Is-sharada kirispe sóz sóılegen Z.Balıeva mundaı jıyndar ótkizý eldegi densaýlyq salasyndaǵy birqatar kúrdeli máselelerdi anyqtap, olardyń sheshimin tabýǵa múmkindik beretinine toqtaldy. Sondaı-aq, depýtat aq halatty abzal jandardyń eńbegin joǵary baǵalady.
«Qazirgi tańda Qazaqstanda 5,5 mıllıonǵa jýyq bala bar. Olardyń densaýlyǵyna qatysty sheshimin tappaǵan túıtkilder jeterlik. Máselen, jyl saıyn aýtızmmen aýyratyn balalar sany 13 paıyzǵa kóbeıip otyr. Biz mundaı keleńsizdiktiń aldyn alý sharalaryn qarastyrýymyz qajet. Ata-analardy mazalaǵan suraqtarǵa jaýap tabý da ýaqyt kúttirmeıtin másele», dedi Bala quqyqtary jónindegi ýákil Z.Balıeva.
Májilis depýtaty densaýlyq salasynda atqarylyp jatqan jumystardyń tıimdiligin atap kórsetti. Onyń aıtýynsha, osyndaı ǵylymı-tájirıbelik konferensııalardyń arqasynda Qazaqstannyń bedeli asqaqtatyp, dúnıeniń tórt buryshynan kelgen marqasqa dárigerlerdiń basyn qosatyn alańǵa aınalady. Z.Balıeva búginde elimizdiń dárigerleri shetelden kelgen áriptesterine úlgi bolatyn deńgeıge jetkenin de tilge tıek etti.
Densaýlyq saqtaý vıse-mınıstri L.Aqtaevanyń sózine súıensek, elimizde ana men balanyń jaǵdaıyna jiti kóńil bólinip keledi. L.Aqtaeva bul salanyń basym baǵyttardyń biri ekenin atap ótti. Vıse-mınıstr osyndaı jemisti jumystardyń nátıjesinde eldegi demografııalyq jaǵdaı jaqsaryp kele jatqanyn sóz etti.
«Keıingi 25 jyl kóleminde bala týý kórsetkishi ulǵaıyp, qaıtys bolý jıiligi azaıdy. Máselen, analardyń dúnıeden ótýi 6 esege, sábılerdiń shetineýi 3 esege tómendedi. Halyqtyń ortasha ómir súrý jasy 72-ge deıin ósti», – degen L.Aqtaeva densaýlyq salasynda atqarylyp jatqan jumystar tóńireginde áńgime órbitti.
Vıse-mınıstr Sanıtarlyq avıasııa ortalyǵynyń jumysyna da nazar aýdardy. Onyń sózine saı, 2011 jyldan beri ortalyq qyzmetkerleri 10 myńǵa jýyq márte áýege kóterilip, 13 myńnan astam naýqasqa kómek kórsetti. Sonyń jartysyna jýyǵy balalar bolsa, 2359-y júkti áıelder. Osy oraıda, L.Aqtaeva akýsherlik-gınekologııalyq sala qyzmetkerleriniń eńbegine erekshe toqtaldy. Sózin qorytyndylaı kele, vıse-mınıstr qatysýshylardy Almaty tóńireginde áýe apatynan qaza tapqan dárigerlerdi bir mınýt únsizdikpen eske alýǵa shaqyrdy.
Halyqaralyq ǵylymı-tájirıbelik konferensııa barysynda «Dannıny Gaslını pedıatrııalyq ınstıtýtynyń» medısına dırektory, ıtalııalyq Sılvıo Del Býono, AQSh-taǵy «Qansyz medısına jáne hırýrgııa ortalyǵynyń» medısına dırektory Iаn Sı Seskı, «University Medical Center» korporatıvtik qorynyń Basqara tóraǵasy Almas Qurmanov baıandama jasady.
Plenarlyq otyrystan keıin akýsherlik, gınekologııa, pedıatrııa syndy eń mańyzdy 50-den astam taqyrypta seksııalyq otyrystar ótti. Sondaı-aq, konferensııada dıagnostıkamen emdeýdiń qazirgi zamanǵy tehnologııalary, stasıonardy almastyrý jáne resýrs únemdeý ádisterin engizý arqyly ana men balaǵa kórsetiletin medısınalyq kómek túrlerin jetildirý máseleleri talqylandy. Konferensııa jumysyna qatysqan otandyq jáne sheteldik mamandar ana men bala densaýlyǵyn qorǵaý salasyndaǵy zamanaýı jetistikter týraly baıandamalar jasady. Alystan at terletip kelgen bilikti mamandar birqatar sheberlik sabaqtaryn ótkizip, jańa ınnovasııalyq tehnologııalardy úıretti.
Abaı ASANKELDIULY,
«Egemen Qazaqstan»
