Osymen besinshi ret uıymdastyrylǵan úshjaqty deńgeıdegi birlesken otyrysqa Qazaqstannyń Ishki ister mınıstri Qalmuhanbet Qasymov Belarýs Respýblıkasynyń Tótenshe jaǵdaılar jónindegi mınıstri Vladımır Vashenko jáne Reseı Federasııasy Azamattyq qorǵanys, tótenshe jaǵdaılar jáne dúleı zilzalalardyń saldaryn joıý isteri mınıstri Vladımır Pýchkov qatysty.
Halyqaralyq sheńberde ótken birlesken alqanyń kún tártibinde IV otyrys sheshimderiniń oryndalýy men aldaǵy VI otyrysty ótkizý máseleleri talqylandy.
Sonymen qatar tótenshe jaǵdaılar monıtorıngi men olardy boljaý salasyndaǵy mamandardy daıyndaý, transshekaralyq sıpattaǵy oqys oqıǵalarǵa den qoıý boıynsha shekaralyq yntymaqtastyq, sý obektilerindegi qaýipsizdikti qamtamasyz etý, selderdiń aldyn alý jáne ǵarysh monıtorıngi derekterin paıdalaný máseleleri boıynsha tájirıbe almasý, bolýy yqtımal jer silkinisterine nazar aýdarý, jańa salynyp jatqan bıik ǵımarattardaǵy órtterdi sóndirýge kúshter men quraldardy daıyndaý syndy problemalar jan-jaqty sóz boldy.
Birlesken qyzmettiń strategııalyq baǵyttary men aýqymyn anyqtaý, úsh eldiń múddeli organdary arasynda tótenshe jaǵdaılar bólimsheleriniń, onyń ishinde birlesken alqaǵa qatysýshy elderdiń shekaralas aýmaqtaryndaǵy tótenshe jaǵdaılardyń aldyn alýǵa jáne olardy joıýǵa baǵyttalǵan ózara is-qımyl tártibin retteý máselesi de taqyryptan tys qalmady. Sol sııaqty mamandardy kásibı turǵyda oqytý men olardyń biliktilikterin arttyrý salasyndaǵy ózara is-qımyldy utymdy uıymdastyrý tetikteri qaraldy.
Aıta keteıik, mundaı jıyn halyqty qysyltaıań shaqtarda sabyrly bolyp ári júıeli is-qımyldarǵa jumyldyrý baǵyty boıynsha baǵdarlamalar men oqý ádisterin ázirleýde, materıaldyq-tehnıkalyq bazany jetildirýde jáne eń bastysy, qalyń buqaranyń tynys-tirshiligindegi qaýipsizdikti qamtamasyz etýde mańyzdy ról atqaratyny sózsiz. Sol sebepten de osyndaı baǵyttar boıynsha jumys júrgizý birlesken alqanyń negizgi mindetteri bolyp tabylady.
Nurlybek DOSYBAI,
«Egemen Qazaqstan»
