Jyl basynan beri Ulttyq kásipkerler palatasyna soltústikqazaqstandyqtar tarapynan 234 aryz-shaǵym túsip, 72 paıyzy sheshimin tapqan. Taldaý barysy kásipkerlikter sanynyń bir paıyzǵa azaıǵanyn kórsetip berdi. Jer bólýdegi qıyndyqtar da jetip artylady, onyń sebepterine naqty mysaldar keltirildi. 2013-2016 jyldar aralyǵynda Petropavl qalasynda jer telimderine qatysty birde-bir konkýrs ótkizilmepti. Al oblys boıynsha eki aýksıon ǵana uıymdastyrylǵan. Bir túsiniksizdigi, jalǵa berilgen telimderdiń aýmaǵy tym úlken. Kimder alyp jatqanyna, qandaı maqsatqa paıdalanylǵanyna qatysty ashyqtyq, móldirlik jetispeıdi.
Kezdesýde kásipkerler quqyqtyq-normatıvtik aktilerdiń osal tustaryn atap kórsetip, túzetýler engizýdi ótindi. «Kazansev A.V.» JK jetekshisi Aleksandr Kazansev jeke kásipkerler tutyný kólemine qatysty tarıf qoldanylatyn jeke tulǵalarǵa teńestirilgenin aıta kelip, kásipkerdiń óz óndirisi, jumys kúshi men qural-jabdyqtary bola tura esepke alynbaıtynyna qynjylys bildirdi. «Esepteý eń joǵary mólsherde júrgiziledi. Menińshe, óndirispen aınalysatyn barlyq jeke kásipkerlerdi zańdy tulǵaǵa teńestirgen jón», dedi ol.
Oblystyq kásipkerler palatasy kásipkerlerdiń quqyǵyn qorǵaý jónindegi keńestiń tóraıymy Inessa Qýanova Azamattyq kodekste jeke kásipkerdi zańdy tulǵaǵa teńestiretin baptyń bar ekenin, sondyqtan energetıkterdiń áreketine zań normalary sheńberinde jaýap qatý kerektigin alǵa tartty. B.Palymbetov bolsa, bul máseleniń respýblıkalyq deńgeıde qaralatynyna sendirdi.
«Sút odaǵy» seriktestiginiń dırektory Aleksandr Kýzlıakın monopolısterdiń elektr energııasy úshin saralanǵan tarıfty alyp tastaýyn qoldamady. Bir ǵana tarıf boıynsha tóleýdiń qısynsyzdyǵyna kelisken ýákil máseleniń nazarǵa alynatynyn aıtty. «Jaqsy tuz Petropavl» JShS-niń dırektory Jasulan Azenov ombýdsmenniń qabyldaýynda bolyp, ındýstrııalyq-ınnovasııalyq damý basqarmasynyń zańsyz áreketterine shaǵymdandy. Sóıtse, basqarma basshylyǵy jer qoınaýyn paıdalaný maqsatymen as tuzyn óndirý jáne barlaý sharttarynyń kúshin joıý týraly buıryq shyǵarypty. Sot arqyly bir buıryqtyń kúshi joıylǵanymen, qalǵan ekeýine sottan tys tártippen qalpyna keltirý tapsyrmasy berilgenimen, ol áli kúnge deıin oryndalmaǵan.
Byltyr kásipkerlerdiń quqyǵyn qorǵaýǵa qatysty 305 ótinishtiń túsýi kedergilerdiń kóbeımese azaımaı otyrǵanyn ańǵartsa kerek. Bıylǵy jaǵdaı da kóńil kónshitpeıdi.
О́mir ESQALI,
«Egemen Qazaqstan»
Soltústik Qazaqstan oblysy
