Jýyrda ǵana osy «Turan-Bolashaq» bıznes-ınkýbator alańynda stýdentterdiń qatysýymen kezekti shara ótti. Ekonomıka jáne bıznes-ınnovasııa kafedrasynyń ustazdary men stýdenteri qatysqan trenıngte belgili bir jetistikke jetý jolyndaǵy baǵyt-baǵdardy aıqyndaý men bıik maqsatty baǵyndyrýdyń qyr-syry keńinen talqylandy. Sonymen qatar, jas býyn ókilderiniń jeke tulǵalyq qasıetin qalyptastyrý jolynda tıimdi tetikter de taqyrypqa tuzdyq boldy. Sol sebepten de bıylǵy oqý jylynda alǵash ret uıymdastyrylǵan búgingi semınar taqyryby – «Tulǵalyq qasıetti qalyptastyrý jolynda» dep tańdalǵan.
Oqý ornynyń janynan qurylǵan bıznes-ınkýbator alańyndaǵy basqosýdy osy salada sheberligi shyńdalǵan tájirıbeli ári bilimdi maman Erlaz Jaıyqbaev júrgizip, ol óz tájirıbesin ortaǵa salyp, stýdentter saralaýynan ótkizdi. Árıne, kásipkerlik salada eńbek etip, josparyńdy júzege asyrý men tabysyńdy eseleý kisiniń qolynan keletin shyǵar. Biraq, ekonomıkalyq joǵary kórsetkishterge jetip, tulǵalyq kelbetin tabandylyqpen qalyptastyrý sıpaty ekiniń biri ońaı iske asyratyn adamı qasıet emes.
«Qazirgi kezde tynymsyz izdenis ústinde júrgen jastarymyz bolashaqta óziniń tulǵalyq kelbeti aıshyqtalǵan, tabysty ári namysty azamat bolyp qalyptasýy úshin osy kúnderi durys baǵyt-baǵdar kórsetýimiz óte oryndy dep sanaımyn. Sebebi, erteń jetistikke jetken kez-kelgen kásipkerdiń boldym-toldym dep asyp-tasymaı, salamatty ómir saltyn ustanatyn azamatqa aınalýy úshin búgingi dárisimizdiń bereri mol bolatyndyǵyna senemin», deıdi E.Jaıyqbaev.
Memlekettik qyzmettegi uzaq jyldyq tájirıbesi men kásipkerlik saladaǵy utymdy ádisterin, adamnyń ózin-ózi jetildirýindegi kúndelikti mashyq, qaǵıdalarǵa qatysty psıhologııalyq keńesterimen bólisken E.Jaıyqbaev búginde belsendi qoǵam músheleriniń biri jáne sportty serik etken tabysty kásipker.
«Ýnıversıtet jastarynyń erteńge degen senimin nyǵaıtyp, salamatty ómir saltyn berik ustanatyn jandardyń qatarynan tabylýy úshin olarǵa trener-ustaz retinde búgingi qoǵamnyń tabysty ókilderin shaqyryp, osylaısha dáris oqýyn turaqty túrde uıymdastyrýdamyz. Kókiregi oıaý, kózi ashyq, kásipkerlikke yntasy zor jáne densaýlyǵy myǵym jastar legin qalyptastyrý bizdiń túpki maqsatymyz bolyp tabylady», deıdi atalmysh alańdaǵy «Business innovation» seksııasynyń keńesshisi Sáýle Shyntaeva.
Al dáristen alǵan áserimen bólisken stýdent Tomırıs Báıtenova bolsa, leksııa-trenıngtiń psıhologııalyq turǵyda óte qyzyqty ótkendigin aıtady.
«О́zim psıholog mamandyǵynyń qyr-syryn meńgerip júrgendikten, bolashaqta kásibı maman retinde qalyptasýyma jáne qyzmettik ótilimdegi naqty maqsattardy aıqyndaýyma zor yqpalyn tıgizdi. Eńbek súıgishtik qasıet pen bilimge qushtarlyǵymdy oıatýmen qatar, sportty súıýime sebepker boldy», deıdi ol.
Aıta keteıik, «Startup Univer» bıznes-ınkýbatory alańynda «Startup Academy» IT-laboratorııasy, «Innovative Business» konsaltıng ortalyǵy, «Art Amanat» shyǵarmashylyq stýdııasy, «Ádilet» stýdenttik zań klınıkasy, «Ψ-factor» psıhologııalyq qyzmeti, «EXPO Travel» týrıstik bıýrosy jáne «Turan Speaking» til ortalyǵy syndy ınnovasııalyq kásipkerlik qyzmetter jumys isteıdi. Bul Astanadaǵy joǵary oqý oryndary arasynda alǵash ret iske qosylǵan bıznes-ınkýbator alańy bolyp tabylady.
Nurlybek DOSYBAI,
«Egemen Qazaqstan»
