Álgi kelinshek:
– Osy qala maǵan rıza shyǵar, – dedi aýyr kúrsinip.
Bul sirá, men kelgenge deıingi áńgimeniń jalǵasy bolsa kerek.
– Otyz jyl turdym osynda. Endi... elge jetip ólgim keledi. Biraq jete almaımyn-aý. Dárigerler ushaqqa minýge bolmaıdy, júregińiz qysylady deıdi.
Al poıyzben júrýge shydamaımyn. Ol úshin meniń jaǵdaıymdy jasap, asty-ústime túsip, óbektep otyratyn bireý kerek. Ony qaıdan tabam?.. Osy kúnge deıin tabylmaǵan jaqsy adam endi maǵan kezige me... Ne de bolsa, ushaqpen ketem. Keshe bılet alyp qoıdym. Endi qaıtem... Tú-ý, sonaý jer túbindegi Jaıyqqa jaıaý bara almaımyn ǵoı. E-eh, shirkin, aýylǵa bir jetip ólsem... armanym joq! Áı, biraq jete almaımyn-aý... jete almaımyn...
– Qoıshy, – dep qolyn siltedi jeńgem. – Ne bolsa, sony aıtpaı!
...Arada biraz jyl ótkende álgi kelinshek oıda-joqta esime túsip:
– Qurbyńyz qazir aýylda ma? – dep surap em, sol baıaǵy as bólmede tamaq jasap júrgen jeńgem qolyndaǵy ojaýyn qoıa salyp, maǵan birtúrli tańyrqaı qarady. – Joq... Jolda qaıtys boldy...
Men sileıip turdym da qaldym. Jan dúnıemdi qatty tolqytqan nárse – onyń týǵan jerge degen saǵynyshy emes..., jo-joq, bizge ámanda úreıli bolyp kórinetin Ázireıil perishtemen jaıbaraqat qana tildeskeni edi.
Nurǵalı ORAZ,
«Egemen Qazaqstan»
