2013 jyly Jaqııanovtyń karerasynda eń mańyzdy oqıǵa boldy. Dál sol jyly ol kásipqoı boksta óz zamanynda IBF, WBA, IBO beldigi boıynsha álem chempıony ataǵyn ıelengen brıtandyq Rıkkı Hattonmen kelisimshartqa otyrdy. Bul ýaqytqa deıin otandasymyz 21 jekpe-jek ótkizip úlgergen edi. 20 ret qarsylasynan basym tússe, bir ret upaı sany boıynsha jeńilgen-tuǵyn. Janattyń 2008 jyldyń qazan aıynda Reseıde uıymdastyrylǵan jekpe-jekte tájikstandyq Sahıb Ýsarovtan jeńilis tapqan edi.
Rıkkı Hattonnyń promoýterligine kelgen soń ol ár jekpe-jek saıyn chempıondyq ataqqa bir taban jaqyndaı tústi. 2014 jyldyń 26 sáýirinde Jaqııanov fransýz boksshysy Karım Gýerfty besinshi raýndta nokaýtpen jeńip, Eýropanyń EBU beldigin jeńip aldy. Aradan bes aı ótkende ol rıng tórine qaıta kóterilip, Belorýssııada grýzın boksshysy Gagı Edısherashvılıdi birinshi raýndtyń aıaqtalar tusynda búıirinen soqqy jasap, sharshy alańda sulatyp saldy. Sóıtip, EBU chempıondyǵynyń janyna WBC Eurasia Pacific Boxing Council beldiginiń qosyp qoıdy. Al 2015 jyldyń jetinshi qarashasynda Monte-Karloda Venesýela eliniń bylǵary qolǵap sheberi Ionfreza Parehodan aılasyn asyryp, jeńil salmaqtaǵy WBA tıtýlynyń ýaqytsha álem chempıony ataǵyn ıelendi. Álem chempıony degen ataqqa saty-satysymen kóterilgen Janat Jaqııanov osy jyldyń aqpan aıynda AQSh-ta jergilikti boksshy Roshı Ýorrenmen jekpe-jek ótkizip, Búkilálemdik boks uıymynyń WBA álem chempıony degen beldigin jeńip aldy. Sol kezdesýdiń alǵashqy raýndtarynda Jaqııanov eki ret nokdaýnǵa túsip qalsa da, tóreshilerge esh kúmán qaldyrmaı, jeńisti julyp qalǵan edi. Bul qazaqstandyq boksshynyń AQSh jerinde ótkizgen tuńǵysh aıqasy bolatyn.
Bul kezdesý otandasymyz úshin ekinshi chempıondyq kezdesý bolmaq. Qarsylasy da ońaılyqpen jeńiletin boksshy emes. IBF tujyrym boıynsha álem chempıony atanǵan Raıan Barnett búginge deıin 17 kezdesý ótkizip, barlyǵynda jeńiske jetken. Sondaı-aq, toǵyz qarsylasyn merziminen buryn tize búktirgen. Álem chempıony ataǵyn ıelengenge deıin brıtandyq Barnett meksıkalyq Sızar Ramıres, fransýz Entonı Settol jáne otandasy Djeıson Být sekildi tisqaqqan boksshylardy qoǵadaı japyrǵan. Al osy jyldyń maýsym aıynda IBF tujyrym boıynsha álem chempıony beldigi bar taǵy bir otandasy Lı Haskınspen sharshy alańda aıqasyp, beldigin tartyp alǵan. Endi ol araǵa tórt aı salyp, sý jańa beldigin otandasymyz Janat Jaqııanovqa qarsy qorǵamaq.
Raıan Barnett – óte shapshań boksshy. Rıngte erkin qımyldap, únemi eki qolyn tómen túsirip judyryqtasqandy unatady. Shabýylǵa shyqqanda ártúrli soqqylar jasap kóredi jáne onysyn keleside qaıtalamaýǵa tyrysyp baǵady. Rıng buryshy men kanatqa tyǵylý arqyly qarsylasyn ózine shaqyryp, sol sátte kóp soqqy jumsap qalýǵa umtylady. Sonymen qatar, eki qolymen de birdeı jumys istep, qarsy shabýylǵa ıek artatyny da bar.
Shamamen, eki boksshy rıngte osylaı oıqastaıdy. Degenmen, boksta eń bastysy – tájirıbe. Al tájirıbe jaǵynan basymdylyq Jaqııanovtyń enshisinde. О́zine soqqy darytpaý jaǵynan da otandasymyz oq boıy ozyq tur. Muny ol Ýorrenge qarsy ótken kezdesýde kópshilikke dáleldegen. Biraq, Barnettiń soqqysy amerıkalyqqa qaraǵanda aýyrlaý. Jaqııanov osyny eskerýi tıis.
Bir qyzyǵy, Jaqııanov pen Barnett eki jylǵa jýyq Rıkkı Hattonnyń qol astynda jattyqqan. Tipti, ekeýi bir-birine sparrıng-seriktes te bolǵan. Biraq, 2015 jyly Raıan Barnett Hattonnyń komandasynan ketip, Adam Býttyń qaramaǵynda jattyǵa bastady. Barnett aǵylshyndyq basylymdarǵa bergen suhbatynda Jaqııanovpen bolǵan sparrıngte jeńilip qalǵanyn aıtqan. «Men onymen bir-eki ret sparrıng ótkizip, tájirıbesizdigimniń arqasynda ese jibergenmin. Men ol kezde 19-20, al Jaqııanov 27 jasta bolatyn edi. Qazir meniń tájirıbem tolysyp, jasym úlkeıdi. Bul joly men jeńiske jetemin».
Al Rıkkı Hatton Barnettiń shamasyn jaqsy biletinin, ol Jaqııanovty jeńe almaıtynyn aıtady. «Men eki jylǵa jýyq Raıandy jattyqtyrdym. Onyń myqty tustaryn bilemin. Ol óte talantty boksshy. Biraq, Janatty jeńe alady dep oılamaımyn. Eger ol Jaqııanovty birinshi raýndtarda soqqynyń astyna almasa, ony qıyn kezdesý kútip tur. Olar bir kezderi birge sparrıng ótkizgen. Biraq qazir bári basqasha. Raıan osy ýaqytqa deıin Jaqııanov sekildi myqty boksshylarmen kezdesip kórgen joq. Shákirtim Karım Gerfı sekildi Eýropa chempıony, Roýshı Ýorren sııaqty álem chempıondaryna qarsy judyryqtasty. Al Raıannyń eń ataqty qarsylasy – Lı Haskıns boldy. Biraq onyń deńgeıi keremet emes», − deıdi Hatton.
Qoryta aıtqanda, boks sporty shahmat sııaqty ǵoı. Kim aqyldy júris jasaıdy, sol jeńiske jetedi. Jaqııanov-Barnett kezdesýinde de kim durys taktıka ustansa, sol boksshy jeńedi. Boks keshi 21 qazan kúni 00:30-da bastalsa, Jaqııanov-Barnett aıqasy Astana ýaqyty boıynsha 03:45-ke josparlanǵan.
Álı BITО́RE,
«Egemen Qazaqstan»
