Aqtóbede arheologtary bıyl Álkeı Marǵulan atyndaǵy arheologııalyq ınstıtýtymen, Reseı ǵylym akademııasynyń Shyǵystaný ınstıtýtymen birlese úsh qazba, eki ǵylymı zertteý jumysyn júrgizdi. Aqtóbe qalasy mańyndaǵy Bekqul baba aýylynda jeke turǵyn úı qurylysyn júrgizýge ruqsat bergen kezde jergilikti mamandar dabyl qaǵyp, aldymen zertteý júrgizýge kelisti. Dál sol jerden erte temir dáýirine jatatyn altyn syrǵa tabyldy.
«Biz úshin tabylǵan zattyń bári qundy. Degenmen, bıyl arheologtar kópten kútken zatty tapty. Ol - erte temir dáýirine jatatyn altyn buıym. Dál osyǵan uqsas áshekeı buryn Aqtóbe oblysy, Mártók aýdanynan 80-jyldary tabylǵan bolatyn. Ol kezde arheolog Mır Qabyrbaev qazba jumystaryn júrgizji. Biz keıin izdedik, osy kúndi kúttik»,- dedi Á. Marǵulan atyndaǵy arheologııa ınstıtýtynyń Batys Qazaqstan aımaǵy boıynsha ókili, arheolog Arman Bısenbaev.
Arheologtar úshin áli de eskertkishterdi qorǵaý, qazba jumystary júrgizilmegen aımaqty aman alyp qalý qıynǵa soǵyp tur. Sebebi, munaı-gaz kompanııalary qazba jumystary kezinde arheologtardy shaqyrmaıdy, qajet kezde aıyppul tóleıdi. Al aıyppul iri munaı kompanııalary úshin tym tómen. Olar jumysty toqtatpaý úshin kóbine aıyppul tólep, jaýapkershilikten attap ótedi.
«Eskertkishterdi joıyp jatyr, biz tek qalǵanyn zertteýge shyǵamyz. Aqtóbe oblysy eskertkishterdi joıý tizimi boıynsha aldyńǵy orynda tur. Zań bar, biraq ol eskertkishterdi saqtaı almaıdy»,- dedi Arman Bısenbaev.
