Sýretti túsirgen: Talǵat TÁNIBAEV
Ol 16 jyldyń ishinde 85 marafonǵa qatysyp, 9 márte kýbok, 29 medal ıelendi. Endigi armany – Gınnestiń rekordtar kitabyna ený. Ile-shala «Almaty týry-2017» halyqaralyq jarysynyń 4 dúrkin jeńimpazy Alekseı Lýsenko «Výelta Ispanııa» velokópkúndik jarysynyń besinshi kezeńinde jeńistiń eń bıik tuǵyryna kóterildi. «Týr de Frans-2017» tanystyrylymyna shaqyrtý aldy. Jaqsy habardyń izi sýymaı jatyp Ashǵabadta ótken Azııa oıyndarynda veloshabandoz Artem Zaharov trekte jeńimpaz, omnıýmda kúmis, jeńil atletshi Mıhaıl Lıtvın 400 metrge júgirýden qola júldeger atansa, balýanymyz Danııar Kálenov altynnan alqa taqty.
Ziltemirshi Aıdar Qazovtyń aıshyqty asýy nege turady! Onyń Taıpeı qalasynda álemniń 142 elinen 7 myńǵa jýyq sportshy qatysqan stýdentterdiń HHIH dúnıejúzilik Ýnıversıadasyndaǵy top jarǵan zor tabysyna aımaq basshysy Qumar Aqsaqalov ta ortaqtasyp, arnaıy qabyldady. Aýyr atletshini elimizdiń kók baıraǵyn jelbiretken aıtýly jeńisimen quttyqtap, aqshalaı syılyq tabys etti. «Jeńis joly qashanda aýyr. Taıpeıde serpe kóterýden úshtikke enip, julqa kóterýde Kanada men Reseı ziltemirshileri baǵyndyra almaǵan 186 kılony kóterip, altyn taǵdyry asa tartysty jaǵdaıda sheshildi. Eń myqty qarsylasym – Rıo jazǵy Olımpıadasynyń chempıony Nıdjat Rahımov. Alda serpe kóterý nátıjesin jaqsartý mindeti tur», degen bolatyn BAQ ókilderine bergen suhbatynda. Aýyr atletıkadan Qazaqstan ulttyq quramasynyń burynǵy keńesshi-bapkeri Enver Túrkilerıdiń «Aıdardyń boıynda Olımpıada chempıony atanýǵa qajetti qasıetterdiń bári bar» degen pikirin eskeretin bolsaq, jarqyn jeńistermen qýantary sózsiz.
Danııar Kálenov jaıly sóz bólek. Azııa qurlyǵynyń kil myqtylary jınalǵan básekede balýandar arasynan ol ǵana el qorjynyn altyn júldemen eseledi. Alǵashqy beldesýde boz kilem ıesin, ıaǵnı túrikmenstandyq balýandy 5:0 esebimen utyp, kelesi aınalymda qytaılyqty 8:0 esebimen oısyrata jeńdi. Jartylaı fınalda О́zbekstan namysyn qorǵaǵan qandasymyzdan aılasyn asyrsa, aqtyq jekpe-jekte ırandyqty qapy qaldyrdy. Munyń aldynda el chempıonatynda qola, Grýzııadaǵy Gran-prı jarysynda birinshi oryn alǵan bolatyn.
El namysyn abyroımen qorǵap, mereıin asyrǵan sport sańlaqtaryn jýyrda ótken marapattaý rásiminde Túrikmenstan jerinde úsh jerlesimizdiń jeńis tuǵyryna kóterilgeni atap aıtyldy.
– Sport – densaýlyqty jaqsartatyn, salamatty ómir saltyn qalyptastyratyn, adamdardy biriktiretin, dostastyratyn mańyzdy shara. Oblysymyzda bul salaǵa úlken kóńil bólinip keledi. Bıýdjetten qomaqty qarjy qarastyrylyp, sáýletti nysandar salynýda. Búgingi tańda 170 myńnan astam turǵyn 3 myńǵa tarta sport ǵımarattarynda jattyǵady, deı kelip, Qumar Irgebaıuly, Artem Zaharov pen Mıhaıl Lıtvınge 1 mıllıon jáne 500 myń teńge mólsherinde aqshalaı syılyqty, al Danııar Kálenovke páterdiń kiltin saltanatty túrde tapsyrdy.
Olardyń bapkerleri de túrli marapattarǵa ıe boldy.
О́mir ESQALI,
«Egemen Qazaqstan»
Soltústik Qazaqstan oblysy
