Qazaqstan úshin bul oqıǵanyń mańyzy óte zor. Sebebi, qazaq jerinen – «Baıqońyr» ǵarysh aılaǵynan ǵaryshtyq dáýirdiń bastalýyna dańǵyl jol ashyldy. Osy mereıli dataǵa oraı QR Qorǵanys jáne aeroǵarysh ónerkásibi mınıstri Beıbit Atamqulov baıqońyrlyqtardy aıtýly merekemen quttyqtap, «Baıqońyr» keshenin salýǵa jáne onyń ary qaraı jumys isteýine atsalysqan barlyq mamandar jumysynyń eleýli ekenin jetkizdi.
Saltanatty shara barysynda QR Qorǵanys jáne aeroǵarysh ónerkásibi mınıstrligi atynan «Baıqońyr» keshenin damytýǵa úles qosqany úshin jáne Jerdiń alǵashqy jasandy jer seriginiń ushyrylýyna 60 jyl tolýyna oraı Roskosmos jáne Qazǵarysh ókilderine, Baıqońyr qalasy ákimshiligi men Qyzylorda oblysy ákimdiginiń qyzmetkerlerine, sondaı-aq eńbek sińirgen ardagerler men BAQ ókilderine qurmet gramotalary tabystaldy.
Kúnniń birinshi jartysynda Qazǵarysh basshylary merekelik mıtıngke qatysyp, Jerdiń alǵashqy jasandy jer seriginiń ushyrylý qurmetine ornatylǵan eskertkishke gúl shoqtaryn qoıdy.
Sonymen birge QR Qorǵanys jáne aeroǵarysh ónerkásibi mınıstrliginiń quramy, onyń ishinde Vıse-mınıstr Marat Nurǵojın men «Qazaqstan Ǵarysh Sapary» UQ» AQ-nyń Vıse-prezıdenti, Halyq qaharmany, ushqysh-ǵaryshker Aıdyn Aıymbetov Máskeýge shaqyrtylyp, 60 jyldyqqa oraı ótkizilgen merekelik sharaǵa qatysty.
