Ispanııa premer-mınıstriniń baspasóz qyzmeti beısenbi kúni mınıstrler kabınetiniń shuǵyl otyrysynda konstıtýsııanyń 155 baby júzege asyrylatynyn habarlady.
Katalonııa basshysy Karles Pýchdemon Madrıd tarapy kelissózge kelmese, óńirlik parlament táýelsizdik jóninde resmı daýys berýi múmkin ekenin alǵa tartty. Ol bul oıyn Marıano Rahoıǵa hat arqyly jetkizgen. О́z kezeginde madrıdtikter aımaqqa 155 baby qoldanylatynyn málimdedi.
«Eger ortalyq bılik dıalogqa kelmeı, «repressııany» jalǵastyra berer bolsa, Katalonııa parlamenti 10 qazanda ótpeı qalǵan daýys berýdi qaıta ótkizýi múmkin», delingen Pýchdemonnyń hatynda.
Keshe jergilikti ýaqyt boıynsha saǵat 10:00-de Ispanııa bıliginiń Katalonııaǵa bergen ýaqyty aıaqtaldy. Osy ýaqyt aralyǵynda Karles Pýchdemon táýelsizdik ıdeıasynan bas tartýy tıis bolatyn.
Aıta keteıik, 1 qazan kúni ótken referendým nátıjesi boıynsha Karles Pýchdemon táýelsizdik deklarasııasyna qol qoıǵan bolatyn. Alaıda, Madrıdpen kelissózder rettelmeıinshe resmı túrde jarııalaýdy keıinge qaldyrdy. Al Ispanııa bıligi bul referendým zańsyz túrde ótkenin habarlady.
«Katalonııanyń táýelsizdigin jarııalaǵany ázirge belgisiz. Eger alǵan betterinen qaıtpasa úkimet bir jaqty áreket etýge májbúr bolady. Al raıynan qaıtsa biz bir ústel basyna otyrýǵa daıynbyz», – degen Rahoı sársenbi kúngi parlament jıynda.
Ispanııa bıligi Katalonııaǵa osymen ekinshi ret ýltımatým qoıdy. Alǵashqysy dúısenbi kúni, ıaǵnı 16 qazanda aıaqtalǵan bolatyn.
Konstıtýsııanyń 155-babynda ne aıtylǵan?
«Eger ózin-ózi basqaratyn aýmaq konstıtýsııa nemese basqa zańdar negizinde júktelgen mindetterin oryndamasa nemese Ispanııanyń barlyq múddesine keri áser eter bolsa, onda bılik joǵaryda aıtylǵan máselelerdiń aldyn alý úshin tıisti sharalardy qabyldaı alady», delingen.
Aıan ÁBDÝÁLI,
«Egemen Qazaqstan»
