Saltanatty jıynǵa oblys ákiminiń orynbasary Jaqsylyq Omar jáne túrli salada jaqsy nátıjege jetken eńbekkerler qatysty.
Maqsat belgili – jumysshylardyń eńbegin baǵalaý, jaqsy kórsetkishke jetken jandardy kópke úlgi etý, eńbegine saı qurmet kórsetý. Merekelik jıyn oblystyń áleýmettik-ekonomıkalyq damýyna eleýli úles qosqan azamattardyń eńbek jolyn baıandaıtyn beınefılmnen bastaldy. Oblys ákimi Amandyq Batalovtyń quttyqtaýyn jetkizgen Jaqsylyq Omar óńir ekonomıkasyn damytyp, sharýashylyǵynyń alǵa basýyna yqpal etip júrgen eńbek adamdaryna úlgi bolǵan, eńbeksúıgish, salamatty urpaq ósirgendigi úshin kóp jyldar oblys kóleminde jumys istep, elge tanymal bolǵan eńbek ardagerlerine alǵys bildirdi.
Keshegi bolmasa – búgingi bolmaıdy. Eńbekkerlik – jyldar boıy qalyptasatyn mektep. Oblys ákiminiń orynbasary sóz arasynda kúni búginge deıin abyroıly isi men eńbekqorlyǵynyń arqasynda jas urpaqqa úlgi-ónege bola bilgen eki márte Sosıalıstik Eńbek Eri atanǵan Nurmolda Aldabergenov, Nıkolaı Golovaskıı, Jolseıit Moldasanovtardyń esimderin atap, solar salǵan jolmen júrý búgingi urpaqtyń bir mindeti ekenin, otbasy men túz eńbeginiń tizginin qatar ustap, názik jandylar arasynan shyqqan Sosıalıstik Eńbek Eri Zylıha Tamshybaeva, Márııam Aıabaeva, qyzylshashylar Bıtaı Tátenova, Zákarııa Seıitova, Mámıla Álimbaeva, ataqty júgerishiler Kúlásh Aıtjanova, Adalıat Zaınaýdınovalardyń erlikpen para-par eńbekteri jaıly aıtty. Mundaı tulǵalardyń eren eńbegi eshqashanda umytylmaq emes. Solardyń izin jalǵap, isin jalǵastyrý, dástúrli eńbek jolyn úzip almaý úshin, qarapaıym eńbekkerlerdiń sanyn arttyrý maqsatynda bıyl oblystaǵy 5 kolledjde jańa mamandyqtar ashylypty. Joǵary bilim alýǵa árkimniń múmkindigi bola bermeıdi, sol sebepti kúndelikti turmysqa qajetti mamandyqtardy meńgerý eshqashan qunyn joımaıtyn, kún tártibinen túspeıtin másele. Eki qolǵa bir kúrek izdegen árbir jastyń mamandyq meńgerýine múmkindik berý – basty mindet. Bolashaqta bul tarapta da eńbek ozattary shyǵyp jatsa, búgin jasalǵan qamqorlyq pen berilgen múmkindiktiń tekke ketpegeni. Búgingi kúnimiz úshin biz aldymen qarapaıym eńbek adamdaryna qaryzdarmyz.
– Tynymsyz ári eseli eńbektiń nátıjesinde alqabymyz astyqqa, dastarqanymyz dámge, úıimiz berekege tolyp otyr. Munyń barlyǵy árqaısylaryńyzdyń tógilgen mańdaı terlerińizdiń jemisi. Uzaq jylǵy qajyrly eńbegin halyqtyń ıgiligine arnaǵan adamdardyń esimderin atap, atqarǵan isterin jas urpaqqa úlgi etý – bizdiń mindetimiz ben azamattyq paryzymyz. Bıyl oblystyń ónerkásip ónimderi 4,5 paıyzǵa artyp, 468,5 mlrd teńgeni qurasa, aýyl sharýashylyǵy salasyndaǵy negizgi kórsetkish 1,5 paıyzǵa kóterilip, 281,6 mlrd teńgege jetti. Osyndaı kórsetkishke sizderdiń qosqan úlesterińiz ushan-teńiz, – dedi óńir basshysynyń orynbasary.
Budan soń ár salada jemisti eńbek etip, jetistikke jetken bilikti mamandar Qurmet gramotasy jáne Alǵys hattarmen marapattaldy. Al Aqparat jáne kommýnıkasııalar mınıstrliginiń «Eńbek ardageri» medali Taldyqorǵan qalasy qoǵamdyq keńesiniń tóraǵasy, «Qazaqtelekom» AQ oblystyq fılıaly telekommýnıkasııa dıreksııasy bas dırektorynyń keńesshisi Jeksembaı Meırembaevqa tabys etildi.
Bıylǵy jyldyń basynda eńbek adamynyń mártebesin arttyrý, jumysshy kásipterin nasıhattaý, eń úzdik eńbek áýletteri men kásiporyn jumysshylaryn aıqyndaý maqsatynda «Eńbek joly» baıqaýy jarııalanǵan. Ártúrli mamandyq ıeleri qatysqan baıqaý nátıjesi boıynsha «Úzdik eńbek áýleti» nomınasııasynyń báıgesi Aqsý aýdanyndaǵy temir jol salasynda 30 jyldan astam eńbek etken Bókeevter áýletine buıyrdy. «О́ndiristiń úzdik jas jumyskeri» atanǵan Sarqan qalasyndaǵy «Jetisý ızolıator» kásipornynyń jas ınjeneri Arman Mýsın, «Jumys isteıtin jastardyń úzdik tálimgeri» ataǵyn ıelengen Tekeli qalasy, Rýdnyı aýylyndaǵy №17 orta mekteptiń fızıka páni muǵalimi Altynaı Álqýat 500 myń teńgeniń sertıfıkatyn ıelendi. Atalǵan nomınasııalar boıynsha ekinshi oryn alǵandarǵa 300 myń teńge kóleminde syılyq tabystaldy. Baıqaýdyń bir sharty – onlaın daýys berý boıynsha tańdalǵan mamandarǵa 200 myń teńgelik syıaqy taǵaıyndaldy.
Saltanatty sharanyń sońy eńbek adamdarynyń qurmetine arnaıy daıyndalǵan Súıinbaı atyndaǵy oblystyq fılarmonııa ujymynyń konsertimen jalǵasty.
Jalpy, oblys boıynsha bıyl Indýstrıalandyrý kartasy aıasynda shyny jáne metall qurylysy baǵytyndaǵy quny 14,3 mlrd teńgeni quraıtyn 2 nysan iske qosyldy. Jyl sońyna deıin taǵy da 5 joba ashylady dep kútilýde. Indýstrııalandyrý kartasy boıynsha josparlanǵan 51 jobanyń 43-i tolyqqandy iske asqan. Jańa nysandardyń ashylýynyń arqasynda jáne shaǵyn jáne orta bızneske degen qoldaý nátıjesinde 22 myń jańa jumys orny ashylypty. Jumyspen qamtý baǵytynda da birqatar sharýalar qolǵa alynyp, qazir 8 myńnan astam adam jańa mamandyq ıgerip, úırenip jatyr. Buǵan qosysha 733 azamattyń jeke kásibin ashýǵa jáne ony damytýǵa múmkindik alǵanyn, buǵan 3,3 mlrd teńge kóleminde qarjy jumsalǵanyn aıta ketken jón.
Almas NÚSIP,
«Egemen Qazaqstan»
Almaty oblysy
