Bul mekteptiń jeke tarıhynyń aıtarlyqtaı úsh ereksheligi bar. Birinshisi – osydan 40 jyl buryn, ıaǵnı 1977 jyly qyrkúıek aıynda Shevchenko (qazirgi Aqtaý) qalasynda alǵash ashylǵan qazaqtildi mektep bolýy. 51 synyppen ashylǵan mektep alǵashqy oqý jylyn 1357 oqýshymen bastaǵan edi.
«Qazaqsha alǵan bilim sapasyz, sondyqtan basqa tilderde oqytý qajet» degen qasań qaǵıdanyń tas-talqanyn shyǵarǵan jas bilim oshaǵy bilim berýde tyńǵylyqtylyǵy men ustazdarynyń óz isine degen yqylasynyń arqasynda birden aldyńǵy qatarlylardyń sanatynan tabyldy. Osy abyroı, osy senim mektepti 2008 jyly Aqtaý qalasy ákiminiń sheshimimen «№11 mamandandyrylǵan fızıka-matematıka mektebi» atandyrdy. Mektep ujymy oqýshylarǵa fızıka men matematıkany tereńdete oqytý baǵytynda iske kiristi. Bul – mekteptiń ekinshi ereksheligi edi.
Ýaqyt jyljyp, táýelsiz Qazaqstan álem elderiniń ozyq úlgilerin óz tájirıbesine engizgen saıyn, basqa salalar sekildi bilim berý salasynda da biraz jańalyqtar qoldanysqa endi. Ol jańashyldyqty engizý mektep ustazdaryna zor jaýapkershilik júktedi.
– Qazaqstannyń álemdik úrdisterge kirigýi, damyǵan elderdiń standarttaryna degen umtylysy bilim berý júıesiniń jana sapalyq deńgeıge ótý qajettiligin týyndatýda. Osyǵan oraı qazirgi kezde bilim berý júıesinde jasalyp jatqan maqsatty múddege saı oqýshylar shyǵarmashylyǵynyń qalyptasýynda tabysty ister az emes. Mektebimiz «Daryn» baǵdarlamasy boıynsha erekshe talantty, daryndy jas zertteýshilerdi tańdaý arqyly túrli baǵytta jumys júrgizip keledi. Jeke tulǵanyń shyǵarmashylyq áleýetin jáne qabiletin damytýǵa, zertteý biligi men daǵdylaryn qalyptastyrýǵa baǵyttalǵan qazirgi ınnovasııalyq-pedagogıkalyq tehnologııalardyń biri – oqýshylardyń ǵylymı-zertteý jumysy. Osyǵan oraı bilim mekemesiniń oqýshylary qalalyq, oblystyq, respýblıkalyq deńgeıdegi sharalarǵa belsene aralasýda, – deıdi bilim ordasynyń basshysy Gúlzada Eńsegenova.
Mektep dırektorynyń aıtýynsha, ár balanyń jeke qabilet ereksheligin ashý úshin pánder boıynsha ótkiziletin olımpıadalardyń orny erekshe. О́tken oqý jylynda atalmysh mektepten qalalyq deńgeıde ótkizilgen pánder olımpıadasyna 57 oqýshy qatystyrylyp, onyń 28-i júldeli orynǵa ıe bolsa, respýblıkalyq olımpıadadan Ásel Ihsanova, Zaman Qurmet atty oqýshylar júldeli oralǵan. О́z bilimin dáleldegen Ásel Ulttyq biryńǵaı testileý qorytyndysymen oblys boıynsha joǵary upaı sanalǵan 135 baldy jınap, «Altyn belgisin» abyroımen qorǵap shyqty. Mektepter, oqýshylar men ustazdar arasyndaǵy qalalyq, oblystyq saıystarda bul mekteptiń top jarǵan kezderi az emes, biraq ony tizýdiń múmkindigi de, qajeti de joq.
Alaıda mekteptiń aty ozyp, balapandaı baptaǵan shákirtteriniń tereń bilim alýyna ter tógip júrgen respýblıkalyq «Úzdik pedagog» saıysynyń júldegeri, «Jyl adamy» atanǵan matematık Marjan Asylbaeva, oqýshylary árdaıym respýblıkalyq pándik olımpıadalardan júldeli oralatyn orys tili pániniń oqytýshysy Qymbat Kóbenova, shákirtteri hımııadan qalalyq, oblystyq saıystarda jeńispen qýantatyn hımııa pániniń muǵalimi Raıhan Sharaýova, sondaı-aq fızıkany aǵylshyn tilinde oqytyp júrgen jas maman Jazıra Yqylasova syndy ustazdardyń esimin rızashylyqpen ataýǵa mindettimiz. Ustazdardyń eńbegi nátıjesinde 2016-2017 oqý jylynda mektep túlekteriniń 70 paıyzy memlekettik grant ıegerleri atandy.
Qazaqstan Respýblıkasynda bilim berýdi damytýdyń 2011-2020 jyldarǵa arnalǵan memlekettik baǵdarlamasy jáne bilim berýdi damytýdyń 2014-2016 jyldarǵa arnalǵan basym baǵyttaryn júzege asyrý aıasynda Qazaqstanda orta bilim mazmunyn jańartý jumystary jalǵasýda. Osynyń aıasynda jańa memlekettik jalpyǵa mindetti bastaýysh bilim berý standarty, bastaýysh mektepke arnalǵan úlgilik oqý josparlary jáne oqý baǵdarlamalaryn aprobasııalaý júrgizilýde. El Úkimeti jańartylǵan bilim berý mazmunyna kóshýdiń tujyrymdamalyq tásildemelerin maquldap, 2015 jyly elimizdegi 30 mektepte bilim berýdiń jańartylǵan mazmunyn engizý jumystaryn júrgizý týraly sheshim qabyldaǵan bolatyn. Bizdiń mektebimizge respýblıka boıynsha 30 mekteptiń quramyna ený múmkindigi týdy, deıdi mektep basshysy bizben áńgimesinde. Ustazdar endi jańartylǵan bilim mazmunyn óz boılaryna sińirip, ony urpaq tárbıesine engizý úshin eńbektenýde.
2008-2009 oqý jylynda mektepke memleket jáne qoǵam qaıratkeri, 1973 jyly qurylǵan oblysqa basshy bolyp kelgen azamat, 1973-1980 jyldary Mańǵystaý oblystyq partııa komıtetiniń birinshi hatshysy bolyp tabysty eńbek etken Tutqabaı Áshimbaevtyń esimi berilip, mektep aýlasyna qaıratkerdiń bıýsti qoıylǵan bolatyn. Sol jyly mektep ishinen T.Áshimbaevtyń murajaıy ashylyp, kúni búginge deıin jas urpaqqa keshegi aǵa býynnyń ónegeli isin nasıhattaıtyn úlgili oryn qyzmetin atqarýda. Alaıda mekteptiń úshinshi ereksheligi sanalatyn bul bastama aıaqsyz qalyp, áli resmı kúshine enbegen kúıinde tur eken.
...Mektep dálizi oqýshylardyń syńǵyr úni men balǵyn kúlkisine toly. Ol – adaldyqtyń uıasy, balalyq shaqtyń besigi, onyń esiginen attamaǵan adam joq jáne ol sonysymen barlyq adamǵa ystyq, qadirli, kıeli bolyp qala beredi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
