Is-shara barysynda polıseıler sheteldik azamattar turatyn jáne olar kóp jınalatyn saýda, qurylys alańdary, jataqhana jáne saıajaılarǵa reıdtik tekserýler júrgizdi. Oıyn-saýyq oryndary men meıramhana, qonaqúı, kólik jýý oryndary da nazardan tys qalǵan joq.
Reıd barysynda bir kúnde 352 ákimshilik quqyq buzýshylyq anyqtalyp, 333 sheteldik azamat ákimshilik jaýapkershilikke tartyldy. Olardyń 38-i sot sheshimimen elden shyǵaryldy.
Sondaı-aq, kóshi-qon zańyn óreskel buzǵan 159 sheteldik azamattyń ýaqytsha tirkelý merzimi qysqartylyp, olar da elderine qaıtarylatyn boldy. Ýaqytsha tirkelý tártibin saqtamaǵan 11 sheteldik jáne sol sheteldikterdi jumys kúshi retinde zańsyz paıdalanǵan 8 Qazaqstan azamaty ákimshilik jaýapkershilikke tartyldy.
Is-shara barysynda polıseıler tólqujaty joq 51 jaqyn shetel azamatyn ustap, olardyń azamattyǵy men jeke tulǵasy anyqtalǵansha sot sheshimimen Ishki ister basqarmasynyń arnaıy qabyldaý-taratý ornyna jiberdi.
