Ərbir damyǵan, zaıyrly memlekettiń damý deńgeıi halqynyń ómir súrý deńgeıine baılanysty saralanatyny sózsiz. Memleket bul oraıda júrgiziletin jumystardy mindeti aıqyndalǵan maqsat etip qoıyp otyr. Máselen, Astana qalasy ákimdiginiń qaýlysymen qurylǵan «Áleýmettik qyzmet kórsetý ortalyǵy» MKQK 2016 jyldyń 1 sáýirinen bastap Astana qalasynyń Almaty, Saryarqa, Esil aýdandarynyń əkimdikterinen enshisin alyp, óz aldyna jeke memlekettik mekeme retinde qyzmet atqaryp keledi.
Əleýmettik qyzmet kórsetý ortalyǵynyń quramyndaǵy 10 bólimsheniń 5-eýi ómirlik qıyn jaǵdaıǵa dýshar bolǵan jandarǵa (jalǵyzbasty qarttar men múgedekterge) barynsha jaǵdaı jasaý baǵytynda jumys jasaıdy. Bólimsheler tirkeýdegi 400 qyzmet alýshyǵa arqa súıer demeýshi bolyp, keıbiri otbasynyń bir múshesindeı dárejege jetse, endi bir qyzmet alýshylar qalaýy boıynsha Ortalyqtyń onshaqty mamandarynyń arqasynda gıdroterapııa, fızıo em-sharalary, massaj, emdik dene shynyqtyrý taǵy sol sııaqty kóptegen ońaltý sharalaryn qabyldap, dertterine shıpa tabýda.
Ortalyqtyń əleýmettik qyzmetkerleri qyzmet alýshylardyń ərqaısysymen jekeleı qarym-qatynas ornatyp, olardyń talap-tilekterin tyńdap, meılinshe tolyqqandy ómir súrý saltyn jeńildetýge kúsh salýda. Olardyń ishinde jalǵyzbasty zeınetkerler, soǵys ardagerleri, soǵys ardagerleriniń jesirleri, tyl eńbekkerleri men óz ýaqytynda tyń jáne tyńaıǵan jerlerdi ıgerýge atsalysqan qarttar da bar. Osyndaı ár alýan taǵdyrlary toǵysqan qarttardyń qulazyǵan kóńil kúıin jadyratyp, maǵynaǵa toltyrý maqsatynda «Áleýmettik qyzmet kórsetý ortalyǵy» mádenı sharalar uıymdastyrýǵa asa mán beredi. Mysaly, qalalyq saıabaqtar, murajaılar jáne qalanyń kórikti jerlerine, qaladan tys Býrabaı demalys aýmaǵyna saıahattar, merekelerge oraı uıymdastyrylatyn konsertter, sırk jáne taǵy sol tárizdi sharalar Ortalyqtyń saltyna aınalyp otyr.
Áleýmettik qyzmet kórsetý ortalyǵy ataýly merekeler – Naýryz meıramy, Astana kúni, Jeńis kúni, Qarttar kúni, Jańa jyl qarsańynda jáne Ekspo-2017 kórmesi aıasynda ár qyzmet alýshynyń merekeni sezinýi úshin iltıpatpen jeke syılyqtar tabystady.
El bolyp eńse túzegennen beri elimizde qanshama ret álemdik deńgeıdegi sharalar ótti. Turaqty táýelsizdigimizdiń arqasynda álem elderi Qazaqstandy keń-baıtaq el retinde tanı bastady. Osy jyldardaǵy asqaqtaǵan abyroı-bedelimiz arqyly bizge «EXPO-2017» sııaqty halyqaralyq kórme ótkizýge qolymyzdy jetkizdi. Atalǵan naýqanǵa «kóppen kórgen uly toı» demekshi, Astana qalasy boıynsha «Áleýmettik qyzmet kórsetý ortalyǵynyń» qyzmet alýshylary da qatysyp, qala tórinde ótip jatqan tańǵajaıyp kórmeniń kóńildi kórermenderiniń birine aınaldy.
Sonymen qatar ortalyqta qyzmet alýshylardan quralǵan «Nostalgııa» vokaldyq toby jumys atqarýda. Toptyń kórkemdik jetekshisi Teberekov Jeken. О́nerpazdarymyz qala deńgeıinde ótip jatqan mádenı is-sharalarǵa belsene at salysady.
Áleýmettik qyzmet kórsetý ortalyǵynyń Qazaqstan Respýblıkasy boıynsha synamaly joba retinde ashylǵan alǵashqy mekeme ekenin eskerer bolsaq, osyndaı júgi aýyr kóshti bastap júrgen Rysty Jaǵyparqyzynyń Ortalyqtyń jumysyndaǵy úlesi - orasan zor, al jalpy áleýmettik salaǵa sińirgen eńbegi óz aldyna jeke áńgime.
Osy oraıda, áleýmettik qyzmetker ataǵyn abyroımen alyp júrgen, óz jumysyna shyn yqylaspen kirisetin áleýmettik qyzmetkerlerdiń eńbegin de erekshe atap ótýge bolady. Olar úshin ózge bireýdiń problemasy degen túsinik joq, qınalǵan adam kórse, qolushyn sozyp, kóp saralap jatpaı, qolynan kelgen kómegin esh aıamaıtyn jandar. Áleýmettik qyzmetkerlerdiń osy salada turaqtap qalýy da osy qasıetterinde. Jalaqysy mardymsyz bola tura, qyzmet alýshynyń babyn tabý maqsatynda qaltqysyz qyzmet etý dene kúshimen birge psıhologııalyq tabandylyqty asa qajet etedi. Bul jerde adamnyń dini, násili, ulty, jasy, bilim deńgeıi nemese qoǵamdaǵy mártebesi mańyzdy emes. Tek qana keń júrekti, adamı beınesi aıqyn, ózinen góri ózgelerge bolsyn deıtin adamnyń ǵana qolynan keleri anyq. Qyzmette bolsyn, jeke ómirde, jalpy aınalamyzda osyndaı meıirimdi adamdardyń kóp bolǵany qandaı ǵanıbet!
2017 jylǵy qyrkúıek aıynyń 22 juldyzynda elimizdiń ər túpkirindegi qyzyǵy men shyjyǵy qatar júretin mamandyqty abyroımen atqaryp kele jatqan əleýmettik qyzmetkerlerdiń alǵashqy respýblıkalyq sezi ótti. Əleýmettik qyzmetkerler kúni qarsańyna oraılasqan osyndaı aıtýly is - sharanyń ótýine baılanysty osy salanyń mamandaryn, ıaǵnı əriptesterimizdi kásibı meıramdarymen shyn júrekten quttyqtaımyz!
Aınur DILDEBAEVA,
I jáne II toptaǵy múgedekterge,
egde jasyna baılanysty
ózine qyzmet kórsetýge
múmkindigi joq adamdarǵa
áleýmettik kómek kórsetetin
№1 bólimsheniń meńgerýshisi
