Keńes otyrysynda áleýmettik jarnamalardy ornalastyrý, buqaralyq aqparat quraldaryndaǵy qazaq tiliniń jaǵdaıy, «Ashyq úkimet» portalyn damytý sııaqty birqatar máseleler talqylandy.
Aqparat jáne kommýnıkasııalar mınıstrliginiń BAQ salasyndaǵy memlekettik saıasat departamentiniń dırektory Eldos Náshiráliniń aqparatyna súıensek, otandyq telearnalar efır ýaqytynyń 1 paıyzyn áleýmettik rolıkterge bólýdi josparlap otyr. Iаǵnı, kúnine 2 mezgil 45 sekýndtyq beınekórsetilim keshki ýaqytta kórermen nazaryna usynylmaq. E.Náshiráliniń pikirinshe, mundaı áleýmettik rolıkter otbasy qundylyqtaryn, adamgershilikti jáne patrıotızmdi nasıhattaıdy.
«Qazaqstan» RTRK» basshysy Erlan Qarın teledıdar kórý reıtıngin anyqtaýdyń kemshilikterine toqtaldy. Onyń aıtýynsha, qazirgi júıe naqty jaǵdaıdy kórsetpeıdi.
«BAQ salasyndaǵy memlekettik tildiń damýyna yqpal etetin faktor – zertteý kompanııalarynyń nátıjesiniń sapasy. Alaıda olar keltirgen reıtıng shyndyqtan alshaq jatyr. Mysaly, «TNS Central Asia» kompanııasy zertteýdi iri qalalarda turatyn 2200 tirkelgen abonentter arasynda júrgizgen. Respondentterdiń 58 paıyzy qazaqtildi. Qazaqtildi aýdıtorııanyń basym bóligi qalalarda emes, shet jaqta,
aýyldarda turady. Sondyqtan, olardyń talǵamdary eskerilmeı qalady», – dedi E.Qarın.
«Qazaqstan» telearnasy basshysynyń paıymdaýynsha, naqty reıtıngke qol jetkizý úshin zertteýdi túrlendirý qajet. Ol saýalnama, blıs-ıntervıý, áleýmettik zertteýler júrgizip, fokýs toptarmen jumys isteý kerektigin aıtty.
Otyrys barysynda ulttyq domendi aýystyrý máselesi de sóz boldy. Qoǵamdyq keńestiń múshesi Nurlan Isın «kz» domenin «qz»-ge ózgertýdi usyndy. Ol erterek qımyldamasa, «qz» domenin basqalar ıemdenip ketýi yqtımal ekenin aıtady.
«Ulttyq domendi jańa álipbıge sáıkes latynsha «qz»-ge aýystyrý qajet. Bul máseleni tez sheshkenimiz jón. Sondyqtan, osyǵan jaýapty mekeme ICANN-ǵa suranys jiberilýi tıis», – dedi N.Isın.
Jıynda «Ashyq úkimet» portalynyń jumysy da talqylandy. Bul jóninde Aqparat jáne kommýnıkasııalar mınıstrliginiń BAQ salasyndaǵy memlekettik saıasat departamenti dırektorynyń orynbasary Bekzat Rahımov baıandama jasady. Onyń aıtýynsha, portal qazirgi tańda eki tilde qajetti aqparattardy taratyp otyr.
Abaı ASANKELDIULY,
«Egemen Qazaqstan»
