Darhan Qydyráli QR Aqparat jáne Kommýnıkasııalar mınıstri Dáýren Abaevtyń quttyqtaý hatyn oqyp berdi. Sher-aǵańnyń zamandas dostary men qalamdas ini-baýyrlary jınalǵan sharada Qazaqstan Jazýshylar odaǵynyń tóraǵasy Nurlan Orazalın, Qazaqstan Ulttyq Ǵylym akademııasynyń prezıdenti Murat Jurynov bastaǵan el aǵalary birtýar qalamger shyǵarmashylyǵy men qaıratkerligi jaıly syr shertip, jyly lebizderin bildirdi.
Sher-aǵań mereıtoıyna Túrkııadan Túrki álemi jazýshylar odaǵynyń arnaıy syılyǵy men «Aı men Aısha» kitabyn túrik tiline aýdaryp, súıinshi danasyn alyp kelgen aýdarmashy-jazýshy Málik Otarbaev: «Tutas bir dáýirdiń tynys-tirshiligin qamtıtyn, jazýshy óziniń balalyq shaǵyn baıandap beretin «Aı men Aısha» romany o basta jaryq kóre salysymen-aq, sony aýdarsam degen oı kelgen edi. Shyǵarmadaǵy Aısha apanyń ózin biz bala kezde kórgenbiz, al ózin shyǵarmada Baryshan degen keıipker arqyly kórsetken Sherhan aǵamyzdy týyp-ósken, tulǵa bolyp qalyptasqan ortasy men úshin de tanys ári beıtanys álem edi. Biraq ol úshin aýdarma salasynda biraz jumys istep, izdeniste júrip, tájirıbe jınaqtaý kerek boldy, qysqasy, bul baıypty daıyndyqty qajet etetin jumys edi. Keıinnen kitapty qazaqshadan túrikshege eki jyldaı júrip aýdarǵan soń Qazaqstannyń Túrkııadaǵy elshiliginiń qoldaýymen Túrkııanyń Ankara qalasyndaǵy Eýrazııa jazýshylar qaýymdastyǵynyń «Bengý» dep atalatyn baspasynan jaryqqa shyǵardyq. Atalmysh qaýymdastyq bıyl túrki dúnıesi ádebıetine sińirgen eńbegi úshin Sher-aǵańa arnaıy syılyq taǵaıyndap ári osy kitaptyń shyǵýyna muryndyq boldy. Kitapty oqyp shyǵý bir bólek te, oqyp otyryp aýdarý bir bólek qoı. Ár sózdiń maǵynasyna tereń úńilip otyryp, bul romannyń tek qazaq oqyrmany úshin ǵana qundy dúnıe emes, jalpy adamzat tarıhyndaǵy ólmes týyndylardyń biri ekenin sezinesiz», – dedi.
Kitaptar tusaýkeseri sharasynan keıin ótkizilgen Sherxan Murtaza atyndaǵy bılıardtan dástúrli týrnır sharasynda «Egemen Qazaqstan» RG» AQ Basqarma tóraǵasy Darhan Qydyráli: «Buryn Almatyda Seıdahmet Berdiqulov atyndaǵy fýtboldan dástúrli shara bolatyn, biraq ol qazir Astanada ótetin boldy. Al Sher-aǵańnyń súıikti oıyny bolǵan tastaıaqtyń budan bylaı Almatydaǵy zııaly qaýymnyń basyn qosatyn, jylda osy ýaqytta ótkiziletin dástúrli sharaǵa aınalaryna kúmán joq», – dese, ǵalym, pýblısıst Namazaly Omashev: «Ásem Almatymyzda Sherhan Murtaza atyndaǵy týrnırdiń ótip turýy – Sheraǵańnyń aty úshin de, jalpy qalam ustaǵan qaýym úshin, jýrnalıster úshin de óte paıdaly shara bolmaq. О́ıtkeni týrnır barysynda Sheraǵańnyń minez-qulqy, ultqa jasaǵan jaqsylyǵy, sińirgen eńbegi aıtylady, al shyǵarmashylyq adamdary bir-birimen jaqyn tanysyp, pikir alysady, syrlasady. Jýrnalıster – shyǵarmashylyq ıeleri. Kezinde Ǵabıt Músirepov, Ǵabıden Mustafın aǵalarymyz bılıard jalpyhalyqtyq oıyn bolmaı turǵan kezdiń ózinde ony kóp oınaǵan eken. Basqa oıyn tappaǵandyqtan emes, shyǵarmashylyq adamyna óte paıdaly oıyn bolǵandyqtan. Sondyqtan «Egemen Qazaqstan» gazetiniń basshysy Darhan Qydyráliniń bastaýymen ótip jatqan týrnır elge de, jurtqa da, jýrnalısterge paıdaly bolatyny anyq», – dep aǵynan jaryldy.
Sherhan Murtaza atyndaǵy atalmysh týrnır qatysýshylarynyń Aqsaqaldar tobynan óz mergendigimen kózge túsken satırık jazýshy Tolymbek Álimbekuly yntalandyrý syılyǵyna ıe bolsa, belgili ǵalym, professor Namazaly Omashev 3-shi oryndy, general-maıor Ádil Shaıahmetov 2-shi oryndy, al 1-shi oryndy jýrnalıst-jazýshy Aıaǵan Sandybaı ıelendi. Sondaı-aq, Jastar tobynan «An-Arys» baspasynyń Bas redaktory, aqyn Kádirbek Qunypııaulyna yntalandyrý syılyǵy buıyrsa, 3-shi oryndy saıasattanýshy Aıdos Sarym, 2-shi oryndy «Qazaq ádebıetiniń» Bas redaktory Janarbek Áshimjan, 1-shi oryndy jazýshy-jýrnalıst Beket Momynqul utyp aldy. Aıtpaqshy, Baýyrjan Momyshulynyń nemere inisi, jazýshy Beket Momynqul Sherhan Murtazanyń «Bir kem dúnıe» kitabynyń ózi aýdarǵan «Odın ızıan bytııa» atty oryssha nusqasynyń bir-bir danasyn jınalǵan qaýymǵa syıǵa taratty.
Mıra BAIBEK,
«Egemen Qazaqstan»
ALMATY
