«Astana Operanyń» tórtinshi maýsymy A.Jubanov pen L.Hamıdıdiń «Abaı» operasymen ashylǵany este. Opera «Jibek joly» halyqaralyq festıvali aıasynda usynylǵan edi. Sondaı-aq elordada Plasıdo Domıngonyń «Operalııa» halyqaralyq opera baıqaýynyń ótýi, maestronyń ózi «Travıata» spektaklinen Djor Jermonnyń partııasyn oryndaýy, elimizge áıgili La Skala teatrynyń gastroldik saparmen kelýi, Alan Bóribaevtyń jetekshiligimen 1200 mýzykanttyń G.Malerdiń №8 sımfonııasyn oryndaýy «Astana Opera» sahnasynda aıtýly oqıǵalardyń ótkeninen habar beredi.
Teatr úshin tórtinshi maýsymnyń taǵy bir aıtýly jańalyǵy – balet trýppasynyń Maskat (Oman) qalasyna gastroldik sapary. Árıne qazaqstandyq ujymnyń shyǵarmashylyq saparlar shekarasy san-alýan. «Astana Operanyń» ujymy Italııa, AQSh, Kanada, Fransııa, Reseı, Qytaı elderiniń sahnalarynda óner kórsetip júr. Al Oman sultandyǵynyń jóni bólek bolatyny, bul joly gastroldik saparmen barǵan 120 adamnyń barlyq jol shyǵynyn shaqyrýshy tarap kótergen. Bul týraly «Astana Opera» teatry dırektorynyń birinshi orynbasary Tóleýbek Álpıev málimdedi. «Bizdiń Omanǵa saparymyz Elbasynyń «Rýhanı jańǵyrý» baǵdarlamasy aıasynda iske asyrylǵan mańyzdy shara. Buryn bizdi shaqyrǵan memleketter kelisimshart boıynsha shyǵynnyń jartysyn ǵana moıyndaryna alatyn. Bul joly Oman sultandyǵy búkil shyǵyndy ózderi kóterdi. Mundaǵy Koroldik opera teatrynyń salynǵanyna on jyldyń ǵana júzi boldy. Áıtse de álemniń eń myqty teatr ujymdarymen baılanys jasap úlgergen», dedi ol.
Omanǵa gastroldik saparynyń áserin balet trýppasynyń kórkemdik jetekshisi Altynaı Asylmuratova bylaısha bólisti: «Omandyq kórermender bizdi óte jyly qabyldady. Bizdiń ártisterimiz de ózderin laıyqty kórsete bildi. Aldynda bizge túrli jaǵdaılar bolýy múmkin ekenin eskertken edi. Biraq eshqandaı oǵash áreketter bolǵan joq. Tipti biz qoıǵan «Aqqý kólin» uıyp otyryp tamashalady, sońynda oryndarynan turyp qol shapalaqtady».
Kórkemdik jetekshiniń aıtýynsha, álemdik klassıkanyń jaýharlarynyń qataryndaǵy «Aqqý kóli» baletine jańa horeografııalyq redaksııa jasalǵan. Iаǵnı, Koroldik opera teatrynda Altynaı Asylmuratovanyń jańasha qoıylymymen P.I.Chaıkovskııdiń «Aqqý kóliniń» premerasy ótken.
Al endi jańa maýsymǵa keler bolsaq, teatrdyń kezekti besinshi maýsymy qazannyń 20-da ashylady. «Astana Opera» teatrynyń dırektory Ǵalym Ahmedıarov kórermender besinshi maýsymda Adolf Adannyń «Korsar» baletin, M.Tólebaevtyń «Birjan-Sara» operasy men P.I.Chaıkovskııdiń «Qarǵanyń mátkesi» operasyn, sondaı-aq J.Bızeniń «Karmen» operasynyń premerasyn tamashalaı alatynyn aıtty.
Jalpy brıfıng barysynda Almaty men Astanadaǵy opera teatrlarynyń sahnalarynan 60-70 jyldan beri túspeı kele jatqan ulttyq operalardyń sońǵy 3-4 jyl bederinde jańa zamanǵa laıyqtalyp jańǵyryp jatqany áńgime ózegine aınaldy. Sondaı-aq ulttyq balettiń máselesi de kóterildi. Bizde 5-6 ulttyq opera bar bolǵanymen, ulttyq balet joq eken. Kezinde qoıylǵan, biraq sahnadan túsip qalǵan, sondaı-aq qoıýshysyn kútip jatqan baletterdi eseptemegende «Astana Operada» naqty bir ǵana ulttyq balet bıi (Ǵazıza Jubanova, «Qaragóz») qoıylǵan. Biraq, bir ǵana bımen ulttyq balettiń kósegesi kógermeıtini taǵy belgili. Bul turǵydan kelgende, «Astana Opera» teatrynyń basshylary keleshekte ulttyq baletti damytý týraly da óz oılaryn jetkizdi.
Aıgúl SEIIL,
«Egemen Qazaqstan»
