Almaty qalasy Kásipkerlik jáne ındýstrıaldy-ınnovasııalyq damý basqarmasynyń basshysy Maqsat Qıqymov «Almaty Invest» jyl saıyn óziniń alańynda bedeldi saıasatkerlerdi, álemdik jáne otandyq bıznes kóshbasshylaryn, ınvestısııalyq korporasııalar, qarjy ınstıtýttary jáne halyqaralyq uıymdar basshylaryn jınaıtynyn jetkizdi.
«Osy jylǵy forým jumysyna álemniń 28 elinen keletin 500-den astam delegat qatysady dep kútilýde. Is-sharany qazaqstandyq táýelsiz buqaralyq aqparat quraldarynyń negizin qalaýshylardyń biri bıznesmen Armanjan Baıtasov júrgizetin bolady. Forýmnyń basym mindeti sheteldik ınvestorlardy tartý, sondaı-aq iske asyrylǵan jobalarmen qatar, ınvestısııalar salýdy qajet etetin keleshek jobalardyń tusaý keserin kórsetý bolyp esepteledi», dedi spıker.
Sonymen qatar, ol budan buryn ótken forýmnyń qorytyndysyna toqtaldy. 7,7 mlrd. teńgeniń 5 jobasy qazirgi kezde iske asyrylyp, 1230 jumys orny qurylǵanyn baıandady.
«Land Master Co., Ltd» Ońtústik Koreıa kompanııasymen 10 myń túp kóshet otyrǵyzyldy, kóshettik ashyldy, Moskva Metropolitan saýda ortalyǵynyń 2-shi kezegi iske qosyldy. Aldaǵy forým ótkennen keıin biz budan da kóp tikeleı sheteldik ınvestısııalar tartýdy kózdep otyrmyz», dep spıker óz sózinde.
Sondaı-aq, jıynǵa qatysýshylar brıfıng barysynda forým baǵdarlamasynda logıstıkaǵa, bilimge, tamaq ónerkásibine jáne kınoındýstrııaǵa arnalǵan 4 seksııanyń kózdelgenin aıtyp berdi. Olardyń aıtýynsha, bul salalar qarqyndy túrde damýda jáne ınvestısııalar salýdyń keleshegi zor salalary bolyp esepteledi.
Spıkerler retinde halyqaralyq jáne otandyq ınvestorlar men sarapshylar sóz sóıleıdi. Jekeleı alǵanda, olar Glıgor Tashkovıch myrza, India & UK «Sethia Group» tóraǵasy, Newby Teas negizin qalaýshy Nırmal Kýmar Setııa, «Selma group» quryltaıshysy, «Cameroil & TEC AG» bas dırektory Maıkl Bono, MTV TA prodıýseri Rıchard Koram, Qazaqstandaǵy «Haileybury» Qamqorshylyq Keńesiniń tóraǵasy Ian Hant, Qazaqstannyń iri ınvestorlary Aıdan Káribjanov jáne Sıddık Han, táýelsiz ekonomıst Rahym Oshaqbaev jáne basqalar.
