– Memleket basshysy áleýmettik salanyń ınfraqurylymyn memleket-jekemenshik áriptestigi arqyly damytýdy únemi aıtyp keledi. Bıylǵy «Qazaqstannyń úshinshi jańǵyrýy: jahandyq básekege qabilettilik» Joldaýynda Elbasy bıznes-ortany túbegeıli jaqsartý jáne keńeıtý, eldiń ishki jalpy ónimindegi shaǵyn jáne orta bıznestiń úlesi 2050 jylǵa qaraı kem degende 50% bolýyn qamtamasyz etý jóninde tapsyrma berdi. Osyǵan oraı densaýlyq saqtaý salasyna da ınvestısııany kóptep tartý sharalary qarastyrylyp jatyr, dedi A.Qınaıatov.
Onyń aıtýynsha, osy salada memleket-jekemenshik áriptestigin damytý arqyly elge kórsetiletin medısınalyq qyzmet sapasyn arttyrýǵa bolady. Medısınalyq qural-jabdyqtardy jańartyp, emdeýdiń zamanaýı tásilderine qol jetkizý múmkindigi bar. Sondaı-aq ınvestısııa kóbirek tartylsa, nysandardy paıdalanýǵa berý shyǵyndary da azaıtylmaq. Al memleketpen kelisimge otyrǵan jeke kásipkerlerge turaqty ári uzaq merzimdi bıznesti qurýǵa jol ashylady.
Búginde memleket-jekemenshik áriptestigi arqyly jalpy somasy 16 mlrd teńgeni quraıtyn 14 joba boıynsha kelisimshart jasalypty. Solardyń ishinde jedel medısınalyq járdem stansasy, Aqtóbede oftalmologııa aýrýhanasy men balalar stomatologııalyq emhanasy qurylystaryn salý, Ekibastuzda emhana ǵımaratyn turǵyzý, Shymkentte jedel medısınalyq járdem stansasyn salý, Almaty oblysynda medısınalyq zerthana jasaqtaý sekildi jobalar bar. Buǵan qosa, Ekibastuz ben Pavlodar aýrýhanalaryna eki kompıýterli tomografııa ornatý jónindegi jobalardy da atap ótýge bolady.
Jyldyń aıaǵyna deıin medısınalyq salaǵa qajetti taǵy 30 kelisimge qol qoıý josparlanyp otyr. Memleket-jekemenshik áriptestigi jobalaryn memlekettik qoldaýdy qamtamasyz etý úshin kelisimsharttar 3 jyldan 5 jylǵa deıin jasalady. Mundaı jobalar merdigerdi tańdaý úshin jyl saıyn konkýrsqa qatysyp jatpaıdy. Bul da memlekettik qoldaýdyń bir túri.
Densaýlyq saqtaý salasyn jeke ınvestorlar úshin tartymdy etý maqsatynda mınıstrlik jergilikti ákimdiktermen birlese ınfraqurylymdy 2025 jylǵa deıin damytýdyń perspektıvalyq josparyn ázirlepti. Onyń ishinde basty 16 óńirlik joba bar.
Brıfıngke Densaýlyq saqtaý mınıstriniń keńesshisi Anar Músirepova, Densaýlyq saqtaýdy damytýdyń respýblıkalyq ortalyǵy bas dırektorynyń orynbasary Nurbol Kúzembaev qatysyp, jýrnalısterdiń saýalyna jaýap berdi.
Qymbat TOQTAMURAT,
«Egemen Qazaqstan»
