Qazaqstanda Memlekettik qyzmet kórsetý júıesi álemniń aldyńǵy qatarly tájirıbelerine jaqyndap keledi. Oǵan Qazaqstanda qurylǵan BUU Damý Baǵdarlamasynyń Memlekettik qyzmet salasyndaǵy Astanadaǵy О́ńirlik haby da ıgi áserin tıgizip keledi.
Túrkııanyń Ystanbul qalasynda osy uıym Qazaqstan Úkimeti men BUU Damý baǵdarlamasynyń qoldaýymen BUU-nyń «Baǵalaý salasynyń ulttyq áleýeti» atty 115 memlekettiń ókilderi qatysatyn ǵalamdyq konferensııasynyń sheńberinde «Baǵalaýdyń ulttyq júıesin qurý: Qazaqstan tájirıbesi» atty semınar ótkizdi. Otyzdan astam memlekettiń ókilderi qatysqan semınardy Astanadaǵy О́ńirlik habtyń Basqarý komıtetiniń tóraǵasy Álıhan Baımenov ashyp, júrgizip otyrdy. Ol memlekettik qyzmettiń tıimdiligin jetildirýde baǵalaý júıesiniń sapaly júrgizilýiniń mańyzdylyǵy zor ekenin atap ótti. Quttyqtaý sózder aıtylǵannan keıin Qazaqstan Ulttyq ekonomıka mınıstriniń orynbasary Aıbatyr Jumaǵulov memlekettik qyzmetti baǵalaý júıesiniń barysy týraly baıandady. Ol semınarǵa qatysýshylarǵa Qazaqstandaǵy memlekettik qyzmetti baǵalaý júıesiniń tarıhı jáne ákimshilik alǵysharttary, negizgi tetikteri jáne ádistemesiniń qalaı qalyptasqany týraly keńinen aıtyp berdi. Sonyń ishinde memlekettik qyzmetterdi basqarý sapasynyń tizilim, standart jáne reglament sııaqty kórsetkishterine jeke-jeke toqtalyp ótti. 2016 jyly memlekettik organdar osy kórsetkishterdi «Azamattarǵa arnalǵan úkimet» korporasııasyna berip, azamattar elektrondy format sheńberinde ala bastaǵany da aıtyldy. Barlyq qyzmettiń 75 paıyzy atalǵan korporasııaǵa berilgen eken. Osy jyly azamattarǵa barlyǵy 143,7 mln memlekettik qyzmetter kórsetilip, onyń 73 paıyzyna qanaǵattanarlyq baǵa berilgen. Alaıda joǵaryda atalǵan ádistermen baǵalaý barysynda 10,7 myń jaǵdaıda memlekettik organdar qyzmet kórsetý merzimin belgilengen ýaqyttan uzartyp, sozyp jibergen. Al jalpy aıtqanda, qyzmetter sany 15 paıyzǵa artqan. Sońǵy 7 jylda qyzmet kórsetý merzimin sozyp jiberý jaǵdaılary 46 esege azaıǵan.
A.Jumaǵulovtyń baıandamasyndaǵy derekterge qaraǵanda, qyzmet kórsetýlerdi baǵalaý boıynsha berilgen upaı sany boıynsha, aldyńǵy orynda Ulttyq ekonomıka mınıstrligi, al sońǵy orynda Syrtqy ister mınıstrligi keledi. Oblystar men respýblıkalyq dárejedegi qalalar arasynda birinshi oryndy Almaty qalasy ustap tursa, kósh sońynda Almaty oblysynyń ákimdigi qalǵan. Qyzmet kórsetýde aqparattyq tehnologııalardy qoldaný boıynsha birinshi orynda Soltústik Qazaqstan, al sońǵy orynda Atyraý oblysy keledi. О́kinishke qaraı, memlekettik qyzmetshilerdiń eńbek júktemesiniń normadan artyq bolýy da qyzmet kórsetý sapasyn tómendetýde. Máselen, aptalyq eńbek júktemesi 40 saǵat bolǵanda Densaýlyq saqtaý mınıstrliginiń qyzmetkerleri ortasha alǵanda 14,5 saǵat artyq jumys isteıdi eken. Eń az degen Ulttyq ekonomıka mınıstrligi qyzmetkerleriniń ózi aptalyq normany 4,5 saǵatqa arttyryp jibergen.
Memlekettik qyzmet kórsetýdiń sapalylyǵy azamattardyń aryz-shaǵymdaryn ádiletti qarap, durys sheshim qabyldaǵanynan da kórinedi. О́tken jyly memlekettik organdar qazaqstandyqtardyń 1 mln 300 myńnan artyq aryz-shaǵymyn qarap, sonyń 50 paıyzyn qanaǵattandyrǵan eken. Alaıda 7 myńǵa jýyq aryz ýaqytynda qaralmaǵan.
Qazaqstan Úkimetiniń memlekettik qyzmet kórsetýlerdegi tájirıbesi jınalǵan mamandardyń qyzyǵýshylyǵyn týdyrdy. Bul jónindegi baıandamany osy mınıstrliktiń Memlekettik basqarý júıesin damytý departamenti dırektorynyń orynbasary Dınara Qulymbetova men Ekonomıkalyq zertteýler ınstıtýty memlekettik organdar qyzmetiniń tıimdiligin baǵalaý ortalyǵynyń jetekshisi Sabına Sadıeva da tolyqtyryp, jınalǵandarǵa qazaqstandyq baǵalaýdyń barlyq qyrlaryn ashyp berdi. Olar baqylaý jumysyn qadaǵalaıtyn Prezıdent Ákimshiligi ózderin memlekettik qyzmetkerlerdiń qyzmetindegi kemshilikterdi tapqanda jazalaýǵa emes, túzetýge baǵyttaıtynyn da atap ótti.
Odan ári qazaqstandyq áriptesteriniń sózderin qoldap jáne budan ózderine úlken sabaq alatynyn aıtyp Estonııa, Grýzııa jáne Ázerbaıjannan kelgen mamandar sóıledi. Degenmen olardyń arasynda syn aıtyp, jumysty jetildire túsý baǵytynda oı qosqandar da boldy. Máselen, Estonııa ókili kóp aqparattan góri, kórsetkishterdiń kóbirek bolǵany baǵalaý nátıjesiniń sapasyn anyǵyraq kórsetetinin atap ótti. Al Ázerbaıjan ókili baǵalaý jumysyna úkimettik emes uıymdardy kóbirek tartýdyń tıimdiligi týraly aıtty.
Qoryta aıtqanda, semınar memlekettik qyzmettiń tıimdiligin baǵalaý jumysynda naqty tájirıbeler, ınnovasııalar men perspektıvalyq ádisnamalarmen bólisýge óte paıdaly dıalogtyq alań boldy. Biz sharany uıymdastyrýshy, О́ńirlik hab basqarýshy komıtetiniń tóraǵasy Álıhan Baımenovpen áńgimeleskenimizde ol semınardyń dittegen maqsatyna jetkenin aıtýmen qatar óziniń keıbir usynystaryn da bildirdi. Máselen, ol memlekettik organdar qyzmetiniń tıimdiligin baǵalaý mindetin bolashaqta Respýblıkalyq bıýdjettiń atqarylýyn baqylaý jónindegi esep komıtetiniń quzyryna bergen durys bolar edi dedi. «Esep komıteti burynǵydaı atalǵanymen qazir onyń maqsat-mindetteri keńeıip otyr. Máselen, atalǵan mekeme qarjyny zań boıynsha jumsaýdy ǵana emes, jumsalǵan qarjynyń tıimdiligin de anyqtaıdy. Baǵalaý júıesiniń maqsaty da soǵan jaqyn. Sol sebepti Eýropa elderiniń kóbisinde aýdıt júıesi men baǵalaý júıesi birikken. Bul memlekettik resýrstardy da tıimdi jumsaýǵa múmkindik beredi. Esep komıteti – tikeleı Prezıdentke baǵynatyn organ. Sondyqtan ol úkimettik organdardyń jumysyn táýelsiz baǵalaı alady», dedi Á.Baımenov.
Tóraǵanyń sózinen aldaǵy ýaqytta aımaqtyq semınar da ótkiziletini belgili boldy. Onda Ońtústik Koreıa, Estonııa sııaqty elderdiń memlekettik qyzmet kórsetý salasyndaǵy ozyq tájirıbeleri tanystyrylmaq.
Jaqsybaı SAMRAT,
«Egemen Qazaqstan» – Ystanbuldan
