Qorǵanys jáne aeroǵarysh ónerkásibi mınıstrligi uıymdastyryp otyrǵan forýmnyń maqsaty ekonomıka salasyndaǵy máselelerdi sheshý úshin ǵarysh qyzmetindegi nátıjelerdi qoldaný boıynsha tájirıbe almasý, sońǵy on jyldaǵy ǵarysh qyzmetiniń qorytyndysyn qarastyrý, sondaı-aq álemdik tájirıbege súıene otyryp, elimizdiń ǵarysh salasyn damytý josparlaryn talqylaý bolyp tabylady.
Forýmdy ashqan Qorǵanys jáne aeroǵarysh ónerkásibi mınıstri Beıbit Atamqulov Qazaqstan ǵarysh salasyn damytý boıynsha Memleket basshysy alǵa qoıǵan mindetterdiń mańyzdylyǵyn aıta kelip, osy baǵytta atqarylyp jatqan jumystardy atap kórsetti.
«Búginde «Baıqońyr» búkil adamzattyń ıgiligine aınalyp otyr. Osynaý biregeı keshen burynǵy Keńes Odaǵyndaǵy ǵana emes, sonymen qatar búkil álemdegi kóptegen tehnologııanyń damý bastaýynda tur. Qazirgi ýaqytta reseılik áriptestermen keshendi odan ári damytý tujyrymdamasy qabyldandy. Onda ǵarysh aılaǵynyń qoldanystaǵy nysandarynyń bazasynda ǵarysh jobalaryn júzege asyrýǵa qatysty bizdiń baılanystarymyzdy jalǵastyrý sharttary kózdelgen», dedi mınıstr. Sondaı-aq ol ekologııalyq turǵyda qaýipsiz jańa ǵaryshtyq zymyran keshenin ázirleý jónindegi «Báıterek» jobasy mańyzdy sanalatyndyǵyn atap ótti. «Bul joba bıyl bastaldy. Biz jańa keshendi 2022 jyly alǵash ret ushyrýdy josparlaýdamyz. Qazaqstan tarapy jer ústi keshenderi men ınfraqurylymyna qatysty jumystardy júrgizse, reseılik tarap zymyran daıyndaýmen aınalysatyn bolady», dedi B.Atamqulov.
Budan keıin Halyq qaharmany, ushqysh-ǵaryshker, Parlament Senatynyń depýtaty Talǵat Musabaev pen «Roskosmos» memlekettik korporasııasy bas dırektorynyń ǵarysh qyzmeti boıynsha orynbasary Sergeı Savelev quttyqtaý sózderin jetkizdi.
Plenarlyq otyrysta otandyq ǵarysh salasyn damytý týraly negizgi baıandamany Qorǵanys jáne aeroǵarysh ónerkásibi vıse-mınıstri Marat Nurǵojın jasady. Vıse-mınıstr óziniń baıandamasynda mınıstrliktiń jumysy negizgi tórt baǵyt boıynsha júrgiziletinine toqtaldy. Olar Qazaqstan Respýblıkasy ǵarysh apparattarynyń orbıtalyq toptastyrylýyn qoldanýdy damytý jáne keńeıtý, ǵarysh apparattaryn qurastyrý-synaý keshenin qurý jobasyn júzege asyrý, ǵylymı zertteýdi damytý jáne olardyń nátıjesin tájirıbede paıdalaný, «Baıqońyr» aılaǵyn damytý aıasynda «Báıterek» jobasyn júzege asyrý jáne kadrlyq potensıaldy arttyrý.
Sondaı-aq Eýrazııalyq ekonomıkalyq komıssııanyń, fransııalyq «Airbus Defence and Space» jáne «Thales Alenia Space», akademık M.F. Reshetnev atyndaǵy reseılik «Aqparattyq spýtnıktik júıe», ońtústikkoreıalyq «Satrec Initiative» kompanııalarynyń ókilderi baıandama jasady.
Forýmnyń bul alǵashqy kúni «Ǵaryshtyq jáne geoaqparattyq tehnologııalar» atty Eýrazııalyq tehnologııalyq platformasynyń jalpy jıyny otyrysymen aıaqtaldy. Alqaly basqosýdyń qorytyndy sharalary búgin ótedi.
Aıta keteıik, 2013 jyldan beri «Qazaqstandaǵy ǵarysh kúnderi» taqyrybymen semınar retinde jyl saıyn ótkizilip kele jatqan bul jıyn bıyl óziniń áser etý aýmaǵy men shekarasyn keńeıte tústi. Iаǵnı atalǵan basqosý halyqaralyq semınardan halyqaralyq forýmǵa aınalyp otyr. Forým ǵarysh qyzmetindegi mańyzdy saýaldar talqylanatyn alań retinde jumysyn jalǵastyra bermek.
Forýmda qatysýshylarǵa Jerdi qashyqtyqtan zondtaý ǵaryshtyq toby qurylymynyń sońǵy úlgilerimen jáne jańa tehnologııalarymen, navıgasııalyq júıesimen, ǵarysh apparattarynyń tıimdi júktemesin óndirý salasymen tanysýǵa múmkindik beriledi.
Joldybaı BAZAR,
«Egemen Qazaqstan»
