О́zge adamdar kóredi, sonymen shekteledi. Al jýrnalıstiń oı túkpirinde ár kórgenine suraýly júzben qaraıtyn ádeti baıaǵydan qalyptasqan. Ásirese, mundaı iske quqyq salasyna qalam tartyp júrgen azamattar birinshi sergektik tanytady. О́ıtkeni olar árkez zańnyń tórt qubylasyn túgendep júredi. Sol zańdy bura tartqandardy, qasaqana buzǵandardy, adam quqyǵyna nemquraıdy qaraıtyndardy, óz múddesi degende ózgeni kózge ilmeıtinderdi syn tezine alyp, saraptama maqalalarynda taıǵa tańba basqandaı kórsetip otyrady. Basylym bedeli keıde sondaı taqyryptardyń kóterilýimen bıikteıtini belgili. Olardyń eńbegi keıde qaraǵaıdyń qarsy butaǵyndaı sezilýi múmkin. О́ıtkeni zańdy qurmetteý, adam quqyǵyn qorǵaý – bul úlken qasıet. Bilim biligimen, jan-jaqty saýattylyǵymen, tabandap turyp tireskende qarsylasyn tize búktirmeı qoımaıtyn jýrnalıster qatarynda bas basylymnyń baıyrǵy qyzmetkerleriniń biri, alty belestiń bıigine kóterilgen Aleksandr Tasbolatov ta bar.
Ol – óziniń eńbek jolyn Batys Qazaqstan oblystyq «Oral óńiri» gazetinen bastap, respýblıkalyq beldi basylymdarda qyzmet atqaryp, qalamyn shyńdaǵan azamat. Bir sózben aıtqanda, ol jýrnalıstıkanyń aýyr júgin qaıyspaı arqalap kele jatyr. Quqyq taqyrybynyń maǵynasy óte keń, onyń túri de kóp. Jáne quqyqty ár sala ózine tán úlgimen qorǵaıdy. Onyń kóbi bılik atynan sóz aıtqanmen, keıde qyzmetine narazylyq keltiretinder bolady. Biraq «Bıdaıdyń barar jeri dıirmen» degendeı, báriniń toqtar jeri – sot. Kim de bolsa sottan ádildik kútedi. О́zge quqyq qorǵaý mekemeleri bir tóbe desek, sottyń ádildigi sonyń báriniń jumysyna bergen baǵa bolyp sanalady. Aleksandr Tasbolatovtyń eńbegin osy turǵydan alyp qarasaq, kóp nárseni ańǵarýǵa bolady. Onyń ústine adam quqyǵyn quqyq qorǵaýshylar ǵana emes, barlyq mekeme mán berip, barlyq uıymdar jete qadaǵalap otyrýy kerek. Sonda jýrnalıster qaýymynyń eńbegi jeńilderi anyq. Aıtalyq, áriptesimizdiń nebir daýly sot prosesterine qatysyp, kóp kóleńkeli jaılardyń betin ashqanynan habardarmyz. Jýrnalıstiń maqalalarymen tanysqan elimizdiń turǵyndary bas basylymǵa jıi habarlasyp jatady. Sol habarlasqan adamdardyń shaǵymdarynyń deni jergilikti sheneýnikterdiń zańdy aıaqqa taptaýynan oryn alady eken. Keıde daýlasqan eki taraptyń isin alǵash qaraǵan organ qyzmetkerleriniń salǵyrttyǵynan daýdyń ara-jigi múlde ózgerip ketip jatatyn tustary da bolady. Sonyń saldarynan is sotqa jetkende onyń aq-qarasy ashylmaı, biraz jurt áýre-sarsańǵa túsedi. Mundaı jaǵdaıda jýrnalıster amalsyz aralasady. A.Tasbolatov mundaı oqıǵanyń talaıyn bastan ótkergen. Bilek sybanyp alyspasa da, zań aıasynda arbasqan sátteri maqala emes, bir kitapqa júk bolary haq. Ádildik joly – ony búgingi alpys deıtin jastyń belesine abyroımen kóterip otyr.
Kórnekti jazýshy Sherhan Murtaza «Arylý» degen kitabynda jazǵan alǵysózinde Aleksandr Tasbolatovtyń shyǵarmashylyǵyna qatysty joǵary baǵa bergenin de aıta ketý kerek. Iá ol jýrnalıstıkamen qatar, kórkem shyǵarma jazýmen de tanylǵan qalamger. «Arylý, «Shyndyq» ózge de pýblısıstıkalyq kitaptarmen birge, «Namys» romany búgingi kúnniń aqıqatyna arnalǵan súbeli dúnıe.
Bir sózben aıtqanda, aqıqat adamy sanatyndaǵy Aleksandr Tasbolatovtyń qazaq jýrnalıstıkasyna qosqan eńbegi árkez óziniń baǵasyn alyp kele jatyr. Sonyń aıǵaǵy bolar ol Prezıdent grantynyń ıegeri, Qazaqstannyń eńbek sińirgen qaıratkeri, Jýrnalıster odaǵy syılyǵynyń laýreaty. Buǵan qosa «Nur Otan» partııasynyń, Joǵarǵy sottyń, Ulttyq qaýipsizdik komıtetiniń, Ádilet, Ishki ister mınıstrlikteriniń de marapattaryna ıe bolǵanyn da aıta ketelik. Quqyq salasyna qalam terbegen aldyńǵy tolqyn aǵalarynyń ıgilikti isin jalǵastyrǵan Tasbolatov búkil sanaly ómirin shyndyqtyń shyraqshysy bolýǵa arnap kele jatyr. Alda da osy bıikten kórine beretini aqıqat.
Súleımen MÁMET,
«Egemen Qazaqstan»
