Sharaǵa Q.Qýanyshbaev atyndaǵy memlekettik akademııalyq qazaq mýzykalyq drama teatrynyń basshysy Aıbolat Seksembaev, M.Gorkıı atyndaǵy memlekettik akademııalyq orys drama teatrynyń basshysy Erkin Qasenov jáne Jastar teatrynyń basshysy Ernar Jumataev qatysty. Teatr basshylary jańa maýsymdaǵy josparlarymen bólisip, BAQ ókilderiniń saýaldaryna jaýap berdi.
Jıyn barysynda M.Gorkıı atyndaǵy orys drama teatry 117-shi teatr maýsymyn erteń, ıaǵnı, 25 qazan kúni A.S.Pýshkınniń «Evgenıı Onegın» premeralyq qoıylymymen ashatyny belgili boldy. Sondaı-aq, teatrdyń jańa maýsymy elimizdiń ordasy – Astana qalasynyń 20 jyldyǵyna arnalmaq. Osy ýaqytta ujym F.Dostoevskııdiń «Aǵaıyndy Karamazovtar», A.Ekzıýperıdiń «Kishkentaı hanzada» týyndylarynyń jańa qoıylymyn sahnalaýdy josparlap otyr.
Al, Jastar teatryna keler bolsaq, jasampaz teatrǵa bıyl on jyl. Sondaı-aq onyń kórkemdik jetekshisi ári bas rejısseri Nurqanat Jaqypbaı 70 jasqa keldi. Osyǵan oraı 25 qazan men 1 qarasha kúnderi aralyǵynda «Janarymdaǵy jalǵyz áýen» atty Jastar teatrynyń úzdik qoıylymdar festıvali ótpek. Teatr basshysy festıval aıasynda akter sheberligi, sahna qozǵalysy, sahna tili jáne vokal baǵyty boıynsha akterlerdiń kásibı biliktiligin arttyrýǵa arnalǵan sheberlik synyptary ótetinin málimdedi.
Aıgúl SEIIL,
«Egemen Qazaqstan»
